PEB TSUM THOV NTUJ TAS TXWV

Tim 11 lub 11 hlis 2020, Vaj Qhia Fas Ntshis Kus rov muab lus ntuas cov ntseeg sawv daws, Vaj Qhia ua zoo xav txog 3 zaj txhais hais txog kev thov Ntuj.

Vaj Qhia Fas Ntshis Kus hais tias “Huab Tais Yes Xus ua piv txwv txog kev thov Ntuj txhua hnub thiab muab siab nyiam thov Ntuj.

Nyob hauv Koom Txoos li lus qhia mas ntsia pom 3 zaj paj lug hais txog kev thov Ntuj: yog zaj tus phooj ywg txob yus thaum ib tag hmo (LK11:5-13), zaj tus poj ntsuam taij kom luag ua ncaj rau nws (LK18:1-8), thiab zaj tus Fas Lis Xais thiab tus sau se (LK18:9-14)

Zaj tus phooj ywg txob yus no qhia peb tias peb tsum rau siab thiab tuav peb zaj thov kom khov kho. Zaj tus poj ntsuam thov kev ncaj qhia peb paub tias kev ntseeg tsis yog kev xaiv ib pliag xwb tab sis yog kev txiav siab hu txog Tswv Ntuj tiag tiag, tej zaum kuj ua rau peb muaj kev siv cav nrog Tswv Ntuj, los peb txhob tso kom peb poob rau qhov txhaum thiab tsis ncaj ncees.

Nyob hauv zaj tus Fas Lis Xais thiab tus sau se, Huab Tais Yes Xus taw kom peb pom tias Tswv Ntuj tsis mloog tus neeg muab hlob li lus thov, tab sis Tswv Ntuj mloog tus neeg me cov lus.

Li ntawd, Txiv thiaj xav hais rau sawv daws tias yog nej tsis ua tus neeg me mas nej yuav thov Ntuj los Tswv Ntuj yuav tsis mloog nej.”

Vaj Qhia rov tsa ncauj ntuas tias Ntawv Moo Zoo twb qhia meej tseeb lawm tias peb tsum thov Ntuj tas txwv, txawm tias yuav saib zoo li tsis muaj qab hau dab tsi los xij. Txawm tias kev thov Ntuj yog ib yam tsis yooj yim thiab xws li Tswv Ntuj tsis mloog peb lo lus thov, los peb tsum nquag thov Ntuj tas mus li.

“Txiv hais rau nej tias thaum nej thov Ntuj, tsis yog nej ib leeg thov xwb, Huab Tais Yes Xus nrog nej thov thiab nyob hauv nej cov lus thov.”

Vaj Qhia hais kom sawv daws sov siab thiab tso siab rau kev thov Ntuj tias “Nyob hauv Leej Pleev, lo lus thov yuav muaj tiag. Nyob hauv Leej Pleev, peb yuav ntsib qhov tseeb.”

Kawg no, Vaj Qhia xaus tias Huab Tais Yes Xus yog txhua yam rau peb, thiab nyob hauv peb kev thov Ntuj.