KEV SAIB XYUAS COV NEEG MOB TSIS YOG LWM TXOJ HAUJ LWM

Hnub Chiv tim 7 lub 2 hlis 2021 no, tseem hwv Is Tas Lias tso cai rau ib zeej tsoom tawm hauv vaj tse tuaj mloog Vaj Qhia Fas Ntshis Kus cov lus nthuav Ntawv Moo Zoo hauv tsav puam hwm Leej Ntshiab Pob Zeb dua, Vaj Qhia Fas Ntshis Kus thiaj rov xav thiab nthuav xog Huab Tais Yes Xus txoj hauj lwm kho Pob Zeb niam tais.

Tus Hauv Paus Xa Lus Mas Kos sau tias Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv. (MK1:31)

Nyob hauv nqe no, yuav pom tias tus neeg tau kev cawm yuav rov zoo tuaj, nws yuav nco txog lwm tus, tsis yog nco txog nws tus kheej. Vaj Qhia thiaj hais tias “Yam no yog lub cim ntawm kev tsis muaj mob nkees tseeb tiag.”

Ntawv Moo Zoo piav ntxiv tias: Yav tsaus ntuj, sawv daws coj tas nrho cov neeg mob thiab cov raug dab huv si tuaj rau Yes Xus. (MK1:32)

Vaj Qhia ntuas tias Huab Tais Yes Xus qhia txog nws lub siab nyiam xav cawm cov neeg mob nkees sab ntsuj plig thiab cev nqaij. Qhov xwm no yog Leej Txiv qhov kev nyiam, nws thiaj xa Huab Tais Yes Xus nqes los ua neeg.

Huab Tais Yes Xus cov thwj tim zeem tseeb txog Huab Tais Yes Xus cov hwj huam, txawm li ntawd los Huab Tais Yes Xus tsis xav kom nws cov thwj tim yog cov pom, cov saib nws ua hwj huam xwb, Huab Tais Yes  Xus  caw lawv los muaj feem xyuam nyob hauv txoj hauj lwm cawm neeg. Huab Tais Yes Xus thiaj pub lub hwj huam kho cov neeg mob thiab ntiab dab rau cov thwj tim.

Yog vim li no, kev saib xyuas cov neeg mob nkees thiaj tsis yog lwm txoj hauj lwm nyob hauv lub Koom Txoos, tiam sis yog txoj hauj lwm tseem ceeb xws li lo lus tias “Coj Tswv Ntuj lub siab hlub mos nyoos mus kom txog ntiaj teb neeg cov mob nkees.”

Vaj Qhia txhab ntxiv tias lo lus no yog lub ntsiab hauv ‘Hnub Cov Neeg Mob Nkees’, uas yog hnub tim 11 lub 2 hlis tom ntej no.

Koom Txoos mob siab rau kev saib xyuas cov neeg mob, vim yog lub Koom Txoos ib txoj hauj lwm tseem ceeb. Ziag no ntiaj teb tab tom kub ntxhov vim kev sib kis ntawm tus sab foob.

Vaj Qhia hais tias Huab Tais Yes Xus tsis tau teb rau peb txog kev muaj mob muaj nkees. Tiam sis Huab Tais Yes Xus qhia peb txog kev hlub lwm tus, Huab Tais Yes Xus tuav tus neeg mob txhais tes thiab tsa nws sawv. Tswv Ntuj Leej Tub tsis ua xws li nws yog ib tug vaj nyob siab los yog ib tug nom nyob deb. Huab Tais Yes Xus ua ib tug neeg nyob ze peb, hlub peb mos nyoos, thiab khuv leej peb.

Vaj Qhia Fas Ntshis Kus xaus nws cov lus nthuav Ntawv Moo Zoo hauv hnub no tias Huab Tais Yes Xus kev khuv leej cov neeg txom nyem yog los ntawm kev khaub zig Leej Txiv. Peb paub li ntawd, vim Huab Tais Yes Xus sawv thaum tsis tau kaj ntug, mus thov Ntuj tom ib qho chaw xu kev. Huab Tais Yes Xus thov kom Leej Txiv Tswv Ntuj pub lub zog rau nws ua txoj hauj lwm tshaj lub Moo Zoo thiab kho tib neeg.