OB TUG THAWJ COJ TAWM TSAB NYOB THAIB TEB RAUG TSO LAWM.

Anon thiab Mike raug tso tawm nkuaj lawm. Nkawd hais tias hnub tim 19 lub 9 hli no yuav rov sib sau tawm tsam dua thiab tsis ntshai raug kaw. Ib lo lus hais ua paj lug tias : “Txhom ntses yeej yuav tsum ntub dej, yog ntshai ntub dej txhob txhom ntses”.  Txhais tias tawm tsam lawm, yeej yuav tsum raug kev kub ntxhov los sis raug ntes. Yog ntshai raug ntes, ces txhob tawm tsam. 
Cov tub ceev xwm thov thim tsab ntawv kom uas muab Anon thiab Mike nkawd kaw nkuaj, ces lub tuam tsev txiav txim tau tso Anon thiab Mike tawm nkuaj raws cov tub ceev xwm cov lus thov. 
Hnub tim 4 lub 8 hli dhau los, cov tub ceev xwm tau ntes Anon thiab Mike nkawd coj mus kaw nkuaj, tab sis hnub tim 3 lub 9 hlis no nkawd raug tso tawm los nyob ib ntus. Lub tsev txiav txim muaj txoj cai txwv tsis pub nkawd mus ua lwm yam txhaum ntxiv, los yog rov qab mus txw neeg tawm tsam khaj cai li yav tag. Ntawm Mike, mas lub tsev txiav txim soj ntsuam txog nws lub hnub nyoog, nws txoj hauj lwm thiab nws tus yam ntxwv lawm, nws yuav tsum raug txhiv nyiaj 200,000 npaj. Thiab thov kom Mike mus ceeb toom txog nws txoj kev nyob twj lij rau tub ceev xwm paub txhua txhua 15 hnub ib zaug.
Anon thiab Mike nkawd yog 2 tug ntaus thawj tseem ceeb ntawm pab neeg sib sau khaj cai. Hnub tim 18 lub 7 hli tag los, nkawd coj ib pab neeg coob coob ua kab sab tawm tsam raws cov kev tsheb nyob hauv tuam ceeb Bangkok. Thov kom cov tseem hwv tso tseg kev kav teb chaws raws txoj cai tub rog, vim tus thawj pwm tsav Thaib Prayut Chanocha yog sawv los ntawm kev siv tub rog txeeb teb chaws xyoo 2014. Vim li ntawd tsoom tub kawm ntawv thiaj sib sau tawm tsam ntiab tus thawj pwm tsav Thaib kom tawm mus, uas yog muaj Anon thiab Mike nkawd ua 2 tug thawj coj. 
Kev khaj cai tsis yog tias yuav tso tseg txij no xwb, vim niaj hnub nyem no kev tawm tsam tseem muaj tsis tseg. Ces tsis paub tias kev sib sau tawm tsam tag kis yuav xaus zoo li cas.    Hais txog txoj kev sib sau tawm tsam khaj cai nyob Bangkok, mas yog ib txog kev tawm tsam kub ntxhov loj kawg, vim ntshai tsam ua teeb meem rau tsoom pej xeem khwv noj khwv haus.