HMOOB LUB SIAB TXAIJ, TSIM NYOG YUAV CHEB NTXUAV THIAB MUAB DAWS POV TSEG 4

Qhov nov tsim nyog peb yuav tsum hloov. Tsis txhob ua li ntawd lawm mog lawv.
Peb yuav tsum tsa muag ntsia luag lwm haiv neeg es mus xyaum li luag. Xyaum qhov tshiab qhov zoo kom tsoom Hmoob tsuas muaj txoj kev vam meej. Muaj tej qhov yus pom luag lwm haiv neeg ho ua tsis zoo coj tsis yog, yus yuav tsum zam kev, tsis txhob xyaum! Yuav tsum hwm nom hwm tswv, hwm tus coj. Txhob kwv, txhob nyom, txhob tawv ncauj! Mloog tej nom tswv hais. Hos tej nom tswv, tej laus neeg, cov coj noj coj ua, los lub siab yuav tsum dav fo dawb paug ncaj ncees, hlub leej hlob leej yau, hlub tus laus tus hluas, poj niam txiv neej, kev neej kev tsav, niam txiv pej xeem huab hwm kom sib luag. Pheej xeeb koob pheej, tsis txhob noj txiaj dub haus ntshav nyoos. Tsis tas li ntawd. Yog kab to kev nrug, yuav tsum qhuab qhia tej tub ntxhais hluas kawm txuj Hmoob, los puas nrhiav kev kawm lwm yam rau lawv tau kawm. Txhob hais koj pab kuv pawg, hais caj ces hais xeem tso es yuav rub ib tug thawb ib tug. Thov txhob ua li no ib zaug ntxiv! Yog pom leej twg thoob tsib noj xwm, yuav tsum muab nws los ua hauj lwm rau sawv daws, los sis nrhiav kev txawj ntse rau nws mus kawm los qhia rau sawv daws, thiaj yuav txawj ntse thiab lub teb chaws thiaj yuav ruaj ntseg vam meej ntxiv mus. Leej twg muaj qhov txaij qhov phem qhov dub los yuav tsum muab txhuam thiab ntxuav kom dawb huv mas thiaj tag. Thiaj hais tau tias zoo. Tsis txhob tias tsuav luag ua ib qho phem los tsis haum siab rau yus lawm ces yus yuav ua kom tau ib qho phem rov pauj rau luag. Yog yus tseem ua li ntawd pauj rov rau luag ces yus kuj yog ib tug uas phem nkaus li luag thiab ntag. Yog luag ua li ntawd rau yus, yus twb chim es yus mus ua li ntawd rau luag no luag puas chim ?
Luag yeej chim xwb! Yog sawv daws pheej ua sib pauj zoo li ntawd, ces kawg yuav tsum ciaj ua yeeb ncuab xwb thiaj tag. Thaum ntawd, yeej tsis muaj neeg qhuas tias koj zoo. Luag yeej hais tias phem sib xws. Vim li no yus yuav tsum zam me ntsis mas yog qhov zoo tshaj. Dhau ntawd, yus tsis txhob chim rau nws, yus yeej meem mus xyuas nws, pab nws, ua qhov zoo rau nws. Txog qhov kawg, nws yuav tsum ua tus thov yus thiab swb yus xwb.
Kuv tsuas tham li no pub rau sawv daws mloog xwb. Yog ho muaj tej qhov ho muab hais dhau los yog tsis zoo hais tau siab sawv daws mas thov kom sawv daws ho zam lub txim pub rau kuv thiab. Dhau ntawd ho pab kuv xav tswv yim hais ntxiv thiab qhia rau peb tsoom Hmoob sawv daws kom tig los coj lub siab ncaj ncees dawb huv thiab sib hlub sib pab nawb mog! Thov ua tsaug ntau.