KEV NCHUAV ME NYUAM NYOB NYAB LAJ TEB.

Muaj ib pab neeg nyob hauv lub xeev Hais Foos nyob Nyab Laj teb nrhiav kev daws cov teeb meem nchuav me nyuam nyob hauv lub xeev Quang Ninh thiab HaiDuong. Pab neeg uas hais no, muaj xws li cov laus, cov tub ntxhais hluas, cov tub kawm ntawv uas yog cov neeg ntseeg Kav Tos Liv li ntawm 50 leej, lawv sib pab ua cov hauj lwm tiv thaiv kev nchuav me nyuam los sis ntaus me nyuam. 
Muaj li 61,000 tus me nyuam raug ntaus pov tseg nyob Nyab Laj teb, tab sis nyob hauv 61,000 tus me nyuam ntawd cov neeg uas peb hais los no pab cawm tau li ntawm 100 tawm leej lawm. 
Kev ntaus me nyuam, mas yog zoo li kev tua neeg. Tsis tas li ntawd, cov poj niam uas nquag nchuav me nyuam los sis ntaus me nyuam hauv plab, mas yuav ua teeb meem rau nws lub cev kev xeeb tub yav tom ntej. 
Pab neeg 50 leej ntawd lawv tau qhia txog teeb meem ntawm kev nchuav me nyuam thiab tiv thaiv kev nchuav me nyuam rau cov poj niam. Vim tias niaj xyoo nyob Nyab Laj teb, cov poj niam xeeb tub nchuav me nyuam ntau txhiab leej, yog los ntawm cov neeg txheej tshiab nyem no lawv xav tau me tub coob dua me ntxhais. Thaum lawv pom tias tus me nyuam xeeb nyob hauv lawv lub cev yog me ntxhais, mas thiaj lawv nrhiav kev muab ntaus kom nchuav. 
Hais txog txoj kev xav no, tsis yog tsoom pej xeem Nyab Laj xwb. Tab txawm yog cov Suav thiab peb cov Hmoob, los kuj muaj ib co xav lub tswv yim ntawd.