COV NEEG NTSEEG TSEEB LAWV XAIV KEV ZOO UA NTEJ KEV TXHAUM

Hnub chiv lis piam 26 hauv Caij Nruab Xyoos, Vaj Qhia Fas Ntshis Kus ntuas cov ntseeg txog lub neej ua neeg ntseeg tias tsis yog muaj kev npau suav thiab lub hom phiaj zoo nkauj xwb, tiam sis tsum ua tawm los rau pom tias lawv coj lub neej raws Tswv Ntuj siab nyiam thiab hlub lwm tus.
Hnub chiv tim 27 lub 9 hlis 2020, Vaj Qhia tawm los ntuas cov neeg ntseeg uas tuaj sib sau teev Ntuj nyob ntawm tshav puam hwm Leej Ntshiab Pob Zeb txog cov lus hauv Mas Tais Ntawv Moo Zoo (MT21:28-323), hais txog leej txiv hais kom ub tug tub mus ua hauj lwm hauv lub vaj txiv cawv. Tus ua ntej tsis mloog leej txiv hais, nws teb tias ‘tsis mus’ tab sis tom qab nws ras txog nws qhov txhaum ces nws mus tom lub vaj lawm.  Tus ob mas teb tias ‘kuv mam mus’, tab sis nws tsis mus.
Vaj Qhia hais rau sawv daws tias “Kev mloog lus tsis yog muaj lo tias ‘awm’ thiab ‘tsis kam’ xwb, txawm muaj tus yeeb yam ua tawm los thiab.”
Vaj Qhia Fas Ntshis Kus qhia sawv daws kom paub tias Huab Tais Tswv Ntuj xav kom peb hla kom dhau txoj cai ntawm txoj kev teev hawm uas yog peb coj nyob hauv siab xwb; peb tsum coj mus ua rau luag lwm tus pom thiab.
Huab Tais Yes Xus hais tias cov sau se thiab ntiam ntiav yuav xub tau Ntuj Ceeb Tsheej ua ntej cov Fas Lis Xais thiab cov Txwj Laus. Lo lus no tsis yog Huab Tais Yes Xus tab tom qhia kom peb ua neeg sau se los yog ua ib tug neeg txhaum. Tiam sis yog Huab Tais Yes Xus tab tom qhia peb tias Ntuj lub txiaj ntsim yuav pub rau cov neeg qhib siab thiab hloov siab tshiab los ntseeg tseeb.
“Lawv hnov Ntuj Lus ces lawv hloov siab tshiab thiab hloov lawv txoj sia.”
Vaj Qhia zeem tseeb rau sawv daws tias Huab Tais Tswv Ntuj ua siab ntev tos peb tig los yuav siab tshiab, Huab Tais Tswv Ntuj tsis tso peb tseg; txawm tias peb yuav hais rau Huab Tais Tswv Ntuj tias ‘Tsis! Kuv tsis kam hloov siab tshiab.’
Huab Tais Tswv Ntuj muab sij hawm rau peb xaiv qhov peb nyiam ywj peb siab, Huab Tais Tswv Ntuj tsis yuam peb, Huab Tais Tswv Ntuj tos rhwv kom muaj ib hnub peb hais tias ‘Ua li mas! Kuv mam yuav li koj hais.’
Thaum ntawd, Huab Tais Tswv Ntuj mam puag peb mam khawm peb cia hauv nws xub pwg. Huab Tais Tswv Ntuj mam txhab kom peb lub neej puv tuaj nyob hauv nws txoj kev khuv leej.
Yog peb ntseeg Tswv Ntuj, peb tsum ntxiv peb txoj sia kom ntev mus li, nyob hauv kev xaiv qhov zoo ua ntej qhov txhaum. Niaj hnub peb yuav xaiv qhov tseeb ua ntej qhov cuav, peb yuav nyiam lwm tus dua peb nyiam peb tus kheej.
Kawg no, Vaj Qhia thov niam Mab Liab kom pab peb hle peb lub siab tawv siab nyoos pov tseg, pab peb kom tig los yuav lub siab tshiab, lub siab yoog raws Huab Tais Yes Xus.