PEB XAV TAU TUS NEEG NTSEEG XWS LI ES LIAS

Vaj Qhia Fas Ntshis Kus cov lus hauv Hnub Plaub, lis piam no yog kom sawv daws ua ib tug neeg ntseeg xws li Es Lias.
Tim 7 lub 10 hli no, Vaj Qhia tawm rooj tuaj ntsib cov neeg ntseeg sawv daws nyob hauv chav tsev Paj Lug tim Rau, Vaj Qhia hais rau sawv daws tias yaj saub Es Lias yog ib tug piv txwv zoo tshaj nyob hauv Ntawv Ntshiab.
Vaj Qhia hais tias Es Lias yog ib tus neeg peb tsis paub txog nws lub keeb tshwm los li cas tiam sis peb paub meej tias nws tsis tuag, nws raug nqa mus saum Ntuj lawm. Li ntawd, cov neeg tiam thaud thiaj xav tias Es Lias yuav rov qab nqes los ua ntej tus cawm seej yuav tuaj.
Ntawv Ntshiab qhia peb tias Es Lias yog ib tus neeg ntseeg ruaj ntseeg khov. Es Lias yog tus piv txwv rau cov neeg ntseeg sawv daws tias thaum lawv poob rau txoj kev ntxias thiab kev txom nyem, lawv txhob qaug rau lawv txoj kev ua neej.
Vaj Qhia kom peb saib txog Es Lias lub neej mas peb yuav pom tias ua ntej nws yuav raug nqa mus saum Ntuj, nws raug luag hiam thiab tsim txog li cas.
Vim li no, Vaj Qhia thiaj xav kom cov ntseeg muaj tus plig xws li Es Lias tus.
“Peb xav tau tus neeg muaj kev ntseeg ntau npaum cas? Peb xav tau tus neeg ntseeg muaj lub siab kub lug, muaj cuab kav sawv ntawm sawv daws xub ntiag los hais li Es Lias hais tias: Koj ua yam no tsis tau.”
Vaj Qhia hais ntxiv tias Es Lias lub neej qhia peb tias tus neeg nyiam thov Ntuj txhob cais nws tus kheej vim kev nyiam lwm tus yog pov thawj ntawm kev thov Ntuj.
Es Lias qhia peb tias kev thov Ntuj thiab nrog Tswv Ntuj nyob yuav tsis rhuav neeg txoj kev vam txog lwm tus. Li ntawd, Es Lias lub neej thiaj qhia peb kom peb nrhiav Tswv Ntuj thiab txaus siab rau Tswv Ntuj txib peb mus tsob hwb peb cov kwv tij.
Yaj Saub Es Lias txoj kev ntseeg loj hlob vim nws nquag mloog Huab Tais Tswv Ntuj lub siab thiab nws muaj cuab kav tawm tsam txoj kev tsis ncaj ncees.
Vaj Qhia ntuas sawv daws tias “Muaj ntau zaus zoo li peb yog ib tug neeg tsis muaj qab hau rau lwm tus, thiab zoo li tsis muaj leej twg ua peb luag. Thov kom peb thov Ntuj ces peb lub siab yuav qhib. Thaum peb ua tej yam tsis yog los peb raug kev iab hiam thiab poob rau kev ntshai. Thov kom peb thov Ntuj ces peb lub siab yuav tiaj tus thiab peb yuav ntsib kev thaj yeeb.”