KEV SIB HAUM XEEB 2

Txoj kev nyiam thiab kev hlub muaj 4 yam.
1 – Nyiam thiab hlub li kwv tij neej tsa. Txoj kev hlub kwv tij neej tsa nrog rau tsiaj txhu, nroj tsuag thiab xyoob ntoo, toj roob thiab hauv pes, yog ib txoj kev hlub zoo heev uas txhua leej txhua tus ntshaw. Txoj kev sib nyiam sib hlub no, yog ua kom sawv daws nyob tau ua ke nrog rau ib tsoom neeg ntiaj teb. Txoj kev sib hlub no, ua rau ib tsoom neeg pom tias koj nyob sov kuv qaum, kuv nyob sov koj ntiag. Nyob muaj kev sib ntseeg siab, sib tso siab thiab sib vam sib pab. Neeg txoj kev sib nyiam sib hlub nrog rau tej xyoob ntoo thiab nroj tsuag, ua kom peb sawv daws nyob tau ua ke, thiab tau kev siv xyoob ntoo nroj tsuag los pab yus. Yog neej muaj kev sib nyiam sib hlub zoo, tej me xyoob ntoo nroj tsuag tawg paj txi txiv zoo, mas peb yuav pom tias txhua yam zoo nkauj thiab zoo saib. Txoj kev nyiam kev hlub no, yog ib txog kev ua kom ntiaj teb neeg nyob thaj yeeb, nyob lom zem thiab sov siab npo. Yog tib neeg kev sib koom siab thiab tu lub ntiaj teb kom muaj txhua tsav puas yam zoo nkauj zoo saib xwb.
2 – Nyiam thiab hlub li hlub niam hlub txiv, hlub kwv hlub tij thiab hlub me tub me nyuam ntawm yus tsev neeg. Vim peb yog niam yog txiv, yog kwv yog tij, peb yog ib cuab ib yim. Peb koom poj koom yawg los, peb yuav sib nyiam sib hlub thiab txuag peb lub koob lub npe, txuag peb caj ces. Peb nyob ua zej koom zos, peb kuj yuav ua ib yam li ntawd thiab. Peb yuav nquag tsim kev sib hlub sib pab, sib hwm sib saib, kom peb txhob muaj kev sib cais thiab kev sib cib nyeej. Peb yuav tsis muaj kev sib huab noj huab haus thiab sib txhav teej tug, ces peb yuav tau nyob luag ntxhi kaj siab lug hauv peb tsoom kwv tij sawv daws.
3 – Nyiam thiab hlub raws ib nkawg niam txiv txoj kev sib hlub. Nkawd 2 leeg yuav los sib koom ua ib tug. Nkawd yuav muaj kev sib koom siab koom ntsws, koom lub cev nqaij nyob ua ke, nkawd thiaj tsheej ib cuab ib yig. Txoj kev sib hlub no, yog kev tsim noob neej thiab tu lub ntiaj teb kom vam meej mus li.
4 – Sib nyiam sib hlub xws li tus tswv tsim neeg. Peb paub tias muaj tus tswv tsim neeg thiab tsim lub ntuj lub teb los ntawm txoj kev hlub. Ces peb poj peb yawm kuj tsim peb los ntawm txoj kev hlub. Vim li ntawd, peb yuav nyiam thiab yuav hlub tas ib puas tsav yam uas peb tau pom thiab tau kov. Peb yuav tsis muab ib yam dab tsi los ib tug twg rhuav pov tseg yam tsis muaj qab hau dab tsi. Peb ua neeg nyob ntiaj teb no, yog peb tsis muaj 4 yam kev hlub li hais no, ces peb yuav zoo tus dab tsi ? Kom peb nco ntsoov tias : yam peb ntshaw thiab peb xav kom muaj, kuj yog yam luag ntshaw thiab luag xav kom muaj. Peb pom luag muaj ub muaj no, peb yuav tsis txhob muaj lub siab xav muag nyiag mus txeeb los ua peb tug. Yog sawv daws txawj sib nyiam sib hlub, sib saib sib hwm li no, ces sawv daws yuav tau nyob kaj siab lug thiab nyob thaj yeeb.

Tus sau : Yaj Faiv Ntxhos, Liaj Luv xa Moo (2015)