CAIJ TOS HUAB TAIS YOG KEV VAM KHOM

Nyob hauv Lis Piam 1 Caij Tos Huab Tais, Vaj Qhia Fas Ntshis Kus hais rau ib tsoom ntseeg sawv daws tias lub caij no yog lub caij pub kev vam khom rau peb, yog kom peb muaj kev vam khom tsis tseg.

Hnub chiv tim 29 lub 11 hlis 2020 no, Vaj Qhia Fas Ntshis Kus caw cov ntseeg sawv daws coj lub neej tshiab nyob hauv lub xyoo tshiab no, Caij Tos Huab Tais yog lub caij nyoog peb yuav npaj tos Yes Xus yug los ua neeg, yog lub caij ntiaj teb neeg muaj kev vam khom.

Vaj Qhia pib lus tias tus Hauv Paus Xa Lus Paj Lug ntuas cov ntseeg hauv Kos Lis Nthos kom nco ntsoov txog kev tim ntsej tim muag nrog Huab Tais Yes Xus hauv caij ntiaj teb kawg thiab zoo siab tos txais Ntuj lub txiaj ntsim pub rau peb ua cov hauj lwm zoo nyob hauv peb thiab lwm tus.

“Peb tus Tswv Ntuj yog tus Tswv Ntuj nqes los cuag peb, peb tus Tswv Ntuj tsis ua rau peb tu siab. Peb tus Tswv Ntuj nqes los ua neeg txhiv peb. Peb tus Tswv Ntuj khob peb lub siab kom qhib tos nws.”

Vaj Qhia nco txog lub zim txwv sawv daws tab tom ntsib tus xwv txheej COVID-19 no, mas Vaj Qhia hais tias tus kuab tshuaj cawm neeg hauv zim txwv no ces yog kev tos Huab Tais vim Huab Tais Yes Xus yog peb tus cawm seej.

“Yog peb rau siab tos Huab Tais mas peb yuav ntsib kev xyiv fab thiab muaj cuab kav nyob hauv peb txoj sia tsaus ntuj nti no.”

“Caij Tos Huab Tais yog txoj kev vam khom, vim lub caij no peb thiaj paub tias Tswv Ntuj nyob hauv tib neeg lub keeb ib txwm los, Tswv Ntuj yog tus Tswv Ntuj nrog peb nyob tas mus li, thiab Tswv Ntuj yog peb tus kwv luag.” Vaj Qhia Fas Ntshis Kus ntuas sawv daws, “Tswv Ntuj tsis tso peb pov tseg, Tswv Ntuj nrog peb nyob hauv peb txoj sia, Tswv Ntuj coj peb mus raws txoj kev tseem ceeb. Thaum peb poob rau hauv qhov tsaus ntuj nti, nyob hauv plawv yis cua daj cua dub; Tswv Ntuj yuav cev tes los cawm peb.”