LUB SIAB MOS COJ PEB UA PAB UA PAWG, KEV NPAU TAWS RHUAV PEB KOM TAWG

Nyob hauv hnub plaub hauv lub lis piam tas los (19/2/2020) Vaj Qhia Fas Ntshis Kus hais txog cov muaj hmoov zoo nqe peb raws li Huab Tais Yes Xus qhia tseg, thiab Vaj Qhia thov kom cov ntseeg sawv daws hlub lwm tus thiab ua neeg muaj kev vam khom.
Huab Tais Yes Xus qhia txog cov muaj hmoov zoo nqe peb raws li sau tseg hauv Mas Tais Ntawv Moo Zoo yog : Cov tau txoj hmoov zoo yog cov siab zoo siab mos, vim lawv yuav txais lub ntiaj teb los ua lawv tug.
Vaj Qhia hais tias cov neeg coj lub siab mos thiab tsis nyiam kev sib ntaus sib ceg, mas lawv tsis muab qhov npau taws ua qhov loj.
“Leej twg los yeej coj lub siab zoo siab mos yog thaum lawv nyob tiaj nyob tus, tiam sis peb yuav ua li cas yog peb ntsib kev quab yuam los yog raug tsim txom los raug xwm txheej?”
Vaj Qhia hais tias Huab Tais Yes Xus yog piv txwv qhia txog  qhov siab zoo siab mos nyob hauv kev raug luag hiam thiab tsim txom.
Vaj Qhia txawm hais ntxiv tias Ntawv Moo Zoo siv lo lus ‘coj lub siab mos’ no rau cov neeg txom nyem thiab tsis muaj liaj av. Yog li Huab Tais Yes Xus nqe lus qhia tias cov neeg siab zoo siab mos yuav txais lub ntiaj teb los ua lawv tug, mas saib zoo nkaus yuav tsis sib dho pes tsawg. Tiam sis Huab Tais Yes Xus cog lus tias txhua yam zoo li qub. Yog lub ntiaj teb Tswv Ntuj tau cog lus tseg.
“Lub ntiaj teb tau cog lus tseg thiab yog paj tshab rau Huab Tais Ntuj haiv neeg, thiab yog lub cim loj dhau daim av.”
Vaj Qhia xaus tias nqe lus qhia no yog coj peb mus cuag peb lub tsev yog Ntuj Ceeb Tsheej.
Vaj Qhia hais txog Leej Pleev cov thwj tim uas muaj siab zoo siab mos tias “Lawv kawm txog kev tiv thaiv lawv txoj kev thaj yeeb nyab xeeb, kev npuab Tswv Ntuj, thiab Tswv Ntuj li txiaj ntsim uas yog kev khuv leej neeg, kev koom ua pab ua pawg, kev tso siab, thiab kev vam khom.”
Vaj Qhia ntuas sawv daws tias kev npau taws yog qhov rov quav ntawm kev ua siab zoo siab mos thiab kev npau taws rhuav qhov tseem ceeb ntau yam. Vaj Qhia hais ua piv txwv tias “Kev npau taws ua rau kwv tij tsis sib hais lus.”
Kawg no, Vaj Qhia rov hais tias kev ua siab mos coj peb ua pab ua pawg, kev npau taws faib peb ua ob tog. Tus neeg muaj siab mos yuav yeej lwm tus lub siab thiab yuav pab txuag kev tim phooj tim ywg cia. Vim thaum lawv chim, lawv ua siab txias tau.
“Nov yog kev ntaus phooj ywg nrog kev ua siab mos.”

Tus txhais : Muas Lauj, Zoo Tswv Zov Yaj