COVID-19 NYOB AS XIAS TEB TSIS TXAWJ PLOJ.

Lub xyoo no tus kab mob Covid-19 sib kis loj thiab ua rau neeg tuag coob heev, ua rau ntiaj teb neeg lub neej hloov tag. Tus kab mob sib kis mus rau txhua lub teb chaws, ua rau cov tseem hwv hauv lawv lub teb chaws kub ntxhov heev. Vim sawv daws muab siab rau nrhiav kev tiv thaiv tus kab mob, ces tej kev lag luam poob nqis zuj zus, muaj qee lub tuam tsev ua lag luam cia li raug kaw yam sawv tsis taus. 
Tus kab mob xub tshwm sim nyob hauv lub nroog Vum Haj uas nyob Suav teb, ces kis mus rau Aws Los Pas. Lub teb chaws Is Tas Lias thiaj yog lub teb chaws uas tsoom pej xeem raug tus kab mob loj tshaj thiab ua rau neeg tuag coob coob nyob Aws Los Pas. 
Tus kab mob Covid-19 thiaj sib kis mus thoob ntiaj teb, thiab ua rau neeg tuag coob tshaj plaws nyob thoob ntiaj teb yam tsis tau muaj los dua li. Tam sim no As Mes Lis Kas teb yog lub teb chaws uas muaj neeg mob Covid-19 coob tshaj thiab tuag coob tshaj. Dhau ntawd, mas yog Nplas Xis teb, Is Ntias teb, Lav Xias teb, As Fiv Kas Naj thiab Mev Xis Kos. Cov teb chaws hais los no, yog cov teb chaws uas niaj hnub nyem no muaj neeg mob Covid-19 thiab tuag coob tshaj. 
Tam sim tus kab mob tseem sib kis tas zog nyob hauv ntau lub teb chaws nyob As Xias teb. As Xias teb yog xeev ntuj uas muaj 4,600 plhom tus neeg nyob, piv li yog 60 feem pua ntawm tas tsoom neeg nyob ntiaj teb. Is Ntias teb yog lub teb chaws muaj neeg coob tim 2 nqes los ntawm Suav teb, thiab tam sim no tsoom pej xeem Is Ntias mob Covid-19 tuag coob tshaj Is Tas Lias teb lawm. 
Lub Koom Haum saib xyuas kev noj qab haus huv nyob ntiaj teb WHO tshaj tias : Fis Lis Pees teb yog lub teb chaws muaj cov neeg mob Covid-19 coob dua Suav teb lawm, thiab yog lub teb chaws muaj mob coob tshaj nyob hauv cov teb chaws As Xias Pas Xis Fiv. Nyob As Xias teb muaj 2 lub teb chaws uas tsoom pej xeem mob Covid-19 coob tshaj, yog Is Ntias teb thiab Is Laas teb. Tus kab mob Covid-19 ua tua neeg tuag coob kawg nyob hauv cov teb chaws vam meej thiab cov tsis vam meej huv si.