SIB NTXIV TSWV YIM

"Tib neeg muaj nuj nqis thiab zoo tshaj txhua yam nyob ntiaj teb no."

Nyob zoo ib tsoom niam txiv kwv tij neej tsa Hmoob sawv daws ! Hnub no, zoo siab ntau uas tau tuaj ntsib nej sawv daws nyob hauv tsab ntawv xov xwm Tseb Nplej. Vam tias Ntuj lub txiaj ntsim yuav nyob nrog nraim nej txhua leej txhua tus.
Muaj ib daim teb, daim teb ntawd muaj ib tug tswv saib xyuas. Thaum tus tswv tsis tau muaj tub ki. Nws nyob ib leeg, mas tas txhua yam nyob hauv daim teb ntawd, nws yog tus saib xyuas thiab tu. Nws cog qoob cog loo, cog txhua yam txhiam xws noj. Tu tsiaj txhu thiab ua tas puas tsav yam. Tab sis thaum tus tswv muaj me tub me nyuam, muaj tub muaj kiv, mas tus tswv teb tso tas daim teb rau nws cov tub ki ua tus saib xyuas thiab tu daim teb kom zoo. Ces tus tswv ua tus txhawb zog thiab pab lub tswv yim rau nws cov tub ki ua noj ua haus. Cov tub cov kiv, yog xeeb ntawm tus tswv uas yog leej txiv los. 
Lub ntiaj teb no, kuj muaj ib tug tswv ua tus kav. Tus tswv ntawm lub ntiaj teb, yog TSWV NTUJ. Thaum lub ntiaj teb tsis tau muaj dab tsi thiab tsis tau muaj tib neeg. Mas Tswv Ntuj yeej ib txwm kav lub ntiaj teb lawm. Tswv Ntuj thiaj tsim kom muaj xyoob ntoo, nrog tsuag thiab muaj txhua tsav puas yam tsiaj txhu. Thaum Tswv Ntuj tsim tau txhij txhua lawm, Tswv Ntuj thiaj tsim tib neeg los ua tus pab tu lub ntiaj teb kom zoo nkauj thiab vam meej. 
Tus tswv ntawm daim teb, nws tso nws daim teb rau nws cov tub cov kiv. Nws ua tus txhawb zog thiab pab tswv yim. Nws qhia kom nws cov tub ki txawj sib nyiam sib hlub, sib haum xeeb thiab sib pab ua noj ua haus. Tab sis muaj tej tus tub, kuj tsis mloog lawv txiv hais. Nws ua raws nws siab nyiam. Nws khav tias nws ua tau nws tus kheej, vim nws tus kheej muaj peev xwm txaus. Ces nws hnov qab nws txiv cov lus qhia. Tus tub uas tsis mloog leej txiv hais, nws yuav hais tias : leej txiv tsis hlub nws thiab tso nws pov tseg. Tab sis qhov tseeb tiag, yog nws tso nws txiv tseg, vim nws tsis mloog nws txiv cov lus. 
Tswv Ntuj tsim tib neeg los pab tu lub ntiaj teb kom vam meej thiab kav tas txhua yam tsiaj nyob hauv lub sim ceeb. Tswv Ntuj hlub txhua haiv neeg. Hlub txhua leej txhua tus. Tswv Ntuj foom hmoov zoo rau sawv daws sib npaug zos. Tab sis tib neeg hnov qab Tswv Ntuj. Tib neeg cais Tswv Ntuj, tib neeg tsis xaiv Tswv Ntuj. Ces muaj coob leej hais tias : Tswv Ntuj tso yus pov tseg. Tab sis qhov tiag, yog yus tso Tswv Ntuj tseg thiab yus tsis xaiv Tswv Ntuj xwb.
Tib neeg muaj nqis tshaj txhua yam nyob ntiaj teb no. Tswv Ntuj tso siab rau tib neeg uas yog nws cov tub ki. Txhua tsav puas yam uas Tswv Ntuj tsim los, yog qhov zoo nkauj thiab muaj txhij txhua lawm. Tab sis tib neeg tseem pab txhim kho lub ntiaj teb kom zoo nkauj thiab muaj ntau yam tshwm sim tuaj. Zim txwv no, peb pom tau tias muaj ntau pua yam uas yog tawm ntawm neeg los. Ntau zaus peb mus pom tej yam zoo, mas peb qhuas tias : ua cas yam ntawd yuav zoo nkauj ua luaj, txawv ua luaj. Tab sis tej yam ntawd, yog neeg tsim tawm los. Tsis hais dav hlau, nkoj, tsheb, vaj tse, tej toj roob hauv pes uas muaj kev tsheb zoo nkauj, muaj paj xyoob paj ntoos tawg puv ntia, tej tshuab hlwb hlau uas niaj hnub no neeg siv thc. Txhua yam no puav leej yog neeg tsim.

Txhais tau tias tib neeg muaj nqis thiab zoo tshaj tej yam uas peb pom ntawd. 

Piv li muaj ib lub tuam tsev uas nws vau lawm, yog tsis muaj neeg txhim dua tshiab, mas pes tsawg pua xyoo lub tsev ntawd kuj nyob ua ib pawg av. Tab sis yog muaj neeg rov txhim kho dua, mas yuav muaj dua ib lub tuam tsev tshiab zoo nkauj thiab siab dua tuaj. Ib lub tuam tsev vau lawm, yog muaj tib neeg txhim, mas 2-3 lub hlis xwb rov muaj dua ib lub tuam tsev tshiab. Tab sis yog ib tug neeg tuag lawm, yuav tsum tos lwm tus yug tshiab thiab tos 20 xyoo, thiaj mam rov muaj dua ib tug neeg uas thoob tsib los txhim vaj txhim tsev. Vim tias neeg tuag lawm, lub tuam tsev yuav txhim tsa neeg kom rov sawv dua tsi tau. Tab sis yog tsev vau lawm, tib neeg yuav rov txhim tau lub tshiab thiab zoo nkauj dua. 
Yog peb tso siab rau Tswv Ntuj, peb mloog Tswv Ntuj cov lus qhia, peb tsis tso Tswv Ntuj pov tseg. Mas txog hnub kawg, peb yeej yuav tau txais txoj sia tshiab thiab tau mus hauv Tswv Ntuj lub Ceeb Tsheej. Peb yuav muaj ib lub cev nqaij tshiab zoo dua peb lub cev ntaj ntsug zim txwv no. Yog tsis muaj Tswv Ntuj, mas peb ua tsis tau dab tsi. Tab sis Tswv Ntuj yog tus tsim tib neeg thiab tshuab pa pub txoj sia rau neeg. Tsis muaj ib yam dab tsi Tswv Ntuj ua tsis tau.
Thaum yus mus pom tej yam zoo nkauj thiab txawv txawv nyob tom hav zoov hav tsuag, mas yus hais tias : ib txwm ntuj tsim nws yeej xeeb los zoo li ntawd. Ces yus paub tias yam ntawd, yog Ntuj tsim. Thaum yus raug kev nyuaj siab, los ntshai dab ntshai tsov, los sis muaj mob muaj nkeeg, mas yus txawj hu txog ntuj : “Ntuj aw ! Koj pab kuv mas !” Tab sis yog yus noj qab nyob zoo, mas yus hnov qab txog Tswv Ntuj lawm. Txawm li ntawd, tsis kav nco ntsoov tias tsuas yog yus hnov qab thiab tso Tswv Ntuj tseg xwb. Tswv Ntuj niaj hnub tsom kwm yus thiab tsis tau tso yus pov tseg. Yus saib zoo li yus nyob deb thiab nrug Tswv Ntuj. Tab sis ntawm Tswv Ntuj, mas nws nyob ze yus thiab nrog nraim yus.
Lub zim txwv no, peb pom tias lub ntiaj teb vam meej. Muaj ntau yam uas peb tsis tau pom tsis tau hnov dua. Muaj ntau yam tshuab pab neeg ua hauj lwm. Ua rau cov neeg txheej tshiab nyem no, ua dab tsi los yooj yim. Txhua yam uas hais los no, yog neeg lub tswv yim tsim tawm los. Txhais tias neeg muaj nqis thiab zoo dua tej yam ntawd. Neeg lub tswv yim thoob tsib, yog Tswv Ntuj muab los.
Cov txhiam xws uas peb noj ua tshais ua hmo. Yog peb noj ib yam txhiam xws xwb, kuj tsis zoo dab tsi. Peb yuav tsum muaj ntau yam txhiam xws : xws li zaub, nqaij, kua txob thc. Tswv Ntuj pub lub tswv yim thoob tsib rau neeg, tsis yog ib txog kev thoob tsib uas zoo ib yam. Nws muaj ntau txoj kev thoob tsib, uas sib txawv. Nyias muaj nyias kev thoob tsib, nyias txawj ua nyias ib yam. 
Txhua tsav puas yam uas thaum tib neeg tshwm sim los, nws yeej muaj nyob txawm. Yog Tswv Ntuj ua tus tsim. Txhua tsav puas yam uas tawm tuaj tshiab tshiab zim txwv no, yog leej tib neeg ua tus tsim. Tswv Ntuj zoo yam li leej txiv pab txhawb zog thiab pub lub tswv yim ntse rau nws cov tub ki. Neeg lub tswv yim thoob tsib yog txhawv ntawm Tswv Ntuj los.