TXAWM TIAS LUB KOOM TXOOS RAUG TSIM TXOM LOS TSIS DHUAV TOS TXAIS SAWV DAWS.

Hnub tim 15 lub 1 hlis tas los, Vaj Qhia Fas Ntshis Kus piav txog tus Hauv Paus Xas Lus Paj Lug li hauj lwm tshaj lub Moo Zoo tuaj txog tuam ceeb Los Mas rau cov ntseeg hauv lub tuam tsev hwm Paj Lug tim 6 mloog.
Vaj Qhia hais tias yog tib neeg ua neej nyob hauv txoj kev ntseeg, mas tib neeg txoj kauj ruam yuav yog ib txoj kev coj Tswv Ntuj kev cawm mus cuag lwm tus, ntxeev tej xwm txheej phem kom zoo tuaj, thiab  yuav qhib txoj hauv kev tshiab.
Lus Kas xaus phau ntawv Hauj Lwm mas nws hais txog Paj Lug kub siab tshaj lub Moo Zoo, tsis yog hais txog Paj Lug kev ntxhov siab. Paj Lug tuaj txog lub tuam ceeb no, Ntuj txiaj ntsim lub zog qhib lawv siab kom txais lub Moo Zoo thiab mloog Huab Tais Ntuj Lo Lus.
Vaj Qhia hais tias thaum nyob hauv tuam ceeb Los Mas, Paj Lug xub ntsib cov ntseeg ua ntej. Lawv yog cov zoo siab tos txais Paj Lug thiab txhawb kom Paj Lug siab tawv.
Txawm tias Paj Lug yog ib tus tub raug txim, tab sis Paj Lug muaj cai nrog cov Yus Das sib ntsib thiab tham txog Ntuj Ceeb Tsheej. Paj Lug ua tiag piav txog Huab Tais Yes Xus, Paj Lug hais txog cov lus nyob hauv cov His Xas Lais  kauj ntawv thiab qhia kom lawv nkag siab tias Huab Tais Yes Xus yog Leej Pleev, yog haiv His Xas Lais txoj kev vam khom.
“Paj Lug rau siab tshaj Ntuj Ceeb Tsheej thiab nrog lawv tham txog txoj kev ntseeg Huab Tais Yes Xus.” Vaj Qhia piav, “Vim muaj ib txhia tsis kam ntseeg, mas Paj Lug thiaj cem cov neeg siab tawv ntawd tias : Leej Ntuj Plig Ntshiab qhia tus Yaj Saub His Xais kom hais tias koj mus hais rau haiv neeg no tias ‘nej pob ntseg yuav hnov, tiam sis nej yuav tsis to taub. Nej yuav ntsia, tiam sis nej yuav tsis pom. Vim tias haiv neeg no lub siab ruam, lawv lag ntseg, lawv qi muag.’"
Lus Kas tsis sau txog Paj Lug kev tuag, tab sis nws sau txog Paj Lug cov lus ntuas tsoom sid tias yog ib co lus tsis raug saw hlau khi tau.
“Paj Lug raug ntes kaw tab sis nws li lus tsis raug kaw.” Vaj Qhia hais li.
Vaj Qhia Fas Ntshis Kus hais ntxiv tias “Paj Lug zoo siab qhib nws lub tsev rau cov xav txais Ntuj Ceeb Tsheej thiab xav paub txog Leej Pleev. Paj Lug lub tsev qhib rau sawv daws, yog lub Koom Txoos tus duab; txawm tias yuav raug tsim txom, raug to taub yuam kev thiab raug saw hlau khi cia los nws tsis dhuav tos txais lwm tus vim lub siab xav tshaj Leej Txiv kev nyiam nyob hauv Huab Tais Yes Xus rau lwm tus.
Kawg no, Vaj Qhia hais rau cov ntseeg uas yog cov xeem lus As Lav tias “Txhob cheem nej txoj kev ntshai ua yam yuam kev thiab taug txoj kev tshiab, vim peb txoj kev txom nyem tsis yog kev cuam tshuam, tab sis yog cuab yeej… vim Ntuj txiaj ntsim nyiam tshwm nyob hauv kev tsis muaj zog.”

Thau los ntawm : www.vaticannews.va/en
Tus txhais : Muas Lauj, Zoo TSwv Zov Yaj