TUS TSIM KEV THAJ YEEB TSEEB NWS YUAV NRHIAV KEV SIB HAUM XEEB

Nyob zoo cov kwv tij Hmoob sawv daws, hnub no peb rov tuaj sib ntsib dua thiab rov los mloog Vaj Qhia Fas Ntshis Kus cov lus qhia peb ua neej hauv txoj kev ntseeg dua. Vaj Qhia hais tias ‘Tus tsim kev thaj yeeb tseeb, nws yuav nrhiav kev sib haum xeeb’.
Nyob hauv hnub tim 15 lub 4 hlis no, Vaj Qhia nthuav txog Huab Tais Yes Xus cov lus qhia nqe tias :

cov tau txoj hmoov zoo yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. (MT 5:9)

Vaj Qhia hais tias kev sib haum xeeb tseeb los ntawm kev thaj yeeb hauv Leej Pleev, yog nws tus Ntoo Cuam tau txhim haiv neeg tshiab.
Kom sawv daws to taub zoo, mas Vaj Qhia thiaj nthuav rau sawv daws mloog tias “Lo lus kev thaj yeeb no mas yuav tsum nthuav lub ntsiab rau sawv daws, tsis li ntawd mas sawv daws yuav nkag siab yuam kev.”
Vaj Qhia nthuav tias lo lus no muaj 2 lub ntsiab : lub ntsiab ib, mas peb yuav pom nyob hauv Ntawv Ntshiab yog lo tias ‘Shalom’ txhais tias lub neej muaj xauv npo, muaj txhij muaj txhua. Lub ntsiab ob, yog kev tus hauv nruab siab.
Peb yuav cim cia tias Huab Tais Tswv Ntuj kev thaj yeeb tsis zoo li tib neeg li. Leej Pleev kev thaj yeeb yog lub txiv ntawm kev tuag thiab kev sawv rov los. Leej Pleev li txiaj ntsim no tsis thooj li neeg ntiaj teb li, vim nyob hauv ntiaj teb mas yuav tsum rhuav lwm tus thiaj tau kev thaj yeeb.

Tiam sis Tswv Ntuj kev thaj yeeb yog yuav tsum rhuav txoj kev tawm tsam hauv yus pov tseg.

Kom sawv daws nkag siab zoo, mas Vaj Qhia thiaj rov hais tias “Nyob hauv lub zim txwv no, peb yuav pom tias kev thaj yeeb yuav nrog kev tsov rog ua ke. Qhov no tsis yog Tswv Ntuj qhov kev thaj yeeb.”
Vaj Qhia hais kom sawv daws cim rau nruab siab tias txoj kev tsim kev thaj yeeb mas nyob hauv Huab Tais Yes Xus lub cev. Huab Tais Yes Xus ua kom peb rov sib haum xeeb thiab Huab Tais Yes Xus muab nws cov ntshav los tsim kev thaj yeeb.
Vaj Qhia nug sawv daws tias yog li leej twg thiaj yog tus tsim kev thaj yeeb? Vaj Qhia teb tias yog peb sawv daws uas tau paub txog kev thaj yeeb thiab tau xyaum tsim kev thaj yeeb, yog cov paub tias yog tsis muaj Ntuj txiaj ntsim ces yuav tsis muaj kev rov sib haum xeeb, yog cov paub tias yuav tsum nrhiav thiaj yuav ntsib kev thaj yeeb ntawd.
Kawg no, Vaj Qhia hais tias tus neeg ua li no thiaj yog Tswv Ntuj tus me nyuam thiab yuav yog tus tau kev zoo siab xyiv fab tiag.
Cov kwv tij Hmoob, hnub no peb Zoo Tswv Zov Yaj txuas coj Vaj Qhia Fas Ntshis Kus cov lus tuaj qhia sawv daws li no xwb. Lwm hnub peb mam rov sib ntsib dua, nyob zoo sawv daws.

Vam txog : Vaticannews.va/en
Tus txhais : Muas Lauj, Zoo Tswv Zov Yaj