SIB PAB TXUAG PEB LUB VAJ

Friday, April 24, 2020

“Peb yuav tsis muaj lub neej yav tom ntej, yog peb rhuav ntiaj teb tas mus li.”
-Vaj Qhia Fas Ntshis Kus-

Hnub tim 22 lub 4 hlis yog ‘Hnub Txuag Ntiaj Teb’ (Earth Day), yog li Vaj Qhia Fas Ntshis Kus thiaj nqua hu kom sawv daws sib koom tes ua txoj hauj lwm txuag ntiaj teb cov xyoob ntoo thiab huab cua zoo li peb tu peb lub vaj.
Vaj Qhia hais tias kev sib kis ntawm tus kab mob Nkos Los Nas los yog Covid-19 qhia peb sawv daws tias yog peb sib koom siab koom tes mas peb yuav muaj yeej.
Vaj Qhia rov hais tias Tswv Ntuj tsim tib neeg los ntawm ntiaj teb los thiab ntiaj teb lub txiv yug tib neeg txoj sia. Phau Ntawv Hauv Paus qhia peb paub tias peb tsis yog ntiaj teb tug xwb, peb tseem muaj Huab Tais Ntuj txoj pa cawm siav thiab. Yog li, peb thiaj ua neej nyob hauv lub vaj no nrog lwm yam muaj sia uas Tswv Ntuj tsim tseg.
Peb yog Huab Tais Tswv Ntuj tus duab, peb raug tsim los saib xyuas thiab hwm txhua txhia yam muaj sia hauv Ntiaj teb no, thiab muab kev nyiam kev hlub rau lwm tus xws li Huab Tais Tswv Ntuj muab nws Leej Tub, Yes Xus los tuag cawm peb.
Vim peb kev nyiam tus kheej dua nyiam lwm tus, peb thiaj tiv thaiv thiab txuag lub ntiaj teb tsis tau.

"Peb tau tso txoj hauj lwm ntawd pov tseg, yog li ntiaj teb thiaj rov tsim kev kub ntxhov rau peb."

Vaj Qhia hais kom peb ntsia yam tshwm sim rau peb pom : “Peb yuav tsis muaj lub neej yav tom ntej, yog peb rhuav ntiaj teb tas mus li.”
Vim peb tu peb lub vaj uas yog lub ntiaj teb thiab peb cov kwv tij tsis tau, mas peb thiaj tau ua txhaum rau ntiaj teb thiab rau peb cov kwv tij, thiab qhov kawg yog ua txhaum rau tus tsim peb. Yog li peb yuav rov tig ntsia peb lub vaj no dua, nrhiav kev kho kom ntiaj teb rov qab nrog tib neeg sib haum xeeb.
Peb txhob ntsia thiab xav tias ntiaj teb yog cuab tam rau peb siv tsim kev vam meej. Peb yuav ntsia lub ntiaj teb yog ‘Lub Moo Zoo Hauv Kev Tsim’, vim ntiaj teb yog yam qhia txog Tswv Ntuj lub tswv yim tsim tib neeg thiab txhua txhia yam hauv ntiaj teb no rau tib neeg.
Vaj Qhia nqua hu sawv daws kom hwm lub ntiaj teb, nws hais tias “Ntiaj teb tsis yog peb lub tsev xwb, tiam sis ntiaj teb tseem yog Huab Tais Ntuj lub vaj txiv thiab, thiab peb tab tom sawv nyob hauv lub vaj ntshiab.”
Vaj Qhia hais txog cov haiv neeg me ua neej nrog hav zoov tias “Lawv muaj ib lo lus hais tias : Peb yuav kho ntiaj teb tsis tau yog peb tsis paub nyiam thiab paub hwm lub ntiaj teb.”
Kawg no, Vaj Qhia thov kom sawv daws txhim tsa kev sib pab txuag ntiaj teb nyob hauv sawv daws lub zos, ntawm cov neeg nyob ib ncig.
“Peb sawv daws muaj peev xwm tsim kev koom tes no tau.”