HMOOB LUB SIAB TXAIJ, TSIM NYOG YUAV CHEB NTXUAV THIAB MUAB DAWS POV TSEG 2

Tseem muaj coob leej ntau tus koom tes nrog Vwj Looj Teeb ua nws txoj hauj lwm phem ntawd thiab. Qhov no tsuas yog piv txwv xwb. Nyob txhua lub sij hawm ntawm peb Hmoob lub neej tsov rog, xws li puav leej muaj cov Hmoob siab phem uas siv tom txwv rov tua Hmoob no coob kawg thiab. Lawv lub siab xyov yog ruam los ntse, suav tau tias phem npaum li cas ? Tsis muaj ib yam dab tsi yuav los piv tau lawv nplooj siab phem ntawd. Cov Hmoob uas tawg los mus nyob rau Los Tsuas teb thiab Cob Tsib teb Muaj cov thawj Hmoob xws li Koos Paj Cai nyob Moos Theeb. Yawm hnub qub dawb Vaj Pov nyob Los Tsuas teb, thiab tseem tshuav coob tus uas tau sawv los ua Hmoob tus coj, kuj tseem raug tus puav nyuag Hmoob coj yeeb ncuab mus tua lawv, mus soj ntes lawv, ua rau tsoom Hmoob sib tawg faib koj pab kuv pawg, ua ntxhov pes hnyo nyob hauv peb Hmoob lub neej, tsis qab siab los sib hlub sib pab. Kuv xav tias yog tsis muaj lub qhov ncauj Hmoob mus hais qhia luag. Mas tej zaud luag yuav tsis paub tseeb Hmoob lub plawv thiab Hmoob tej txheej txheem. Yog ua li cas ho muaj cov Hmoob coj lub siab li hais los no. kuv xav tias qhov ib, yog nws ruam, nws siab nyias. Luag ib nyuag hem ces nws ntshai luag ntxias ces nws qaug luag quav. Nws tus neeg ntawd thiaj qhia luag los yog coj luag rov tuaj ntes yus cov Hmoob.
Qhov Ob, nws yeej paub tab thiab ntse, tiam sis tseem muaj tus ntse dua nws lawm thiab, ces nws tsis tau ua nom tsis tau ua tus coj. Nws khib, ces txoj kev khib ntawd cia li ua rau nws txhob txwm mus qhia luag, los puas coj luag rov tuaj tua los ntes yus cov thawj coj Hmoob.
Qhov peb, nws tsuas xav txog nws tus kheej xwb, tsis xav txog tsoom Hmoob sawv daws. Nws tsuas xav kom nws tau noj tsau pw sov thiab tsis muaj kev nyuaj siab. Cia cov mus tua tau txeeb tau, ces nws khaws dawb noj ywj siab. Los yog cov mus tua tsis yeej, nws saib zoj tsis phim ces nws cia li mus tuaj kiag yeeb ncuab tog. Luag hais li cas los ua li ntawd. Ces luag thiaj muab nws yuam coj luag rov tuaj tua Hmoob nrhiav ntes kom tau Hmoob. Vim yog peb qho no, ces thiaj muaj cov Hmoob ua hauj lwm zoo li ntawd. Cov Hmoob uas tso taub hau mus kev, rov taw tuam ntuj, siv tom txwv tsim kev kub ntxhov nrhiav teeb meem rov rau yus haiv Hmoob. Es nej puas nyiam lawv puas ntxub lawv ? Puas chim rau lawv thiab puas mob siab txog yus haiv Hmoob ?