LUB SIAB HUV YUAV POM TSWV NTUJ

Nyob hauv Hnub Plaub hauv Lis Piam tas los, ncaj rau hnub tim 1 lub 4 hlis; Vaj Qhia rov piav txog cov tau txoj Hmoov Zoo qib 6 tias : Cov tau txoj hmoov zoo yog cov siab huv, vim lawv yuav pom Tswv Ntuj. (MT 5: 8)
Vaj Qhia pib ntuas tias : Tus neeg nyiam nrhiav Tswv Ntuj, mas nws vam txog kev sib raug zoo nrog Tswv Ntuj.
Zoo xws li ob tug thwj tim taug kev mus Es Mas Ws, nkawd tsis pom vim nkawd lub siab ruam thiab ntseeg qeeb. (LK 24 : 25) Tab sis thaum kawg, Huab Tais Yes Xus qhib nkawd qhov muag thaum nws muab lub ncuav mov los ntais.
“Qhov no yog kev thoob tsib hauv txoj hmoov zoo no.” Vaj Qhia hais, “Kom peb soj ntsuam tau, mas peb yuav ntsia qhov tob hauv peb siab thiab txhim ib qho chaw rau Tswv Ntuj nyob hauv peb nruab siab.”
Tsis yog peb hloov lub tsom qhov muag tshiab los yog hloov thaj chaw tshiab ces peb yuav pom Tswv Ntuj. Tiam sis yog peb tso peb lub siab kom dim ntawm peb qhov kev ntxias kev dag peb tus kheej. Thaum peb nkag siab tias tus yeeb ncuab muaj hwj chim loj uas yog peb cov txhaum nkaum nyob hauv peb lub siab, mas peb yuav tawm tsam tus yeeb ncuab ntawd.
Kom peb nkag siab tias ‘lub siab huv’ yog dab tsi, mas peb yuav tsum nco ntsoov tias nyob hauv Ntawv Ntshiab sau tseg tias ‘lub siab tsis yog paub mob xwb, tiam sis lub siab tseem yog yam nyob ze tib neeg tshaj plaws : yog qhov chaw qhia txog tus neeg ntawd tus cuj pwm thiab.’
Tus neeg muaj lub siab huv tsis yog yug los zoo li ntawd. Lawv coj tus, paub tshem kev txhaum tawm hauv lawv siab mus. Ntawv Ntshiab hais tias yam ntawd yog ‘lub cim txiav nyob hauv nruab siab’, yog yam ua kom sab hauv ntshiab, yog yam peb lees tias peb lub siab poob rau txoj kev txhaum. Yam no pab kom peb tau Leej Ntuj Plig Ntshiab taw peb kev, kom peb lub siab pom Tswv Ntuj.
Vaj Qhia hais tias yam no ua rau peb pom tias peb yuav muaj kev xyiv fab nyob saud Ntuj Ceeb Tsheej. Tsis tas li ntawd, Vaj Qhia hais ntxiv tias kev pom Tswv Ntuj yog kev xyuam xim rau yam tshwm nyob hauv peb, nco ntsoov tias muaj Huab Tais Tswv Ntuj nyob hauv cov Cim, nyob hauv peb cov kwv tij, nyob hauv cov quaj ntsuag thiab ntsib kev txom nyem, thiab lees txais Huab Tais Tswv Ntuj nyob hauv cov xwm ntawd.
Txoj kev cawm pib hauv txoj hmoov zoo no. Txoj kev no yog Leej Ntuj Plig Ntshiab txoj hauj lwm, yog Tswv Ntuj txoj hauj lwm; yog peb txhim ib qho chaw rau Tswv Ntuj los nyob.
Yog li Vaj Qhia Fas Ntshis Kus thiaj xaus cov lus ntuas hauv hnub no tias : Peb txhob ntshai, peb yuav qhib peb lub siab to txais Leej Ntuj Plig Ntshiab los ntxuav peb lub siab kom huv thiab coj peb taug txoj kev xyiv fab thiab kaj siab no mus.