KEV TSIM TXOM YOG COV PA YUG COV NTSEEG TXOJ SIA

Nyob hauv hnub tim 11 lub 12 hlis tas los no Vaj Qhia ntuas cov ntseeg sawv daws tias niaj hnub no cov ntseeg txawm raug quab yuam thiab hiam tas mus li, qhov no yog txiaj ntsim Ntuj pub rau peb kom ua tim khawv txog txoj kev tsim txom.
Vaj Qhia Fas Ntshis Kus kom peb nco txog Leej Ntshiab Paj Lug txoj kev tshaj lub Moo Zoo raws li sau tseg cia hauv ntawv Hauj Lwm. Paj Lug yog tus hauv paus xa lus kub siab tshaj Moo Zoo rau neeg lwm xeem lus, lwm txoj kev teev hawm thiab Paj Lug tseem ua tim khawv txog kev tsim txom thiab.
Thaum Paj Lug tuaj txog Yes Lus Xas Les, Paj Lug pom tias cov ntseeg ntxub nws vim nws yog ib tus neeg hiam thiab tsim txom cov ntseeg. Thaum Paj Lug hloov siab tshiab los tshaj lub Moo Zoo lawm los, Paj Lug tseem raug lwm tus ntes xa mus rau qhov txhia chaw.
Vaj Qhia Fas Ntshis Kus hais kom sawv daws xav txog ib yam uas Paj Lug thiab Huab Tais Yes Xus muaj zoo tib yam. Nkawd raug tsoom sid hiam thiab nkawd tsis muaj hwj chim nyob hauv cov neeg Los Mas txhais tes. Paj Lug raug zoo nrog Huab Tais Yes Xus kev hlub tshua thiab Huab Tais Yes Xus kev hlub tshua yog lub Moo Zoo.
Vaj Qhia rov hais ntxiv tias niaj hnub no cov ntseeg ntsib kev hiam, kev tsim txom kom Leej Pleev muaj qab hau. Vaj Qhia piav tias “Hnub no, nyob hauv lub ntiaj teb no, hauv Aws Los Pas teb no; cov ntseeg raug tsim txom tab sis lawv muab lawv txoj sia rau txoj kev ntseeg, los yog lawv raug lwm tus tso pov tseg raws ntug zos. Kev tsim txom no yog cov pa yug cov ntseeg txoj sia, yog cov ntseeg ib zej zos.”
Vaj Qhia txhawb sawv daws siab tias “Tab sis yuav muaj cov ua tim khawv nyob hauv lawv : yog lub cim qhia tias peb tab tom taug Huab Tais Yes Xus txoj kev. Yog Ntuj txiaj ntsim nyob hauv Ntuj cov neeg tias yuav muaj tus ua tim khawv txog kev tsim txom.”
Vaj Qhia hais tias Paj Lug cov lus piav rau tus Vaj As Nkis Pas tim Ob yog zeeb tseeb txog txoj kev ntseeg. Paj Lug piav txog nws kev hloov siab tshiab thiab piav tias Huab Tais Yes Xus kom Paj Lug ua hauj lwm li cas. Paj Lug qhia kom tus Vaj As Nkis Pas paub tias cov Yaj Saub thiab Mais Xes hais txog Huab Tais Yes Xus kev raug tsim txom thiab sawv rov los zoo li cas. Leej Pleev yuav yog tus coj qhov pom kev tuaj cuag cov His Xas Lais thiab neeg lwm xeem lus li cas. Paj Lug cov lus raug tus Vaj siab, tus vaj thiaj hais tias : Koj xav haub kuv kom kuv los ua ib tug Pleev sai sai.
Yog li tus Vaj thiaj hais rau sawv daws tias Paj Lug tsis muaj txhaum, tab sis yuav tso Paj Lug mus tsis tau vim Paj Lug hu txog Xes Ntxas; mas yuav tsum coj Paj Lug mus Los Mas.
Vaj Qhia rov hais tias Paj Lug raug lawv muab saw hlau khi kom ua tim khawv txog lub Moo Zoo thiab zeem tseeb txog kev sawv rov los raws li Vaj Qhia Npes Nes Dis tim 16 tau hais tias Paj Lug txoj kev ntseeg tsis yog kev twv los kev xav txog Tswv Ntuj thiab ntiaj teb, tab sis yog Tswv Ntuj txoj kev hlub nyob hauv nws siab thiab yog nws txoj kev nyiam Huab Tais Yes Xus.
Kawg no, Vaj Qhia Fas Ntshis Kus thov kom sawv daws thov Ntuj khuv leej lawv nyob hauv txoj kev ntseeg, nyob hauv kev raug ntxias; kom sawv daws ntsia kev ntxias no raws li txoj kev ntseeg ntsia thiab kom lawv ncaj ncees rau lawv txoj hauj lwm.

Tus txhais : Muas Lauj, Zoo Tswv Zov Yaj