NPAJ KOM TXHIJ TOS TSWV NTUJ TUAJ

Hnub Chiv tas los no Vaj Qhia Fas Ntshis Kus ntuas cov ntseeg tias peb tsum ua cov hauj lwm zoo txhua hnub yog qhov peb npaj kom txhij kom txhua tos mus koom Tswv Ntuj pluas qav muaj txoj sia nyob mus li.

Tim 8 lub 11 hlis tas los no yog hnub chiv hauv Lis Piam 32 Caij Nruab Xyoos, Vaj Qhia Fas Ntshis Kus rov nthuav Ntawv Moo Zoo rau ib zeej tsoom raws li Mas Tais Ntawv Moo Zoo (MT25:1-13) zaj cov niam txais ntsuab tos nraug vauv tuaj ua tshoob. Vaj Qhia hais tias nyob rau tiam thaum ub mas lawv ua tshoob thaum tsaus ntuj, yog li lawv thiaj yuav tsum taws teeb kom ci ntsa iab. Nyob hauv Huab Tais Yes Xus zaj paj lug yuav pom tias muaj 5 leej ntxhais ruam, lawv tsis npaj cov roj ntim teeb. Muaj 5 leeg xyuam xim npaj roj cia taws teeb. Cov ruam lawv tawm mus muas roj ces thaum nraug vauv tuaj txog, lawv thiaj tsis tau chaws mus koom rooj tshoob.

“Huab Tais Yes Xus tab tom qhia peb kom npaj txhij npaj txhua tos nws rov qab los.” Vaj Qhia pib ntuas, “Peb txoj kev ntseeg yog lub teeb, cov hauj lwm tsim koob hmoov yog cov roj sam peb lub teeb kom ci ntsa.”

Nyob hauv zaj nyeem no peb pom tias cov ntxhais xyuam xim lawv ntim cov roj rau hauv lub hwj coj nrog lawv mus txhais tias lawv koom tes nrog Ntuj lub txiaj ntsim ua cov hauj lwm zoo.

Peb sawv daws los yuav ua ib yam li ntawd, koom tes nrog peb tus Huab Tais ziag no kiag thiab tsim koob hmoov nyob hauv Tswv Ntuj txoj kev nyiam.

Vim peb tsis nco txog peb lub hom phiaj hauv kev muaj txoj sia ces peb thiaj tsis muaj kev cia siab. Sawv daws ua zoo li lawv tsis ncaim lwm tus mus li. Lawv tsuas xav tau yam ub yam no los ua lawv tug, nyias xav txog nyias tus kheej xwb.

Yog peb tso rau yam tsis muaj qab hau coj peb, yog peb nrhiav txiaj ntsim rau peb xwb, peb tsis ntim cov roj taws peb lub teeb, ces peb lub teeb yuav tuag ua ntej Huab Tais tuaj txog.

Yog peb zov hmo thiab tsim koob hmoov tas txwv, txawm tias Huab Tais tuaj thaum peb tab tom tshaug zog los peb yuav tsis ntxov siab vim peb tau npaj cov roj sam peb lub teeb cia lawm, cov roj ntawd yog peb cov koob hmoov, yog kev ua cov hauj lwm zoo.