THOV KOM TSWV NTUJ LO LUS MUAJ ZOG NYOB HAUV PEB

Hnub Chiv tim 31 lub 1 hlis 2021 no, Vaj Qhia Fas Ntshis Kus txhawb cov ntseeg sawv daws kom qhib siab nyeem Ntawv Moo Zoo thiab raws Yes Xus qab.

Lis Piam 4 Caij Nruab Xyoos, Vaj Qhia Fas Ntshis Kus rov nthuav Ntawv Moo Zoo nyob hauv chav khaws ntawv hauv Tuam Tsev hwm tsoom Leej Ntshiab. Cov lus Vaj Qhia nthuav yog cov lus hauv Mas Kos Ntawv Moo Zoo, yog hais txog Huab Tais Yes Xus kho tus neeg raug dab hauv hnub Xas Npas Tos.

Yes Xus nrog cov thwj tim mus hauv Kas Fas Naus. Txog hnub Xas Npas Tos, Yes Xus mus hauv lub tsev Txoos, nws tsa ncauj qhia sawv daws. Tsoom sid qhuas tas nrho txog nws cov lus qhuab qhia. Vim nws qhia lawv li tus neeg muaj hwj chim, nws tsis qhia xws li cov Kws Ntawv Ntshiab.

Nyob hauv lub tsev Txoos ntawd, txawm muaj ib tug neeg raug ib tug dab tsis huv nthe nthe tias “Yes Xus Nas Xas Les, koj xav ua dab tsi rau wb. Puas yog koj tuaj rhuav wb? Kuv paub koj yog leej twg. Koj yog tus Ntshiab tuaj ntawm Tswv Ntuj tuaj.”

Yes Xus cem nws kiag tias “Ua twj ywm! Tawm ntawm tus neeg no mus!”

Ces tus dab tsis huv muab tus neeg ntawd diaj heev heev, nws qw ib suab nrov nrov, nws tawm mus. Tas tsoom sid ntshai. Lawv sib nug zom zaws tias qhov ntawd yog dab tsi? Tab yog cov dab tsis huv, nws qhia lawv mas lawv mloog nws lus. Yes Xus lub moo ncha mus tas qhov txhia chaw nyob Nkas Lis Lais teb tib si. (MK1:21-28)

Vaj Qhia hais tias zeej tsoom qhuas Huab Tais Yes Xus cov lus qhia, vim Huab Tais Yes Xus qhia tsis zoo li cov kws Ntawv Ntshiab. Thiab Huab Tais Yes Xus cov hauj lwm yog cov hauj lwm muaj zog, nws cov lus muaj peev xwm ntiab dab tau.

Vaj Qhia nthuav tias kab lus no qhia txog 2 tug yam ntxwv tseem ceeb nyob hauv Huab Tais Yes Xus cov hauj lwm: Kev qhuab qhia thiab kev kho neeg.

Kev qhuab qhia yog qhov tseem ceeb tshaj plaws, hos kev kho neeg yog lub hwj huam zeem tseeb txog Huab Tais Yes Xus lub hwj chim thiab nws cov lus ntuas.

Huab Tais Yes Xus qhuab qhia raws nws lub hwj chim, vim cov lus nthawd yog cov lus tuaj ntawm nws tuaj, tsis zoo li cov kws Ntawv Ntshiab uas muab cov lus hauv txoj cai los hais. Huab Tais Yes Xus li lus thiaj muaj peev xwm ntiab dab tau thiab cawm tus neeg raug dab tau.

“Huab Tais Yes Xus lo lus ua kom muaj tuaj raws li nws hais, vim Huab Tais Yes Xus yog tus Yaj Saub siab tshaj cov; qhov tseeb, Huab Tais Yes Xus yog Leej Lo Lus. Vim li no mas Huab Tais Yes Xus thiaj hais lus raws li nws lub hwj chim.” Vaj Qhia hais li.

Huab Tais Yes Xus lo lus yog hais ncaj qha rau dab phem, kom dab phem ntxhov siab thiab tshem dab phem lub ceeb tsheej tawm hauv ntiaj teb no mus. Ces tus neeg raug dab thiaj zoo rov qab los.

Vaj Qhia hais txuas mus tias tus neeg raug dab nthe tias Yes Xus Nas Xas Les, koj xav ua dab tsi rau wb? Puas yog koj tuaj rhuav wb?

Txhais tau tias Huab Tais Yes Xus thiab dab phem nyias nyob nyias ib tog, tsis nyob ua ke. 

Ntawv Moo Zoo hnub no pab kom peb xyiv fab thiab xav paub ntxiv tias zeej tsoom hauv Kas Fas Naus xav li cas thaum lawv mloog Huab Tais Yes Xus qhia lawv hauv hnub Xas Npas Tos.

Vaj Qhia Fas Ntshis Kus caw cov ntseeg sawv daws coj nraim lub Moo Zoo thiab qhib siab mloog Tswv Ntuj Lo Lus cawm nyob hauv Ntawv Moo Zoo.

Kawg no, Vaj Qhia thov niam Mab Liab pab kom peb paub mloog Tswv Ntuj Lo Lus thiab kub siab raws Huab Tais Yes Xus qab mus kom txog txoj kev cawm.