COV ME NYUAM TXHEEJ TSHIAB NYEM NO

Vaj Qhia Fas Ntshis Kus tau hais rau cov tuaj sib sau sab laj txog cov me nyuam txheej tshiab nyem no uas lawv nyob rau lub ntuj Digital. Cov lus no Vaj Qhia hais nyob hauv lub rooj sab laj Khas Mes Thais Vas Tis Kas hnub tim 14 lub 11 hlis 2019 dhau los.
Vaj Qhia cov lus yog li no : “2 xyoo dhau los, yam li yog hnub tim 6 lub 10 hli xyoo 2017, kuv tau thov kom nej sawv daws sib koom tes pab txuag cov me nyuam yaus lub meej mom nyob hauv lub ntuj Digital. Cov kws txuj, cov kws tshuab txheej tshiab, cov tub lag tub luam, cov tub tseev tsim, cov kws lij choj, cov tub kawm, cov thawj coj hauv txhua txoj kev teev hawm thiab cov saib xyuas kab lis kev cai, nej sawv daws tau muab siab rau koom tes thiab tseem muaj tej yam tshiab ntxiv, kuv zoo siab ua nej sawv daws tsaug”. 10 xyoo dhau los no, lub Koom Txoos Kav Tos Liv tau xav txog kev phem, kev quab yuam ntawm tsoom tub ntxhais hluas. Lub Koom Txoos tau cawm thiab kho lawv tej mob, tiv thaiv txog kev tua neeg thiab nrhiav lwm txoj hau kev los tiv thaiv kom zoo tuaj. Tab sis pom tau tias lub Koom Txoos tab tom raug lwm tus neeg tso hem thawj txog lub neej yav tom ntej. Li ntawd, kev txhim kho fab siv cov tshuab txheej tshiab, kev sib fi xov nyob hauv Internet thiaj tsim nyog rau cov me nyuam yaus xyaum. Kom lawv loj hlob thiab txawj sib hwm sib faib tej yam zoo zoo, txawj txuag lawv lub cev kom noj qab haus huv thiab nyob zoo. Tab txawm cov me nyuam yaus uas nyob deb kev vam meej thiab pluag txom nyem, tsis kav yog muaj zoo caij mas lawv kuj yuav tau xyaum thiab. Tab sis txhob pub cov me nyuam yaus poob rau txoj kev ntxias thiab kev sib ntaus sib tua, kev raug lwm tus quab yuam siab ntsws thiab ua dev ua npua nyob hauv lub ntuj Digital. Qhia kom cov me nyuam txhob rhuav tib neeg lub meej mom thiab txhob hloov lawv tus cuj pwm, kom lawv tsis txhob poob rau hauv txoj kev quav yeeb quav tshuaj mus ua tej yam tsis zoo. Cov teeb meem no yog ib co teeb meem txaus ntshai thiab tsim nyog yuav ua sai sai. Peb yuav dag peb tus kheej tsis tau, peb yuav tsum nrog lwm tus neeg sib koom tes txuag cov me nyuam yaus. Yuav los zaum xav txog qhov zoo thiab qhov phem ntawm txoj kev sib fi xov nyob hauv Internet. Peb yuav mloog sawv daws zaj tswv yim thiab txoj kev pom zoo. Vaj Qhia hais tias peb yuav muab dab tsi los tiv thaiv hais txog kev sib fi xov mus rau txoj kev txhaum.
(1). Yog yuav xav kom sawv daws zoo, mas cov nom tswv kav zej zog yuav tsum muaj txoj cai txwv tsis pub ua tej yam lag luam uas yuav ua teeb meem rau neeg, thiab ua rau cov me nyuam yaus lub meej mom puas tsuaj.
(2). Cov tuam tsev tsim toob xib, uas lawv niaj xyoo tsim cov tshuab txheej tshiab kom lawv nplua nuj, yuav tsum hwm tseem hwv txoj cai thiab xub xav txog cov teeb meem no ua ntej.
(3). Cov ua niam ua txiv yog thawj tus neeg yuav ris cov teeb meem no, vim lawv yog cov me tub me nyuam. Yog cov ua niam ua txiv tsis kav nruj nruj thiab tsis muab siab rau saib xyuas, mas lawv yog cov ntsib cov teeb meem no. Thiab yuav tsum paub tias cov me nyuam yaus tsim nyog saib yam twg thiab kov yam twg xwb.
(4). Cov thawj coj ntawm txhua txoj kev teev hawm thiab cov xib hwb qhia ntawv yuav tau nrog cov niam cov txiv sib koom tes. Sawv daws sib txhawb sib fim nrog rau lwm lub Koom Haum thiab cov tsev qhia ntawv. Vim tias cov me nyuam yaus tsim nyog ntsib lub neej zoo zoo, ces peb yog tus yuav ua txhua yam los pab cov me nyuam kom lawv tau ntsib yam zoo raws li lawv lub siab xav.

Tus txhais : Lis Maib, Zoo Tswv Zov Yaj