THOV NTUJ THIAB TSO SIAB RAU TSWV NTUJ

Nyob hauv hnub 4 hauv lis piam tas los, Vaj Qhia Fas Ntshis Kus tawm rooj mus ntsib tsoom ntseeg nyob ntawm lub tuam tsev teev Ntuj hwm Leej Ntshiab Pob Zeb, Vaj Qhia muab cov zaj hais txog thaum tus hauv paus xa lus Paj Lug yuav ncaim hauv lub nroog Es Fes Xos coj los ntuas sawv daws.
Thaum Paj Lug nyob hauv lub nroog Es Fes Xos, Paj Lug ua hwj huam yees ntxwv los kho cov neeg mob thiab raug dab. Vaj Qhia Fas Ntshis Kus hais tias tos Paj Lug ua tau li ntawd, vim Paj Lug zoo xws li Huab Tais Yes Xus thiab Huab Tais Yes Xus nrog nraim Paj Lug.
Nyob hauv Es Fes Xos, muaj ib co txiv khawv koob Yus Das siv hwj huam los ntiab dab, tab sis lawv ntiab tsis tau. Tsuas yog Paj Lug thiaj ntiab dab tau xwb, mas sawv daws thiaj hloov siab los ntseeg ntau kawg. Vaj Qhia ntuas sawv daws tias : “yog koj xaiv Leej Pleev, mas koj yuav tsis mus cuag cov txiv khawv koob.” Vaj Qhia hais ntxiv tias :  “Tab sis nyob rau lub zim txwv no, peb cov ntseeg ntau tus mus nrhiav txiv khawv koob los yog cov ntaus txheeb kom lawv qhia yav tom ntej rau.”
Vaj Qhia Fas Ntshis Kus rov ntuas tsoom ntseeg sawv daws kom nco ntsoov tias Leej Pleev lub txiaj ntsim yuav coj txhua yam tuaj rau lawv, lawv yuav tsum thov Ntuj  thiab tso siab rau Tswv Ntuj xwb.
Tom qab Paj Lug yuav ncaim lub nroog Es Fes Xos, nws ntuas cov ntseeg hauv lub Koom Txoos kom ceev faj lawv tus kheej thiab lwm tus. Vaj Qhia hais tias yam no yog cov tub tshaj Ntuj Lus txoj hauj lwm, lawv yuav tsum zov lawv cov yaj kom zoo, thiab lawv yuav tsum nco ntsoov soj ntsuam lawv lub siab kom tiaj tus.

Tus txhais : Muas Lauj, Zoo Tswv Zov Yaj