PEB TSUM YOG TUS CAWM NEEG TXOJ SIA THIAB NTIAJ TEB

Txhua Hnub Plaub hauv Lis Piam mas Vaj Qhia Fas Ntshis Kus tuaj ntsib sawv daws thiab ntuas kom sawv daws coj lub neej raws Ntawv Moo Zoo. Hauv hnub tim 16 lub 9 hlis tas los no Vaj Qhia thiaj ntuas sawv daws txog kev sib pab saib neeg txoj sia thiab tu lub ntiaj teb.
“Kev lim lub tswv yim thiab txhawj xeeb yog tus cuj pwm qhia txog kev daws tej xwv txheej nyob hauv neeg.”, lo lus no yog Vaj Qhia thawj lo lus hauv hnub no, “Peb yuav txeem kom dhau kev sib kis hauv tus kab mob no tau mas peb tsum muaj lub siab txhawj xeeb lwm tus thiab nqes tes saib xyuas lawv.”
Vaj Qhia hais kom sawv daws pab txhawb cov neeg ua hauj lwm saib xyuas cov muaj mob thiab cov laus vim lawv yog tus muaj txiaj ntsim tshaj plaws nyob rau zim txwv no. Tsis tas li ntawd, yam peb ua tau yog tu peb lub tsev kom zoo kom huv.
Peb lub tsev uas Vaj Qhia hais no tsis yog peb vaj tse, tiam sis yog lub ntiaj teb no. Li ntawd, peb tsum lim thiab hloov lub tswv yim tshiab txog kev sib khaub zig ntawm tib neeg txoj sia thiab lub ntiaj teb tias peb tsis yog tus tswv kav txhua yam nyob hauv ntiaj teb no, peb tsuas yog tus saib xyuas thiab tu lub ntiaj teb no kom zoo xwb.
Vaj Qhia Fas Ntshis Kus hais tias “Niaj hnub no Ntuj hnov peb cov kwv tij lub suab quaj, hnov ntiaj teb lub suab nyiav vim kev puas tsuaj thiab kev tsis ncaj ncees. Li ntawd, peb thiaj tsum tig los nrhiav Tswv Ntuj, rov los khaub zig Tswv Ntuj, mas peb thiaj yuav pom Tswv Ntuj lub txiaj ntsim.”
Vaj Qhia thov kom cov neeg tau Tswv Ntuj lub txiaj ntsim lawm, lawv pab qhia cov tsis tau paub kom txawj hloov lawv tus cuj pwm tsim kev puas tsuaj, kev tsis huv rau neeg thiab ntiaj teb; kom sawv daws yog tus cawm neeg thiab ntiaj teb txoj sia.