LEEJ NTUJ PLIG KOM PEB MUS TSOB HWB LWM TUS

Hnub Plaub tas los no Vaj Qhia Fas Ntshis Kus rov xav txog lub Koom Txoos nyob hauv tiam ib mas pom tias lawv ua neej nyob hauv kev thov Ntuj tsis tseg, pom tias cov ntseeg sib txoos thov Ntuj ua ke.

Tim 25 lub 11 hlis 2020, yog Hnub Plaub hauv Lis Piam 34 Caij Nruab Xyoos, Leej Txiv Ntshiab nthuav txog Leej Ntshiab Lus Kas 4 tus xeeb ceem rau sawv daws yog : Mloog cov Hauv Paus Xa Lus li lus ntuas, nyiam nrhiav kev kwv kev tij, ntais lub ncuav mov mog uas yog Yes Xus lub cev, thiab nquag thov Ntuj tsis tseg.

Vaj Qhia hais tias tus neeg twg muaj 4 tug xeeb ceem li hais no, mas txhais tias Leej Ntuj Plig nyob hauv nws.

Vaj Qhia Fas Ntshis Kus hais tias yog peb nyeem phau ntawv Hauj Lwm, mas peb yuav pom tias kev sib txoos teev Ntuj ua ke yog lub zog txhawb kev tshaj lub Moo Zoo.

“Txiv xav hais rau nej tias nyob hauv kev thov Ntuj mas nej tus plig yuav ntsib Leej Pleev.”

Vaj Qhia nthuav nws lo lus no raws li lub Koom Txoos lo lus qhia tias “Thaum peb thov Ntuj, mas Leej Ntuj Plig Ntshiab ua kom Leej Pleev lub tswv yim tseem muaj txoj sia nyob hauv nws lub Koom Txoos, coj lub Koom Txoos mus raws qhov tseeb thiab yam paub tsis txog ntsuas tsis tau hauv Leej Pleev li hauj lwm hauv lub Koom Txoos, hauv cov Cim Ntshiab thiab hauv cov kab xwm. Txhais tias Leej Ntuj Plig txoj hauj lwm yog ua kom peb rov ras txog Huab Tais Yes Xus. Vim li no mas Leej Ntuj Plig thiaj niaj hnub txhawb lub Koom Txoos kom tawm mus tsob hwb lwm tus xws li Huab Tais Yes Xus tus lwj lw.”

“Cov ntseeg sawv daws xyiv fab nyob hauv Tswv Ntuj txoj kev nyiam lawm, mas tsum coj mus faib rau lwm tus thiab vim Tswv Ntuj yog sawv daws tus Tswv Ntuj.” Vaj Qhia ntuas “Nyob hauv Huab Tais Yes Xus, mas cov ntsa zeb cai peb sawv daws twb pob tag lawm.”

Tswv Ntuj nyiam peb, thiab Tswv Ntuj xav kom peb cev kev nyiam uas yog peb tus cag hauv kev ntseeg rov qab rau Tswv Ntuj. Cov ntseeg txheej thaud ua li cas mas peb cov ntseeg nyem no kuj yuav ua li ntawd, peb yuav thov Ntuj kom peb tau coj lub neej xws li lawv.

“Yog peb ua li hais mas peb yuav hais tau tias : ‘Kuv muaj txoj sia nyob hauv kuv lub cev, tab sis kuv ua neej nyob hauv txoj kev ntseeg txog Tswv Ntuj Leej Tub, uas nws nyiam kuv, ces nws rov muab nws rau luag, kom nws pab tau kuv.’ (NLT2:20)”