TSIS MUAJ FEEM XYUAM NROG DAB PHEM SIB THAM

Hnub chiv tim 1 lub 3 hlis no Vaj Qhia Fas Ntshis Kus hais kom cov ntseeg sawv daws faj seeb thiab ua neeg feeb meej thaum muaj xwm ntau qhov chaw tuaj ntxias yus kom qaug qav kev txhaum thiab kev hla Tswv Ntuj txoj cai.
Vaj Qhia Fas Ntshis Kus ntuas cov ntseeg sawv daws uas tuaj sib sau nyob hauv tshav tiaj hwm Leej Ntshiab Pob Zeb txog thaum Huab Tais Yes Xus  raug Leej Ntuj Plig coj mus rau teb chaws saub puam rau dab phem ntxias (MT 4 : 1-11)
Thaum ntawd yog thaum Huab Tais Yes Xus yoo mov 40 hnub ua ntej nws yuav tsaj Ntuj Ceeb Tsheej rau ntiaj teb neeg. Vaj Qhia pib hais tias “Thaum Huab Tais Yes Xus yoo mov tau 40 hnub lawm, dab phem los ntxias Huab Tais Yes Xus txog 3 zaug.”
Thawj zaug yog dab phem pom tias Huab Tais Yes Xus tshaib plab heev, dab phem thiaj los ntxias tias : Saib, koj yog Tswv Ntuj Leej Tub no, koj hais kom cov pob zeb no txia ua mov !” (MT 4 : 3)
Huab Tais Yes Xus teb meej meej rau dab phem tias : Neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug txoj sia thiab. (MT 4 : 4)
Zaum ob, dab phem hais kom Huab Tais Yes Xus twv Tswv Ntuj. Tab sis Vaj Qhia tau nthuav rau sawv daws tias Huab Tais Yes Xus tsis pub kom nws poob rau txoj kev tsis tso siab vim cov ntseeg txog Tswv Ntuj yuav tsis twv Tswv Ntuj, tab sis yuav muab kev tso siab rau Tswv Ntuj.
Zaum peb, dab phem coj Huab Tais Yes Xus mus saib cov ceeb tsheej muaj koob meej thiab hais tias yuav muab tej ntawd rau Huab Tais Yes Xus, yog Huab Tais Yes Xus txhos caug pe dab phem ua Huab Tais.
Huab Tais Yes Xus tsis txais ntiaj teb neeg lub koob meej thiab hwj chim, tab sis Huab Tais Yes Xus ntiab dab phem mus. Huab Tais Yes Xus hais tias : Xas Tas, koj khiav mus ! vim muaj lus sau cia tias ‘tus koj yuav pe, yog koj tus Huab Tais Tswv Ntuj. koj yuav teev nws tib leeg xwb.’
Vaj Qhia ntuas sawv daws tias Huab Tais Yes Xus muab Tswv Ntuj cov lus los teb dab phem, tsis yog Huab Tais Yes Xus muab Huab Tais Yes Xus li lus los teb. Yog li peb yuav tsum faj seeb thiab feeb meej li Huab Tais Yes Xus thaum peb raug kev ntxias.
Vaj Qhia txawm hais ntxiv tias nyob hauv niaj hnub no, Xas Tas los ntxias sawv daws tas mus li. Xas Tas muab nws cov lus los sib xyaws nrog lwm lub suab coj los ntxias peb txoj kev ras txog qhov zoo qhov phem. 
“Peb yuav tsum txhawj xeeb tias tej xwm peb tau txais los ntawm ntau qhov chaw yuav ntxias peb hla Tswv Ntuj txoj cai.” Vaj Qhia ntuas sawv daws, “Huab Tais Yes Xus tus piv txwv qhia kom peb paub txog dab phem kev ntxias tias yog qhov coj peb tawm hauv Huab Tais Ntuj txoj kev, coj peb khiav deb ntawm Tswv Ntuj.”
Vaj Qhia hais tias dab phem txoj kev mas tej zaum yuav ua rau peb muaj kev txaus siab thiab zoo siab. Tab sis tej ntawd yog qhov cuav xwb.
Kawg no Vaj Qhias hais kom sawv daws nquag thov niam Mab Liab tus tau tsuj nab lub taub hau, kom nws pab peb nyob hauv Caij Plaub Caug no, kom peb txhob poob rau txoj kev ntxias thiab kom peb ua raws Huab Tais Yes Xus kev yeej dab phem kev ntxias.
Tus txhais : Muas Lauj, Zoo Tswv Zov Yaj