TSHUAJ TXHAUM KEV CAI NYOB THAIB TEB.

Hais txog kev cheb ntxuav tshuaj txhaum kev cai nyob Thaib teb hauv lub caij tus kab mob Covid-19 tab tom sib kis. Nyob Mias Mas teb muaj kev cheb ntxuav tshuaj txhaum kev cai loj kawg, ces ua rau cov tshuaj txhaum kev cai ntawd ri nkag mus rau Thaib teb ntau dua qub. Tsis ntev los no, cov tub ceev xwm nyob hauv lub xeev Surad Thani ntes tau ib lub tsheb 6 lub log thiab 3 tus neeg. Nyob hauv lub tsheb ntawd muaj 40 lub seev tsaj uas yog ntim 1,200 kis lus tshuaj nees. Pom tau tias muaj cov tshuaj txhaum kev cai nkag Thaib teb ntau dua qub thiab kev cheb ntxuav tsis yog ib qho yooj yim. Vim lub caij tus kab mob Covid-19 sib kis, mas ua rau tas ntiaj teb neeg tsis tau kev tawm mus nrhiav nyiaj, thiaj yog lub caij zoo rau cov neeg ua luam tshuaj txhaum kev cai tau zoo ua lag luam. Cov tshuaj nees uas tub ceev xwm ntes tau nyob Thaib teb feem ntau yog xa mus rau yav qab teb, npaj xuas nkoj thauj hla mus rau lwm cov teb chaws xws li Mas Les Xias teb, Is Ntos Nes Xias teb, Fis Lis Pees teb, Zis Pees teb thiab Aus Thas Lias teb. Cov tub ceev xwm Mias Mas kuj ntes tau hom tshuaj txhaum kev cai hu ua tshuaj Ice 4000 kis lus. Cov tshuaj Ice no yog npaj hla Thaib teb mus rau cov teb chaws tim 3. Vim Thaib teb muaj ciam nyob npuas av xab xeeb kaum thiab muaj tshav nkoj cua, muaj kev nruab nqhuab nruab deg uas yooj yim yuav xa tshuaj tawm mus txog rau lwm teb chaws. 
Raws li lub Leej Haum Kuj UNODC hais, mas tam sim no Thaib teb thiab cov teb chaws nyob npuas tus niam dej Naj Khoom ntsib teeb meem loj kawg los ntawm kev nyiag xa tshuaj nees. Tshuaj nees thiab tshuaj Ice zoo yam tus kab mob loj sib kis nyob hauv cov teb chaws As Xias toob fab naj.