PEB YOG LEEJ TWG

Ua ntej no, kuv thov hawm txog peb ib tsoom Hmoob nyob rau txhua lub teb chaws thoob ntiaj teb. Zoo siab ntau uas hnub no kuv tau tuaj nrog nej sawv daws sib fim nyob rau hauv lub Koom Haum Zoo Tswv Zov Yaj.
Txuas ntxiv qhov no mus lawm tod, kuv yuav tham txog ib lo lus hais tias :  “Peb yog leej twg ?” Suav txij puag thaum ub peb Hmoob sawv daws nyob rau teb chaws tuam tshoj, peb haiv Hmoob tsuas muaj 2 yam lus Hmoob hais xwb : xws li lus Hmoob dawb thiab lus Hmoob lees. 
Tom qab uas peb haiv Hmoob tau tawg khiav ua thoj nam ntawm tuam tshoj los mus, peb haiv Hmoob nyias taus nyias nrhiav nyias kev khiav mus nyob rau ntau lub teb chaws. Yog li no peb haiv Hmoob tej lus los tej txuj ci Hmoob thiaj li tau ploj tas lawm ntau. Peb cov Hmoob feem coob tau khiav los mus nyob rau sab Nyab Laj teb thiab Los Tsuas teb. Tom qab ntawd peb kuj rov ua thoj nam khiav rau Thaib teb thiab mus rau lwm lub teb chaws. Tam sim no peb Hmoob hais kam lo lus tias “PAIS” ntau dua lo lus “MUS”. Lo lus PAIS, mas tsis yog tseem lus Hmoob, yog xyaum hais raws li lus Los Tsuas thiab lus Thaib xwb. Tsis tas li ntawd, peb kuj kheev hais kam tias pes tsawg xuab moos thiab hais tias txog moos lawm, cov lus no kuj puav leej yog lus Los Tsuas. Peb cov Hmoob uas tau mus nyob rau lub teb chaws As Mes Lis Kas, mas sawv daws twb muab lo lus “PAIS” no tso tseg lawm thiab. Sawv daws tsuas kav qhov yooj yim hais raws lus Mes Kas “GO” (Nkaus) lawm xwb.  Mes Kas hais tias GO, tab sis peb Hmoob hais tias MUS.
Yog vim li no, tsis hais nyob rau lub teb chaws twg los peb tsis tshua hais peb cov lus Hmoob lawm. Peb cov tub cov ntxhais mus hais luag lus ntau, ces peb hnov qab lus Hmoob zuj zus.

Peb hais luag xeem lus meej, tab sis peb rov hais peb cov lus Hmoob tsis meej. 

 Nyob Suav teb, muaj ib tug tub hluas Hmoob uas nws tau mus nrog cov Suav kawm txuj siab kawg thiab nws nrog Suav nyob xwb. Nws kawm hais txog kev nrhiav txuj ci thiab txhim kho. Thaum tus tub hluas Hmoob ntawd hnov tias muaj ib co kwv tij Hmoob nyob rau sab ntuj As Mes Lis Kas, mas nws xav tuaj mus nrog sawv daws sib fim thiab sib pauv txuj ci. Tab sis nws tsis nco qab lus Hmoob thiab hais lus Hmoob tsis meej lawm, ces nws thiaj rov mus kawm lus Hmoob 2 lub hlis ntxiv. Tab txawm nws hais lus Hmoob tau tsis meej, tsis kav nws kuj tseem yog ib tug me nyuam tub Hmoob. Nyem no nyob As Mes Lis Kas, mas sawv daws tsis pauv xeem, tab sis pauv npe. Muaj ib txhia muab npe Hmoob hloov ua npe Mes Kas tas lawm. Nyob rau Thaib teb, mas muaj ib txhia tsis pauv npe, tab sis pauv xeem. Ib txhia kuj pauv npe pauv xeem tas, ces saib zoo li tsis yog Hmoob lawm. Tej yam no yog ib qho pom tau tias peb tsis xav lees tias peb yog Hmoob.

"Peb tso lus Hmoob, lub xeem Hmoob thiab npe Hmoob tseg." 

Tso lub npe uas yus niam yus txiv tua qaib tua npua los tis rau yus thaum 3 tag kis pov tseg. Piv li nyob teb chaws As Mes Lis Kas, muaj ib nkawg niam txiv uas nkawd muaj 2 tug tub. Tus tub hlob nkawd muab hu ua DAVID (Dev Vim), hos tus tub yau muab hu ua DANEIL. Lo lus Daneil, mas sau ua lus Hmoob tsis tau, ces sau tias Dev Nyaum. Nkawd muab nkawd 2 tug tub hu npe Mes Kas xwb, ces cov laus hais tsis tau cov npe Mes Kas, vim cov nyom dhau. Niam pog txiv yawg niaj hnub zov nkawd 2 tug me nyuam nyob hauv tsev, thiab muab nkawd 2 tug me nyuam hu ua DEV VWM thiab DEV NYAUM tas li xwb. Qhov tiag mas tsis yog dev vwm thiab dev nyaum, tab sis vim cov laus hais tsis tau lawv cov npe Mes Kas. Tus tub thiab tus nyab hais rau niam pog txiv yawg tias : “Niam thiab txiv, wb 2 tug me nyuam tsis yog hu ua dev vwm thiab dev nyaum na”. 
Niam pog thiab txiv yawg thiaj teb tias : “Npe Hmoob twb muaj, cav tsis hu npe Hmoob. Pheej mus hu tej lub npe cov cov, ces wb 2 tug laus hu tsis yog los nej cov hluas txhob chim nawb !” Cov teeb meem no twb pib tshwm sim muaj pom tseeb zuj zus li no lawm, ces kuv xav tias 30 xyoo tom ntej no, peb Hmoob xeem lus thiab tej txuj ci kawg yuav ploj mus xwb. Cov hluas txheej tshiab nyem no sawv daws tuaj nyob lub teb chaws vam meej lawm, sawv daws tsis nco khuv xim txog Hmoob tej txuj ci kab lis kev cai. Sawv daws tsis nco txog kev poog neej poog tsav thiab kev sib tsham mus los. Sawv daws tsis nco txog kev neej kev tsav lawm. Kom peb nco ntsoov txog Txiv Plig Txhiaj Foom lo lus hais tias : “Lub hnub qub me me, loj thiab pom kev tsis cuag lub hli, tab sis peb thov kom peb txhob ua qhov pom kev ntawd ploj mus.” Kuv thov nqua hu rau peb cov Hmoob sawv daws kom peb tig los mus sib koom, tig saib seb txoj kev twg yog peb qhov chaw sib ntsib thiab yuav sib txhawb tau. Kuv pom tias Zoo Tswv Zov Yaj thiaj yog peb qhov chaw sib ntsib thiab sib fim ib txwm los. Puag thaum tseem tsis tau muaj kev siv Internet, Zoo Tswv Zov Yaj yeej ib txwm nrog Hmoob sib fim. Li ntawd, thov peb sawv daws tig los sib pab txhawb nqa lub Koom Haum Zoo Tswv Zov Yaj kom nrog peb nyob ntxiv mus. Yog tsis muaj Zoo Tswv Zov Yaj lawm, ntshe peb kev sib ntsib sib fim rau yav tom ntej kuj yuav tu mus thiab. Vim peb cov phooj ywg Hmoob sib ntsib nyob hauv Liaj Luv Xa Moo thiab Tseb Nplej muaj coob leej ntau tus. Thov peb sib pab tuav peb txoj kev phooj ywg no kom ruaj khov ntxiv mus. Yog leej twg muaj lub zoo tswv yim los sis zoo zaj yuav qhuab qhia neeg tau, mas sawv daws sib pab sau tuaj tso tawm hauv Zoo Tswv Zov Yaj. Kom Zoo Tswv Zov Yaj tau kev muab coj los tseb rau peb tsoom Hmoob sawv daws tau paub txog. Qhov kawg no txawm tias kuv tau hais tej lo lus siab leej twg lawm los kuj thov zam lub txim pub kuv thiab. Thov Huab Tais Tswv Ntuj foom koob hmoov los rau saum nej sawv daws ! Tus tau ntsib lub neej muaj kev txom nyem, los thov Tswv Ntuj pab kom nws lub neej rov zoo tuaj. Tus nyiaj tshaib yoo nqhis, los thov kom Tswv Ntuj pub txiaj ntsim rau nws, kom nws muaj noj muaj haus mus li. Cov ua ntsoj ua ntsuag, los thov Tswv Ntuj ua tus nplij siab kom lawv lub siab rov kaj thiab nyob muaj kev cia siab. Thaum twg peb tau sib ntsib, los thov peb sib tuav tes sib zeem tias peb yog kwv tij Hmoob. Vim peb tsis yog leej twg, peb yog ib tse neeg Hmoob tiag tiag. Lwm zaus peb mam ho rov sib ntsib thiab sib tham dua !

Tus sau : Vam Tsawb Yaj (Tseb Nplej 2016)