TSWV NTUJ QHIA KEV TWJ LIJ THIAB LUB LUAG HAUJ LWM TSEEB

Hnub chiv tim 16 lub 2 hlis tas los no, Vaj Qhia Fas Ntshis Kus nthuav Ntawv Moo Zoo rau tsoom ntseeg sawv daws tias Huab Tais Yes Xus nqes los ntiaj teb; yog los muab txiaj ntsim rau peb kom muaj peev xwm ua tau raws Tswv Ntuj siab nyiam. Vaj Qhia hais ntxiv tias Huab Tais Yes Xus txoj cai yog qhia peb paub txog kev twj lij thiab peb lub luag hauj lwm tseeb.
Vaj Qhia Fas Ntshis Kus pib ntuas sawv daws tias “Nej txhob hnov qab yam no : coj lub neej raws txoj cai vim txoj cai yog toob xib hauv kev twj lij. Txoj cai pab peb kom txhob poob rau hauv kev txhaum.”
Vaj Qhia hais ntxiv tias thaum peb poob rau kev ntxias thiab kev ntshaw, mas peb yuav saib xyuas peb txoj sia tsis tau ntxiv lawm.
Huab Tais Yes Xus ntuas nws cov Thwj Tim kom lawv ceev faj txog kev txaus ntshai hauv lawv lub siab xav tua neeg, xav deev luag txij luag nkawm, xav sib nrauj los yog xav twv Ntuj. 
Vaj Qhia hais tias Huab Tais Yes Xus tsis tau tuaj nrhuav txoj cai, tiam sis Huab Tais Yes Xus tuaj qhia ntxiv kom tob thiab qhia kom lawv muab lub siab coj raws.
Vaj Qhia tau caw sawv daws kom hloov kev ua raws txoj cai sau tseg cia, los ua raws txoj cai nyob hauv peb nruab siab.
“Ua zoo tawm hauv peb siab los.” Vaj Qhia hais rau sawv daws.
Vaj Qhia Fas Ntshis Kus hais txog kev txais Tswv Ntuj txoj cai nyob hauv peb nruab siab tias “Peb nkag siab tias thaum peb tsis nyiam lwm tus, mas yog peb tab tom tua peb tus kheej thiab tua lwm tus; vim kev ntxub ntxaug, kev sib twv thiab kev cais pab cais pawg.”
Yog peb zoo siab lees txais Tswv Ntuj txoj cai los nyob hauv peb nruab siab, mas peb yuav nkag siab tias peb txoj kev xav kev ntshaw ntawd yog muaj tej yam coj los taw rau peb ua.
Vaj Qhia txhawb tsoom ntseeg siab tias Huab Tais Yes Xus paub tias kev coj lub neej raws Txoj Cai mas tsis yooj yim, yog li Huab Tais Yes Xus thiaj pab peb nyob hauv nws txoj kev nyiam kev hlub.
“Huab Tais Yes Xus nqes los rau ntiaj teb tsis yog los ua raws txoj cai xwb, tab sis Huab Tais Yes Xus tseem coj Ntuj lub txiaj ntsim tuaj rau peb thiab. Huab Tais Yes Xus coj Ntuj lub txiaj ntsim tuaj cuag peb kom peb muaj peev xwm ua tau raws Tswv Ntuj siab nyiam, yog nyiam Tswv Ntuj thiab nyiam peb cov kwv tij.”
Vaj Qhia hais ntxiv tias “Yog peb muaj Ntuj txiaj ntsim, mas peb muaj peev xwm ua tau txhua yam. Tiag mas, qhov ntshiab tsis muaj dab tsi li. Qhov ntshiab yog peb saib xyuas Tswv Ntuj lub txiaj ntsim no kom zoo.”
Ua ntej yuav xaus cov lus nyob hauv hnub no, Vaj Qhia Fas Ntshis Kus caw sawv daws kom tuav Huab Tais Yes Xus txhais tes uas cev los pab peb, kom peb txoj kev kub siab thiab mob siab no loj hlob mus nyob hauv Huab Tais Yes Xus txoj kev cawm.

Vam txog : Vaticannews
Tus txhais : Muas Lauj, Zoo Tswv Zov Yaj