KEV PAUB RIS TXIAJ NTSIM TXHIM KHO NTIAJ TEB KOM ROV ZOO TUAJ

Tim 30 lub 12 hlis xyoo 2020 tas los yog hnub Vaj Qhia Fas Ntshis Kus rov tawm rooj tuaj muab lus ntuas ib zeej tsoom dua, hnub no mas Vaj Qhia hais txog kev ris txiaj ntsim nyob hauv kev thov Ntuj tias yuav pab txhim kho lub ntiaj teb kom zoo tuaj thiab yog yam coj kev vam khom tuaj.

Vaj Qhia xav kom sawv daws to taub zoo mas Vaj Qhia thiaj muab zaj Huab Tais Yes Xus kho 10 tus neeg mob ruas hauv Lus Kas Ntawv Moo Zoo coj los ua piv txwv. Vaj Qhia hais tias lawv mob ruas thiab raug zeej tsoom muab feeb tawm rau lwm qhov, tiam sis Huab Tais Yes Xus tsis cais lawv, Huab Tais Yes Xus khawm lawv thiab kho lawv kom rov huv tuaj. Thaum lawv rov zoo lawm, Huab Tais Yes Xus hais kom lawv mus thws lawv lub cev rau cov Leej Choj saib, kom lawv rov tau los nyob saw ib zeej tsoom. Lus Kas Ntawv Moo Zoo hais tias 10 leej ntawd tsuas muaj tib tug xwb thiaj tig los ua Huab Tais Yes Xus tsaug thiab cav lus zoo txog Tswv Ntuj. Tus neeg no yog cov Xas Mas Lias uas haiv His Xas Lais tsis nyiam. Huab Tais Yes Xus thiaj hais tias: Ua cas tsuas muaj tus qhua no xwb thiaj rov los cav txog Tswv Ntuj? (LK17:18)

Vaj Qhia hais ntxiv tias nyob hauv ziaj no mas lub ntiaj teb faib ua 2 fab, yog fab muaj ib co paub ua tsaug thiab lwm fab yog tsis nco txog lwm tus lub txiaj ntsim. Cov neeg paub ris lwm tus txiaj ntsim, mas lawv saib tam li lawv txhuav lwm tus li nuj nqis thiab lawv txaus siab txais tej txiaj ntsig ntawd ua lawv li txiaj ntsim.

Vaj Qhia ntuas li no “Txhua yam xwv txheej thiab txhua yam muaj qab hau muaj cuab kav txia ua kev ua Ntuj tsaug tau.” Li ntawd, Vaj Qhia thiaj hais tias lo lus thov Ntuj ua Ntuj tsaug thiaj yuav tsum ras ntsoov tias lub txiaj ntsim ua peb ntej. “Peb twb paub xav ua ntej peb mam tau kawm txog kev xav; peb twb paub hlub lwm tus ua ntej peb yuav tau kawm txog kev sib hlub; peb twb xav tau ua ntej peb lub siab yuav paub ntshaw. Yog peb saib peb lub neej li hais no, peb yuav pom tias lo ‘ua tsaug’ yuav yog lo lus txhawb peb nyob hauv hnub no.”

Vaj Qhia nthuav lo lus ‘Thaj txi Ntuj’ tias yog los ntawm lo lus tias ‘Ua tsaug’. Yog li cov ntseeg sawv daws thiaj yuav cav txog Tswv Ntuj uas tau pub cov txiaj ntsim muaj txoj sia no rau peb.

Tib neeg yug los vim muaj tus xav kom muaj txoj sia. Yam no thiaj yog thawj yam nuj nqis nyob hauv peb kev ua neej. Nuj nqis no yog ‘lub txiaj ntsim’. Tom qab ntawd, Tswv Ntuj tau saib xyuas peb nyob hauv nws ob lub qhov muag. Qhov nuj qhis no yog ‘kev ua phooj ua ywg’. Yog yam peb tsum tau ua tsaug.

Kev ris txiaj ntsim yuav ntau zuj zus tuaj thaum peb ntsib Huab Tais Yes Xus. Huab Tais Yes Xus qhia peb xyiv fab thiab cav txog Tswv Ntuj nyob hauv lwm tus. Peb raug hu los koom qhov kev zoo siab hom khaj no ib yam li cov neeg mob ruas rov tau kev xyiv fab thaum lawv rov huv tuaj.

“Lawv ntsib Huab Tais Yes Xus ces lawv rov huv tuaj, lawv zoo siab; tab sis tsuas muaj tib tug xwb thiaj tau kev xyiv fab ntxiv. Tus ntawd xyiv fab hom khaj thaum nws ntsib Huab Tais Yes Xus thiab ziag no nws yog tus tau txais kev hlub lawm. Qhov no yog yam Txiv xav qhia rau nej hauv hnub no.” Vaj Qhia ntuas “Txiv xav kom nej sawv daws zoo siab thaum nej tau ntsib Huab Tais Yes Xus, thiab nej yuav tsis txhob hnov qab ua Tswv Ntuj tsaug. Yog peb paub ris paub pauj lwm tus txiaj ntsim, txawm me me xwb los, yeej yuav ua rau lub ntiaj teb no zoo tuaj thiab kuj yuav coj kev vam khom tuaj txog rau lub ntiaj teb no.”