PEB SAWV DAWS TSUM MUS UA KE

Tim 23 lub 9 hlis no, Vaj Qhia rov tawm rooj tuaj ntsib cov neeg ntseeg sawv daws thiab ntuas lawv. Vaj Qhia Fas Ntshis Kus hais tias peb sawv daws raug hu los txais ib leeg ib txoj hauj lwm, thiab peb tsum taug txoj kab xwm hwm neeg lub tsim.
Vaj Qhia xav kom sawv daws to taub txog lo lus no, ces Vaj Qhia thiaj muab xwv txheej lag luam qaug thoob ntiaj teb hauv xyoo 1929 los ua piv txwv; thaum ntawd mas Vaj Qhia Pis Os tim 11 tau ntuas ntiaj teb tias qhov xwv txheej no yog muaj 2 yam : qaug saud los rau hauv thiab puas hauv nce mus rau saud.
Vaj Qhia tias yog peb tig los ntsia ntiaj teb teeb meem ziag no, mas peb yuav tsum paub hwm neeg kev twj lij thiab neeg lub peev xwm. 
“Peb tsum tso cai rau sawv daws sib pab txhawb nqa, sib pab cawm ntiaj teb raws li nyias txoj hauj lwm.”
Tos Vaj Qhia Fas Ntshis Kus hais li no los vim muaj ntau haiv neeg nyob ntau thaj tsam raug kev lag luam, raug tsab cai muab lawv cai cia, ces lawv tsis muaj cuab kav ua hauj lwm pab tau sawv daws los yog lawv tsis muaj kev twj lij nthuav lawv txoj kev ntseeg thiab lawv lub txiaj ntsim rau lwm tus. 
Vim li ntawd, mas Vaj Qhia thiaj hais tias tsim nyog cov nom tswv los tseem hwv tswj teb chaws tsum cev tes los daws tej teeb meem no. Cov thawj coj tsum hwm thiab pab txhawb nqa cov neeg txheej nrab thiab txheej qes tib yam nkaus.
“Kev sib koom tes ntawm ntiag tug, hauv cuab yim neej, hauv pab pawg, hauv kev lag luam, hauv cov sawv cev los yog hauv lub Koom Txoos tsum yog ua kom tiag tiag”, Vaj Qhia hais, “Sawv daws tsum txais txoj hauj lwm cawm lub sim ceeb uas peb muaj feem xyuam nrog.”
Vaj Qhia hais ntxiv tias nyob hauv qhov tseeb mas peb pom tias kev sib pab muaj tsis sib npaug : cov lag luam loj, cov neeg nplua nuj yog cov tau kev pab ua ntej; cov thawj coj mloog cov tsev tsim tshuaj kho mob ua ntej yuav mloog cov kws kho mob los cov neeg mob lub suab. Tej no tsis yog qhov zoo, tsis yog txoj kev peb yuav tsum taug.
Peb twb paub tias yam hauv peb lub cev uas peb saib zoo li tsis muaj zog, tab sis lawv yog qhov muaj nqe dua tej. (1KLN12:22) Li ntawd, kev sib pab sib txhawb xwb thiaj yog yam pab daws xwv txheej hauv lub sim ceeb no tau.
Vaj Qhia thov kom sawv daws coj kev sib pab no mus siv hauv lub neej, kom sawv daws los sib pab tsim lub neej pem suab ua ke. Yog lub neej vam khom txog neeg kev noj qab hauv huv thiab kev ncaj ncees.
Lis piam tas los Vaj Qhia tau ntuas tias kev thooj siab koom ntsws thiaj yog hau kev tawm hauv cov xwv txheej no tau. Hnub no mas Vaj Qhia txhab ntxiv tias : Kev thooj siab koom ntsws tsum tau kev txhawb ntawm sawv daws mas thiaj tawg paj txi txiv tau.
Peb yuav tsum ntaus tes rau cov neeg muaj feem pab lwm tus nyob hauv xwv txheej tus kab mob no, tsis hais cov kws kho mob, cov tub saib xyuas, cov neeg siab dawb, cov laus los cov me nyuam yaus, cov neeg uas muab lub siab dawb paug los ua txoj hauj lwm no.
“Tab sis, peb txhob txaus siab rau kev ntaus tes rau lawv xwb mog!” Vaj Qhia hais kom sawv daws ras, “Peb tsum txhawb peb tus kheej kom muaj lub siab nqes tes ua, rhais ruam mus nrhiav kev ncaj ncees thiab kev hlub lub sim ceeb nyob hauv txoj kev vam khom.”
“Tso lub neej qub qab pov tseg, tig los tsim lub neej tshiab uas nyiam tsob hwb thiab pab lwm tus mog!”