HMOOB LUB SIAB TXAIJ, TSIM NYOG YUAV CHEB NTXUAV THIAB MUAB DAWS POV TSEG 3

Kuv xav tias tsoom Hmoob sawv daws cia li tseg kiag lub siab txaij siab phem siab dub siab txia ntshav ntawd. Tsis txhob cia nws faus nyob hauv yus lub cev ntaj ntsug ib zaug li! Yog leej twg muaj lub siab zoo li ntawd, yuav tsum muab cheb ntxuav los sis muab daws pov tseg tsuj nthi rau hauv qab xib taws kom mus ua av luaj. 
Hos yog leej twg pheej yuav coj lub siab ntawd, no ces nws cia li tuag nthi mus, tsis txhob ua Hmoob lawm. Thiab nws muab riam los hlais nws ib daig nqaij zuj zus seb puas mob ? Yog nws tsis hnov mob no ces li mam coj raws nws lub siab phem ntawd. Qhov no tsis yog kom peb ua ib yam num dab tsi tsis zoo. Tsuas yog xav qhia kom peb Hmoob paub sib hlub sib pab xwb. Muaj teeb meem dab tsi, yus yuav tsum nrog luag mob siab xav tswv yim nqis tes taw nyiaj txiag dag zog mus pab luag mus txhawb txhim nqa kho kom zoo. Yus yuav tsum pab kom tau raws li qhov yus muaj peev xwm pab tau.  Yog yus pom luag ua ib txoj hauj lwm phem yuam kev tsis zoo, yus tsis txhob mus pab nws ua nws yam hauj lwm ntawd. Tiam sis yus yuav tsum piav kom tau qhov phem ntawd lub ntsiab rau nws, hais nws cheem nws kom txhob ua txoj hauj lwm tsis zoo ntawd. Yog yus twb pom thiab paub tias yam hauj lwm ntawd tsis zoo, es yus ho kav liam nws, tsis hais tsis cheem mas yus kuj yog ib tug phem tshaj nws lawm. 
Nov yog piav thiab kho Hmoob lub siab phem nyob hauv lub neej tsov rog thiab kev sib hwm. Dua no lawd, peb Hmoob tseem coj tau ib tug yam ntxwv uas hais tau tias tsis zoo pes tsawg ntawd, mas yog nquag sib tsim ua plaub ntug heev. Haj tseem muab plaub ntug los hais hauv tshoob kos, thiab cov nyob pem hauv sab nyob toj siab. Nov yog tus yam ntxwv uas coj lub siab nkhaus. Kuv xav tias peb Hmoob twb txom nyem ciaj khaub thiab kob huam tag. Tsim nyog peb yuav sib hlub sib zam, pom kom deb xav kom dav, txhob ua xaiv ua lus ua plaub ua ntug. Ib leeg yuav saib ib leeg kom muaj nuj nqes, muab loj ua me, muab me ua kom tag mus. Tsis txhob sib cais ua koj pab kuv pawg.Txhob sib cib nyeej. Sawv daws yuav tsum ncaj ncees dawb huv tiag, koom tes nroos los sib pab txhim kho lub neej. Noj tshoob haus kos los ua dawb ua huv, tsis txhob yuav muab plaub ntug coj los hais tham ua nqe zuj zus. Txhob tias tsuav luag tuaj yuav yus nyuag ntxhais, tso es yus niam yuav muaj muaj plhus kwv qws mus caum luag, cem luag ua tsw quav txhi, cuag li luag tuaj nyiag yus cuab tam  deev yus poj niam. Tsuas yog peb Hmoob thiaj tseem ua txoj no xwb, luag lwm haiv neeg luag vam meej lawm, luag yeej tsis lam ua tej niag kev qias neeg no ib zaug li. (Ntxiv rau hnub tim 29/2/2020)