TXHOB TXAJ MUAG THOV NTUJ

Tim 9 lub 12 hlis xyoo 2020, Vaj Qhia Fas Ntshis Kus hais kom peb mloog Tswv Ntuj lub suab nrov hauv peb tuaj, lub suab ntawd hais kom peb thov Ntuj tsis tseg nyob hauv lub zim txwv ntxhov quas niab no.

Vaj Qhia pib hais nws cov lus; yog hais txog thaum Huab Tais Yes Xus qhia cov thwj tim thov Ntuj raws li zaj ‘Peb txiv nyob saum Ntuj’ li no: Peb Txiv nyob saum ntuj, koj lub Npe ntshiab nto moo lug. Koj lub Ceeb Tsheej los txog. Kom muaj raws li koj nyiam nyob ntiaj teb no li nyob saum ntuj. Thov koj pub mov txaus peb noj hnub no. Koj zam peb cov nuj nqis zoo li peb zam rau cov tshuav nqi ntawm peb. Koj txhob tso peb raug kev ntxias. Thov koj npo peb dim ntawm kev phem. (MT6:9-12)

“Peb pom tias Huab Tais Yes Xus kom peb thov Tswv Ntuj pub paj tshab siab tshaj rau peb, yog kom muaj raws li peb txiv lub siab nyiam nyob hauv ntiaj teb no, thiab thov kom peb Leej Txiv pub mov los yug peb txoj sia.” Vaj Qhia nthuav “Cov mov yug sia yog kom peb txhob muaj mob muaj nkees, kom peb muaj kev sib hlub nyob hauv peb cuab yim neej, muaj kev sib haum xeeb nyob hauv peb chaw ua hauj lwm, thiab muaj Leej Pleev nyob hauv lub Cim Yug.”

Vaj Qhia hais tias muaj qee zaus nyob hauv peb txoj sia, mas peb qaug zog vim peb tsis muaj peev xwm pab tau peb tus kheej, peb tsa suab quaj, peb ntxhov siab nrhiav kev tawm tsis tau. Thov kom peb tsa ncauj thov txog Tswv Ntuj: Huab Tais, koj pab cawm kuv yuad!

“Kev thov Ntuj yuav pub qhov kaj rau peb nyob hauv qhov tsaus ntuj nti.” Vaj Qhia ntuas.