KEV SIB HAUM XEEB 1

Kwv tij Hmoob sawv daws ! Zoo siab ntau uas hnub no kuv rov qab tuaj ntsib nej nyob hauv Liaj Luv Xa Moo. Kuv muaj me ntsis lus yuav coj tuaj tham pub rau nej sawv daws mloog, xws li : hais txog tib neeg kev sib haum xeeb. Kev tsis sib haum xeeb, yog vim kev tsis sib qhia siab. Kev tsis sib qhia siab, vim kev tsis sib koom siab. Kev tsis sib koom siab, yog vim kev tsis sib tham. Kev tsis sib tham, thiaj muaj kev sib tawm tsam. Kev sib tawm tsam, yog kev tsis sib ntseeg siab. Kev tsis sib ntseeg siab, thiaj muaj kev sib khib siab. Kev sib khib siab, thiaj muaj kev sib hiam. Kev sib hiam, thiaj xav kom ib tug piam. Thaum ib tug piam lawm, ces yog tuag los yog ploj. Thaum ntawd, ces kawg muaj kuv tsis muaj koj. Thaum tshuav kuv xwb, kuv puas nyob tau luag ntxhi ? Kuv yeej kawg ua neej nyob tsaus ntuj nti. Vim tsis yog yeej los ntawm txoj kev hlub, hos yog yeej los ntawm kev sib ntxub. Qhov ntawd, yuav ua rau tshuav xyab tshuav xyw nyob rov tom qab, yeej tseem yuav muaj tus lawv yus qab. Ces yus kawg ua neej nyob ntshai rwg. Ua neej nyob saum yaj ceeb no, los yuav nyob tsaus ntuj nti. Txawm yuav mus nyob yeeb ceeb, los yuav tau nyob tsaus ntuj nti ib yam. Qhov yuav ua kom nyob yaj ceeb los nyob yeeb ceeb, yus tau kev nyob kaj lug, ces yog thaum peb ua neeg nyob yaj ceeb peb yuav tau ua neeg siab ncaj xwb. Ib tsoom kwv tij phooj ywg hmov thiab tshua, yog tias nej leej twg tau hnov cov lus saum no lawm, thov kom nej muab xav txhij xav txhua mog ! Peb ua neeg nyob yuav tsum muaj kev sib hwm, sib nyiam thiab sib hlub. Nyob koom zej koom zos thiaj yuav tsis muaj kev sib ntxub. Vim li cas peb thiaj xav nyob koom zej koom zos thiab nyob ua pab ua pawg ? Vim peb sawv daws ntshaw ntshaw txoj kev sib vam thiab sib pab. Thaum peb hnov lus xaiv lus ncua, peb txhob khaws los ua kev cib nyeej. Yuav sib saib sib xyuas, sib tham sib nug kom paub meej. Thaum paub meej lawm, hu ua neeg sawv daws yeej txawj yuam kev, peb yuav tsum muab daws kho kom ncaj. Xwv sawv daws thiaj yuav tau nyob ua ke thiab muaj lub siab kaj. (Nyeem ntxiv rau hnub tim 20/01/2020)

Tus sau : Yaj Faiv Ntxhos, Liaj Luv Xa Moo (2015)