PEB NYOB RUAJ NREB HAUV TXOJ KEV NTSEEG.

(Zaj no, yog ib co lus uas Txiv Plig Txhiaj Foom tau hais rau cov ntseeg nyob USA teb. Yog lub sij hawm uas Txiv Plig Txhiaj Foom mus koom kev sib sau sab laj nyob hauv lub 7 hli xyoo 2012.)
Ua nej sawv daws tsaug ntau ntau, rau qhov tias nej tuaj sib sau ua ke nyob ntawm no coob leej. Vim nej nrog Leej Tsob Hwb Nom Vaj koom tu siab. Ces xam pom tias : nyem no mus lawm yav tom ntej, haiv neeg Hmoob yuav nyob ruaj nreb khov kho. Tsuav yog nej sib pab sib nres thiab sib nyiam sib hlub yam tsis tu ncua.
Ntawm peb cov ntseeg Kav Tos Liv, mas peb kuj saib thiab hwm Hmoob sawv daws. Nyob hauv Ntawv Moo Zoo, Huab Tais Yes Xus tau tshaj tej lo lus tseem ceeb uas tsim nyog nthuav piav me ntsis. Vam tias Tswv Ntuj Lo Lus yuav pab nej kom xwv nej rov ua siab loj siab tawv, tsis ntshai txog kev ploj kev tuag.
Kuv yuav nthuav 3 nqe lus zoo li no tias : 1 : Peb yuav tsis ua siab nqaim. 2 : Peb yuav tsum xam kom deb thiab ua siab dav fo mus li. 3 : Peb yuav nyob kaj lug thiab ua neeg thoob tsib.

1 : Peb yuav tsis ua siab nqaim.
Zoo li puag ta peb tau hnov Huab Tais Yes Xus ib lo lus tias : “Tus neeg txog kuv, tab yog nws tuag lawm, nws yuav muaj txoj sia. Leej twg muaj txoj sia thiab ntseeg txog kuv, nws yuav tsis tuag ib zaug.” Z 11 : 25 - 27 
Yog tias peb tsis ceev faj thiab peb ua siab nqaim, mas tsam peb yuav xav hais tias : nyob thoob ntiaj teb, muaj neeg coob txog ntawm 6,000 plhom leej neeg. Nyob hauv 6,000 plhom leej neeg, mas cov ntseeg txog Huab Tais Yes Xus tsuas muaj 2,000 plhom tawm leej xwb. Yam li cov Kav Tos Liv, cov Plos Tes Taas thiab cov Os Thos Dos. Dua lwm cov 4,000 plhom leej, mas yog cov tsis ntseeg txog Huab Tais Yes Xus. Yam li : cov teev hawm Mawv Xis Lim, cov teev hawm Phus Thas, cov teev hawm His Ntus thiab cov tseem coj qub kev cai. Yog peb tsis ceev faj, mas peb yuav xav tias 4,000 plhom tawm leej neeg ntawd, lawv tsis yog cov neeg ntseeg, ces lawv yuav tsis tau txais kev cawm thiab lawv yuav mus tsis tau hauv Tswv Ntuj lub Ceeb Tsheej.
Tej yam uas peb xav no, mas yog xav raws lub siab nqaim. Yog peb xav li ntawd, mas zoo li peb tej poj yawm txwv koob thiab peb cov kwv tij uas lawv xub tso lub ntiaj teb no tseg. Lawv tsis tau txais kev ntseeg, mas lawv kuj yuav tsis tau mus hauv Tswv Ntuj lub Ceeb Tsheej. Ces zoo li lawv poob mus nyob hauv dab phem cov hluav taws thiab raug txim tas mus li.
Ntau zaus, mas nej hnov tej tus neeg ntseeg, los yog lwm tus neeg sab nraud hais tias : yog nej tsis nrog peb koom taug tib txoj kev ntseeg nyob hauv peb lub Koom Txoos, mas nej yuav tsis txais kev cawm. Yog nej tsis tau txais kev cawm, mas nej kuj tsis tau mus hauv Tswv Ntuj lub Ceeb Tsheej thiab.
Tej zaum, kuj muaj tug puav xav twj ywm hauv nws siab tias : xyov Tswv Ntuj puas yuav muaj lub siab zoo cuag ntawd. Ces kuv yuav tsis txais kev ntseeg. Kuv yuav coj kuv txoj kev teev hawm qub xwb.

2 : Peb yuav tsum xam kom deb thiab ua siab dav fo mus li. 
Peb yuav qhib peb siab los txais Ntuj Lo Lus, uas yog qhov tseeb. “Peb yuav sis nyiam sis hlub, vim Tswv Ntuj yog Txoj Kev Nyiam.” 1Z 4 : 7 – 8. Nej Txiv nyob saum ntuj ua kom lub hnub tuaj ziab cov neeg phem thiab cov neeg zoo. Nws ua kom nag los rau cov neeg siab ncaj thiab cov neeg siab nkhaus huv si. (MT 5 : 45)
Txhais tias tsuas muaj ib lub hnub thiab tsuas muaj ib tug Tswv Ntuj uas pov hwm sawv daws xwb. Nws tsis xaiv neeg. Nws hlub sawv daws sib npaug zos. Yeej yog raws li tus Hauv Paus Xa Lus Paj Lug lo lus tias : “Tswv Ntuj yeej xav kom tas zeej tsoom neeg tau txais kev cawm”. (TMT 2 : 4) 
Tas ib zeej tsoom, tsis hais 1 feem 3 ntawm cov neeg nyob tas ntiaj teb.
Lub Rooj Ncauj Lus Vas Tis Kas 2 tau tshaj ib lo lus hais tias : “Cov neeg uas lawv tsis tau txais lub Moo Zoo, tsis kav Tswv Ntuj kuj pub txiaj ntsha txiaj ntsim rau lawv huv si. Leej twg txais Ntuj cov txiaj ntsim, ces nws tau coj lub neej ncaj ncees thiab nws txais tau Ntuj txoj sia. Nws kuj yuav tau txais txoj kev cawm. Vatican 2 : Declaration on the ministry to the non-Christian religions # 16.
Peb yuav xam kom deb thiab ua siab dav fo xws li Tswv Ntuj Lo Lus hais tias : “Tswv Ntuj khuv leej tas ib zeej tsoom neeg huv tib si. Nws tsis xaiv neeg. Nws faib nws tej txiaj ntsim los pub rau sawv daws sib npaug zos. Nws kuj luj sawv daws tej koob hmoov nyob hauv txoj kev haum pheej. Tswv Ntuj yog tus txiav txim ncaj ncees. Ces vam tias 2 feem 3 ntawm cov neeg nyob tas ntiaj teb kuj yuav tau txais txoj sia. 

3 : Peb yuav nyob kaj lug nyob kaj nrig thiab yuav ua neeg thoob tsib.
Hauv peb tsoom neeg ntseeg lub siab, mas peb paub tias peb tau txais Tswv Ntuj cov txiaj ntsim los pov hwm peb. Peb thiaj tau nyob kaj lug kaj nrig thiab nyob npuab Tswv Ntuj. Peb paub Huab Tais Yes Xus txoj kev nyiam thiab kev hlub uas muaj zog tas nrho. Huab Tais yog tus tseem kws tshuaj uas muaj peev xwm kho peb tej siab ntsws kom rov ntshiab dawb huv. Peb tos nrhw txog txoj sia nyob mus li, nyob pem Tswv Ntuj lub Ceeb Tsheej. Thaum txog lub caij peb muaj ib siab ob qig, mas peb thiaj tsis ntshai tsis txhawj. Peb niaj hnub cav txog Tswv Ntuj lub koob meej thiab peb zoo siab ua Tswv Ntuj tsaug tsis tseg. 
Yuav ua neeg thoob tsib.
Peb yuav tsis txhob khav tias : peb yog neeg ntseeg, peb tau txais lub Cim Ntxuav, ces peb lub siab huv dua luag tej. Yog peb xav li no, mas peb yuam kev. Nco ntsoov tias yus tsom kwm tib neeg lub siab tsis tau. Vim li ntawd, mas yus yuav tsis txhob ua neeg khav theeb.
Tus tib neeg twg uas tau txais lub Cim Ntxuav lawm, tab sis nws coj ib lub neej dog dig, coj lub neej ywj fab ywj fwj thiab tsis tsim txiaj, mas txog lub caij kawg, nws yuav tsis muaj cuab kav taij Tswv Ntuj. Nws yuav tsis muaj cuab kav hais rau Tswv Ntuj tias : “Huab Tais, kuv tau txais lub Cim Ntxuav, ces koj yuav tsum txais kuv mus nrog koj nyob.” Lub Cim Ntxuav tsis pab kom yus tau txais txoj sia thiab dim ntawm kev ua txhaum sai, yog tias yus tsis tau ua neeg zoo. Tus yuav tau mus pem Tswv Ntuj lub Ceeb Tsheej, mas yog tus coj rawv Tswv Ntuj cov lus qhia.
Cov kwv tij, peb thov kom Leej Ntuj Plig Ntshiab nqes los tshoj peb sawv daws lub siab, ces peb thiaj yuav tau txais Tswv Ntuj lub Hwj Chim nyob hauv Huab Tais Yes Xus lub npe. Peb yuav tau nyob npuab Tswv Ntuj mus txog txhiab niag tim puas xyoo. 
Tus sau : TP. Txhiaj Foom (Tseb Nplej 2012)