PEB UA TIM KHAWV VIM LEEJ NTUJ PLIG LUB TXIAJ NTSIM

Nyob hauv hnub chiv tas los (08/03/2020) Vaj Qhia Fas Ntshis Kus ntuas sawv daws tias peb raug hu los ua tim khawv txog Leej Pleev vim Leej Ntuj Plig li txiaj ntsim tsis yog vim peb tau ua zoo.
Hnub Chiv lis piam 2 hauv Caij Plaub Caug, Vaj Qhia Fas Ntshis Kus nthuav Mas Tais Ntawv Moo Zoo (MT 17 : 1-9) hais txog thaum Huab Tais Yes Xus yees tawm rau nws peb tug Thwj Tim pom. Vaj Qhia hais tias Huab Tais Yes Xus coj nws peb tug Thwj Tim nrog nws nce roob mus. Huab Tais Yes Xus coj lawv mus kom pom thiab nkag siab tias Huab Tais Yes Xus yog Tswv Ntuj, yog tus Tswv Ntuj yuav raug tsim txog thiab raug tua thiab yuav rov qab sawv rov los. Huab Tais Yes Xus qhia lawv nyob hauv kev hloov nws lub ntsej muag kom ci ntsa iab. 
“Peb tug Thwj Tim raug hu kom los ua tim khawv tias Huab Tais Yes Xus yog Tswv Ntuj Leej Tub” Vaj Qhia hais.
Vaj Qhia nthuav lub ntsiab rau sawv daws tias Huab Tais Yes Xus tsis xaiv Pob Zeb, Yas Kos thiab Zam raws li ntiaj teb neeg txoj kev xaiv. Qhov tseeb vim yog Pob Zeb yuav yog tus tsis lees Huab Tais Yes Xus nyob hauv hmo kawg, Zam thiab Yas Kos yog ob kwv tij xav tau ua tus ntaus thawj nyob hauv Huab Tais Yes Xus lub ceeb theej. 
Huab Tais Yes Xus xaiv lawv peb leeg raws li Huab Tais Yes Xus txoj kev hlub lawv. Yog txoj hau kev tsis muaj dab tsi hloov tau.
Vaj Qhia hais rau sawv daws tias “Peb los raug hu zoo li ntawd tib yam, peb raug hu los ua tim khawv txog Huab Tais Yes Xus. Kev hu peb yog ib yam txiaj ntsim peb tsis tsim nyog tau txais. Tej zaug peb yuav hais tias peb tsis muaj peev xwm txaus, peb tsis muaj cuab kav ua tau.”
Txawm tias peb tsis tau pom Huab Tais Yes Xus lub ntsej muag ci ntsa iab li lub hnub ntawm peb qhov muag, los peb yuav tsum npaj siab ua tim khawv txog Leej Pleev. Txawm tias yuav muaj xwv txheej ntau yam khuam peb cia, los peb yuav nco ntsoov tias kab ke txais Cim Ntxuav tau coj peb los ua tim khawv lawm, tsis yog vim peb lub peev xwm tab sis vim Leej Ntuj Plig li txiaj ntsim.
Kawg no Vaj Qhia kom peb thov niam Mab Liab kom pub lub siab muag mos nyoos rau peb nyob hauv Caij Plaub Caug no.
Tus txhais : Muas Lauj, Zoo Tswv Zov Yaj