NKAUJ PAJ NRUAG QHIA KOM PEB NYIAM TSWV NTUJ THIAB LWM TUS

Hnub Plaub hauv Lis Piam 29 Caij Nruab Xyoos, Vaj Qhia Fas Ntshis Kus rov tawm rooj tuaj ntsib cov ntseeg thiab nthuav Ntawv Nkauj Paj Nruag rau ib zeej tsoom tias cov nkauj paj nruag pab kom peb ntsia qhov tseeb raws li Tswv Ntuj lub qhov muag pom.

Hnub tim 21 lub 10 hli 2020, thaum Vaj Qhia Fas Ntshis Kus tab tom pib hais nws cov lus txawm muaj ib tug me nyuam lub suab quaj, ces leej niam thiaj puag tus me nyuam cia hauv nws hauv siab. Vaj Qhia pom li ntawd, nws thiaj hais tias Tswv Ntuj ua rau peb tib yam li tus niam ntawd. Tswv Ntuj hlub peb mos nyoos li leej niam hlub nws tus me nyuam.

“Thaum cov me nyuam tsa suab quaj nyob hauv lub Koom Txoos, mas nej txhob kaw lawv lub ncauj vim lub suab ntawd ntxim Tswv Ntuj lub siab hlub mob nyoos.”

Vaj Qhia rov pib ntuas sawv daws tias Ntawv Nkauj Paj Nruag pab peb kom txhob poob rau tus neeg phem txoj kev ntxias tias tsis muaj Tswv Ntuj.

Cov lus hauv Nkauj Paj Nruag yog qhov tseeb hauv peb txoj sia, vim tau hais txog qhov tseeb tiag loj dua lub sim ceeb, qhov ntawd yog ‘kev hwm Tswv Ntuj’, ua rau peb yog ib tug tib neeg tsis muaj chaw xyeej. Vaj Qhia hais ntxiv tias kev thov Ntuj pab kom peb tsis ua lub neej lwg noj lwg haus tej tsiaj txhu thiab tib neeg.

Peb txhob thov Ntuj yuam kev. Tus neeg thov Ntuj yuam kev mas nws thov kom tau kev qhuas ntawm lwm tus. Huab Tais Yes Xus ntuas peb kom ras tias lub ntsiab hauv kev thov Ntuj yog kom peb tau xav tau soj ntsuam qhov tseeb xws li Tswv Ntuj pom.

Peb txhob lam thov ntawm ncauj xws li cov noog leeb nkaub hais, tiam sis peb tsum thov tawm hauv nruab siab los. Thaum peb thov Ntuj, peb yuav saib peb cov kwv tij, nkauj muam los yog peb cov yeeb ncuab lawv tseem ceeb rau peb. Vim tus neeg nyiam Tswv Ntuj tsum hlub Tswv Ntuj cov me nyuam, tus neeg hwm Tswv Ntuj tsum hwm tib neeg thiab.

Peb txhob muab kev thov Ntuj los ua tshuaj cawm peb qhov kev ntxhov siab, vim cov ntseeg txoj kev thov Ntuj tsis yog li ntawd. Cov neeg ntseeg kev thov Ntuj yog kom lawv paub lis lawv tes dej num raws li peb pom nyob hauv zaj ‘Peb Txiv’ uas Huab Tais Yes Xus qhia cov thwj tim.

Peb pom tias kev thov Ntuj mas thov ib leeg xwb kuj tau, los yog sawv daws yuav sib txoos los thov ua ke los yeej tau.

Kev thov Ntuj muaj txoj sia thiab yog tus choj tuam ntawm Tswv Ntuj lub tuam tsev thiab niaj teb. Li ntawd peb thiaj pom tias cov lus thov Ntuj hauv Nkauj Paj Nruag thiaj hais txog ntiaj teb. Nkauj Paj Nruag qhia txog Tswv Ntuj cov lus cog cia tias nws yuav cawm cov neeg me thiab ntuas kom sawv daws ceev faj txoj kev nplua nuj nyob ntiaj teb.

Qhov twg muaj Tswv Ntuj, qhov ntawd muaj tib neeg. Vim Tswv Ntuj twb xub nyiam peb ua ntej lawm.

Vaj Qhia Fas Ntshis Kus muab lo lus hauv Zam tsab ntawv los hais ntuas sawv daws tias “Yog muaj ib tug hais tias : Kuv nyiam Tswv Ntuj, tab sis nws ntxub nws tus kwv, mas nws yog ib tug neeg dag. Tus tsis nyiam nws tus kwv uas qhov muag pom tau, mas nws nyiam tsis tau Tswv Ntuj uas nws qhov muag tsis pom.” (1Z4:20)

Vaj Qhia rov hais tias Tswv Ntuj tsis xav kom peb ua ib tug neeg tsis hwm Ntuj. tswv Ntuj tsis xav tau tus neeg ntseeg txog Tswv Ntuj tab sis nws ntxub luag lwm tus.

Kawg no Vaj Qhia thiaj xaus lus rau sawv daws tias Ntawv Nkauj Paj Nruag mas yog ib phau ntawv pab kom peb txhob poob rau dab phem txoj kev ntxias. Mas peb yuav nquag thau los nyeem mog.