NYIAJ YAJ TXOJ KEV NTSEEG.

Nyob zoo cov kwv tij Hmoob, zaj lus nram no yog tus kwv tij Hmoob Nyab Laj ‘Nyiaj Yaj’ piav txog nws txoj kev ntseeg Ntuj thiab Huab Tais Ntuj li hwj huam tshwm tuaj rau nws pom. Nws piav tuaj rau peb Zoo Tswv Zov Yaj mloog thiab kom pab muab tso tawm rau sawv daws nyeem.
Nyiaj Yaj yog ib tus neeg ntseeg nyob hauv lus teem Xoos Las (Sonla), nws yog tus yau ntawm lawv 6 leej kwv tij. Thaum yav hluas mas nws mus ko taw li 7 hnub kev mus rau Moos Luj kom tau koom Thaj Txi Ntuj. tom qab no nws thiaj muab nws lub tsev los ua qhov chaw rau cov kwv tij ntseeg hauv lawv lub zos tau sib txoos teev Ntuj ua ke.
Nyiaj Yaj thiab nws poj niam nkaws tsis muaj me nyuam ces thiaj thov cov tij ib tug tub los ua nkaws ntiag tug. Tus me tub los nrog nkawd nyob tau 9 xyoos xwb ces txawm mob hnyav heev, Nyiaj Yaj thiaj coj mus cuag kws kho mob. Tus me nyuam pw hauv tsev kho mob txog thaum yuav kaj ntug, ces tus me nyuam sawv tsees thiab hais tias : Yes Xus! Tos kuv thiab os.
Nyiaj Yaj nug tus me nyuam tias : Me tub! Yes Xus nyob qhov twg?
Tus me nyuam teb tias : Yes Xus nyob ntawm no.
Thaum teb li ntawd tas ces tus me nyuam txawm cev tes los khawm Nyiaj Yaj tus poj niam txhais tes, nws hais rau nkawd tias : Kuv niam thiab kuv txiv! Kuv hlub neb mog.
Nws hais li tas ces txawm tom Nyiaj Yaj sab plhu cia. Nyiaj Yaj nkawd ob niam txiv thiaj dawj tus me nyuam qhov ncauj ntawm Nyiaj Yaj plhu, ua ciav tus me nyuam txoj sia twb tu lawm.
Nyiaj Yaj txawm xav hauv nruab siab tias : Ua cas Huab Tais Ntuj lim hiam tas npaum no, ua cas thiaj los coj yus tus me nyuam txoj sia ntawm yus xub ntiag li no.
Nyiaj Yaj xav ntxiv tias nws yuav tsis ntseeg Ntuj ntxiv lawm vim Tswv Ntuj siab dub npaum no.
Thaum coj tus me nyuam los pam raws Hmoob kab ke thiab coj mus zais tas, tag kis txawm yog Hnub Chiv ntag. Hnub ntawd cov ntseeg tuaj sib txoos tos teev Ntuj hauv Nyiaj Yaj tsev. Nyiaj Yaj tsis sawv los coj lawv li txhua hnub, mas tus yawm yij thiaj los cab nws tes tom txaj kom los nrog lawv teev Ntuj ua ke.
Hnub qaij yuav tsaus ntuj, txawm muaj ob tus kwv tij Hmoob coj ib tus neeg raug dab tuaj txog ntawm Nyiaj Yaj tsev. Tus raug dab muab ob txhais tes los pos ob lub qhov muag thiab quaj nti tsis kam nkag los hauv tsev li. Nyiaj Yaj thiaj tawm mus pab ob tus kwv tij Hmoob cab tus raug dab los hauv nws tsev.
Thaum ntawd txawm muaj ib co kwv tij Hmoob coj ib tus neeg mob plab zaj tuaj txog ntawd thiab.
Lawv sawv daws thov Nyiaj Yaj kom pab thov Ntuj rau ob tus neeg ntawd. Lawv hais li cas los Nyiaj Yaj tsis kam li, lawv txhos caug pe thov los Nyiaj Yaj lub siab yeej tsis kheev.
Nyiaj Yaj hais rau cov neeg ntawd tias nws yuav tsis thov Tswv Ntuj li lawm vim Tswv Ntuj siab dub, Tswv Ntuj nrho nws tus me nyuam ntawm nws mus lawm; nws yuav tsis ntseeg Ntuj ntxiv lawm.
Nyiaj Yaj poj niam thiaj hais rau Nyiaj Yaj tias : Kav tsij thov Ntuj pub rau ob tus neeg ntawd mas.
Li ntawd, Nyiaj Tub thiaj ua ib siab rua ncauj thov Ntuj tias : HUAB TAIS! thov koj pab ob tus neeg no kom rov zoo thiab ntshiab tuaj.
Ua ciav tus raug dab cia li tshem nws ob txhais tes ntawm nws ob lub qhov muag thiab nws qw nrov nrov tias : Ntxwg Nyoog khiav rau hauv qab xib taws lawm!
Nyiaj Yaj pom li mas nws thiaj muab dej foom hmoov zoo pub rau tus neeg ntawd haus thiab muab los pleev nws ob txhais taw, ces tus neeg ntawd rov qab qw ib suab tias : Tawm rau nraum zoov lawm!
Thaum dab phem tawm mus lawm ces Nyiaj Yaj ho muab dej foom hmoov zoo rau tus mob plab zaj haus. Txog thaum tsaus ntuj kwv yees li 7 teev ntawd mas tus neeg mob plab zaj lub plab thiaj rov nqig xws li qub lawm.
Tus raug dab piav rau lawv mloog tias tos nws npog ob sab qhov muag vim thaum lawv tuaj txog mas nws pom muaj ib lub cub tawg loj loj cig nyob hauv Nyiaj Yaj tsev, nws ntsia tsis taus li ces nws thiaj npog qhov muag cia zoo li ntawd.
Txawm Nyiaj Yaj pom Tswv Ntuj li hwj huam ntawm nws ob lub qhov muag kiag los nws lub siab yeej tsis kaj li. Nws tsuas xav tias txij no mus yuav tsis ua ib tug neeg zoo lawm, yav dhau los yus ua neeg zoo los ua cas Tswv Ntuj tsis pub ib tug me nyuam ib tug ki rau yus xws li luag lwm tus.
Xav tau li ntawd ces Nyiaj Yaj txawm coj lub neej xyaum yos hluas nkoj nrhiav niam yau li cov neeg ib ncig.
Nyob nyob muaj ib hmos, Nyiaj Yaj thiab nws poj niam tab tom noj hmov; ua ciav nws thawj diav mov txawm khuam nkaus nws caj pas. Nyiaj Yaj haus dej ntaus npaum cas los diav mov ntawd tsis poob li. Nyiaj Yaj yuav tuag tiag tiag, ces nws poj niam thiaj hu ib tus hluas Hmoob tuaj thauj Nyiaj Yaj mus rau nram tsev kho mob. 
Kws kho mob saib tas los tsis pom muaj dab tsi daig hauv Nyiaj Yaj caj pas li. Ces tus hluas Hmoob thiaj thauj Nyiaj Yaj mus nram tuam tsev kho mob. Thaum txog tog, Nyiaj Yaj yuav tuag tiag tiag; nws thiaj hais kom tus hluas txo nws nqe. Nyiaj Yaj txhos caug ntua hauv pem teb, nws tsa suab thov Ntuj tias : Huab Tais Yes Xus! Thov koj pab kuv. Huab Tais Yes Xus, kuv ua txhaum qhov twg! Thov koj pab kuv.
Nyiaj Yaj thov li ntawd tas, ces txawm muaj ib thooj mov tawm plaws hauv nws caj pas poob hlo rau ntawm nws xub ntiag.
Txij ntawd los, Nyiaj Yaj thiaj rov qab tig los ntseeg thiab tso siab rau Huab Tais Tswv Ntuj coj nws kev li yav tas los.