PEB THOV KHAWV NYOB NTAWM TSWV NTUAJ XUB NTIAG MOG

"kev ntseeg yog lub suab thov kev cawm uas nrov mus txog Huab Tais Ntuj...
Kev tsis muab hlob yog lub hauv paus ntawm kev thov Ntuj."
-Vaj Qhia Fas Ntshis Kus-

Hnub tim 6 lub 5 hlis 2020 Vaj Qhia Fas Ntshis Kus pib nthuav kev ntseeg zaj tshiab rau cov ntseeg sawv daws, yog hais txog kev thov Ntuj.
Vaj Qhia ntuas cov ntseeg kom nquag thov Ntuj thiab taug txoj kev ntseeg. Vaj Qhia muab Npas Tis Mes uas yog tus dig muag thov khawv hauv Yes Lis Kos txoj kev ntseeg los ua piv txwv qhia sawv daws. (MK 10:47)
Vaj Qhia hais tias txawm tias Npas Tis Mes dig muag, tab sis nws hnov luag cav zawm zaws txog Huab Tais Yes Xus; nws thiaj tsa suab nrov nrov hu Huab Tais Yes Xus tias : Yes Xus, Das Vis leej tub, thov koj khuv leej kuv!
Vaj Qhia rov hais ntxiv tias Npas Tis Mes muab yam nws muaj, yog nws lub suab los hu Huab Tais Yes Xus thiab nws tsis quav ntsej cov neeg hais kom nws nyob twj ywm, nws hu ‘Das Vis leej tub’ mas yog nws tab tom ntseeg tseeb tias Yes Xus yog Mes Xias.
Tus dig muag thov khawv lub suab thov nrov txog Huab Tais Yes Xus, nws thiaj ntsia pom tias lub qhov rooj cawm neeg qhib txais nws lawm.
“Yam no qhia peb tias kev ntseeg yog lub suab thov kev cawm uas nrov mus txog Huab Tais Ntuj.” Vaj Qhia hais “Tsis yog cov ntseeg xwb thiaj thov Ntuj, tiam sis tas tsoom neeg uas nrhiav txoj sia tib sis yuav tsum thov Ntuj. Thov kom sawv daws nquag thov thiab txhob qaug zog rau txoj kev thov, thiab yuav tsum tso siab tias Huab Tais Yes Xus yuav khuv leej peb thiab mloog peb li lus thov.”
Vaj Qhia ntuas tias lub Koom Txoos cov lus qhia mas zeem tseeb tias kev tsis muab hlob yog lub hauv paus ntawm kev thov Ntuj.
“Kev ntseeg yog lub suab quaj.” Vaj Qhia hais li.
“Kev ntseeg yog kev tiv thaiv qhov mob uas yus tsis paub paus ntsis, kev tsis ntseeg kaw yus cia thiab ua rau yus txheeb ze txoj kev txhaum.”
“Kev ntseeg yog txoj kev vam khom txog kev cawm.”