HUAB TAIS YES XUS NROG PEB THOV NTUJ UA KE

Nyob hauv Hnub Plaub hauv Lis Piam 30 Caij Nruab Xyoos, Vaj Qhia Fas Ntshis Kus rov qab tawm rooj tuaj ntsib ib tsoom neeg ntseeg thiab ntuas sawv daws kom nquag thov Ntuj tas txwv nyob hauv txhua lub caij.

Tim 28 lub 10 hli 2020 tas los no, Vaj Qhia Fas Nthis Kus hais rau ib zeej tsoom tias kev thov Ntuj yog kev tham txog kev nyiam nrog Leej Txiv, thiab Vaj Qhia caw sawv daws kom tig los xyaum thov Ntuj txhua lub sij hawm hauv peb txoj sia.

Vaj Qhia pib ntuas tias Huab Tais Yes Xus cov hauj lwm cawm neeg pib thaum Huab Tais Yes Xus rau Zam ua kab ke ntxuav nyob ntawm tus dej Yos Las Das.

Vaj Qhia nthuav tias cov hauv paus xa lus lawv sawv daws pom tias qhov xwm no yog ib yam tseem ceeb vim tas cov neeg tuaj cuag Zam, lawv thov Ntuj thiab tu siab rau lawv cov txhaum.

Huab Tais Yes Xus yees tawm rau sawv daws pom thawj zaug yog koom nrog lawv thov Ntuj zam lawv cov txhaum ua ke. Li ntawd, Zam thiaj tsis kam ua kab ke rau Yes Xus thiab hais tias “Kuv yog tus yuav tsum thov koj ntxuav kuv.” (MT3:14)

Tiam sis Huab Tais Yes Xus teb rau Zam tias kom nkawd ua raws txoj kev ncaj, yog ua raws Leej Txiv siab nyiam, yog ua xws li ib tug tib neeg.

Vaj Qhia hais tias Huab Tais Yes Xus tau nrog Tswv Ntuj haiv neeg lo txhaum thov Ntuj ua ke. Huab Tais Yes Xus tsis nyob tig ntug dej, tab sis nws nrog lawv tsaus tib tug dej ua ke. Li ntawd, Huab Tais Yes Xus thiaj tsis yog tus Tswv Ntuj nyob deb ntawm peb. peb pom tias Huab Tais Yes Xus ua tus ntaus thawj hauv cov neeg tu siab rau lawv li txhaum. Huab Tais Yes Xus qhib lub qhov rau cov neeg nkag mus.

Tus neeg uas xav tias Tswv Ntuj tsis nyiam nws, tus neeg uas tsis muaj cuab kav kauj ruam mus hauv lub tuam tsev teev Ntuj, tus neeg uas tsis kam thov Ntuj vim nws xav tias nws tsis tsim nyog; lawv tau pom Huab Tais Yes Xus nyob ntawm ntug dej lawm. Vim Huab Tais Yes Xus nqes los nrhiav sawv daws thiab nrog lawv ua ke.

“Huab Tais Yes Xus qhib Ntuj Ceeb Tsheej lub qhov rooj thiab kom Leej Ntuj Plig nqes los nyob saum sawv daws.” Vaj Qhia Fas Ntshis Kus hais li, “Huab Tais Yes Xus thov Ntuj nrog peb thaum peb tab tom thov Ntuj.”

Vaj Qhia hais ntxiv tias peb sawv daws yog Leej Pleev cov kwv tij nyob hauv lub Cim Ntxuav, thiab tau Leej Ntuj Plig Ntshiab ua txiaj ntsim, peb muaj cuab kav txais Yes Xus lo lus thov Ntuj nyob hauv peb kev thov Ntuj.

 Nyob hauv Huab Tais Yes Xus txoj sia, nws raug ntiaj teb iab hiam, raug kev txom nyem, raug tsim txom hnyav npaum cas los Leej Txiv tsis tso nws pov tseg. Peb sawv daws los kuj yuav tau pab tshab li ntawd ntawm Tswv Ntuj tib yam nkaud.

Thaum peb lub tswv yim tsis ua hauj lwm, thaum peb pom tias tsis muaj leej twg nrog peb thiab xws li peb txoj sia tsis muaj qab hau li, mas peb yuav thov Ntuj, ces peb yuav hnov ib lub suab hu saum Ntuj tuaj, yog lub suab nrov dua peb lub suab. Lub suab ntawd yuav hais rau peb tias peb yog Tswv Ntuj me nyuam, yog tus Tswv Ntuj nyiam, yog Leej Txiv kev hom khaj.