Radio Veritas Asia Buick St., Fairview Park, Queszon City, Metro Manila. 1106 Philippines | + 632 9390011-15 | +6329390011-15
TXOJ SIA NYIAM TUS KHEEJ XWB, TSIS COJ MUS CUAG KEV XYIV FAB
"Huab Tais Yes Xus nrog nraim peb thiab Huab Tais Yes Xus npaj chaw tos peb nyob saum Ntuj Ceeb Tsheej"
-Vaj Qhia Fas Ntshis Kus-
10/5/2020
Nyob hauv Hnub Chiv Lis Piam 5 hauv Caij Hla, Vaj Qhia Fas Ntshis Kus txhawb sawv daws siab kom txhob tas kev vam khom, vim Huab Tais Yes Xus nrog nraim peb thiab Huab Tais Yes Xus npaj chaw tos peb nyob saum Ntuj Ceeb Tsheej.
Nyob hauv Zam Ntawv Moo Zoo (Z 14:1-12) : Huab Tais Yes Xus hais rau cov thwj tim tias ‘Nej tsis txhob ntxhov siab mog.’ Vaj Qhia hais tias lo no yog Huab Tais Yes Xus tab tom hais rau peb, tiam sis peb yuav tso siab tau li cas tias peb tsis ntxhov siab?
Vaj Qhia teb tias Huab Tais Yes Xus qhia peb li no :
1. Ntseeg txog kuv.
Huab Tais Yes Xus paub zoo tias kev ntxhov siab loj tshaj, mas yog thaum peb raug tso pov tseg nyob tib leeg. Yam no peb yuav daws peb tib leeg xwb tsis tau, yog li Huab Tais Yes Xus thiaj hais kom peb tso siab tias nws nrog peb nyob thiab peb yuav tso siab rau Huab Tais Yes Xus ua tus daws.
2. Nyob hauv kuv Txiv tsev, muaj ntau chav. Thaum kuv mus npaj tau ib qho chaw rau nej lawm, kuv yuav rov los coj nej mus nyob ze kuv.
Qhov no yog yam Huab Tais Yes Xus ua rau peb, yog npaj chaw rau peb, thiab coj peb mus cuag Ntuj Ceeb Tsheej. Yog li peb txoj sia thiaj tsis yog tsis muaj chaw nres, tiam sis peb txoj sia yog tos yam muaj nqis rau peb.
Vaj Qhia ntuas cov ntseeg sawv daws kom nco ntsoov tias txoj sia hauv ntiaj teb no yog npaj peb kom ntshiab huv thiaj tau txoj sia nyob mus li saum Ntuj Ceeb Tsheej.
“Tswv Ntuj tsim peb los ua Ntuj Ceeb Tsheej tug, los muaj txoj sia nyob mus li. Yog txoj sia nyob hauv kev xyiv fab. Peb yuav dhia hom khaj, luag ntxhi mus li”
Vaj Qhia xaus tias peb yuav mus cuag Ntuj Ceeb Tsheej tau li cas. Huab Tais Yes Xus hais rau peb paub tias : Kuv yog txoj kev. Txhais tias txoj kev coj peb mus cuag Ntuj Ceeb Tsheej yog mus ntawm Huab Tais Yes Xus mus : yog ua lub neej npuab ze Huab Tais Yes Xus, coj tus yam ntxwv nyiam lwm tus thiab taug Huab Tais Yes Xus tus lwj lw.
Peb cov ntseeg yuav tsum nug tus kheej tias peb puas txawm nyob hauv txoj kev mus cuag Ntuj Ceeb Tsheej.
Kawm no, peb yuav tsum yoog Huab Tais Yes Xus tus piv txwv nyiam ua neeg me, nquag thov Ntuj, tsis muab hlob thiab tso siab.
“Txoj kev no tsis yog yus nyiam yus, tiam sis yog Huab Tais Yes Xus txoj kev, yog muab Huab Tais Yes Xus ua qhov nruab nrab hauv peb.”
“Nyob hauv peb txoj sia, thaum peb ntsib xwv txheej; peb yuav nug tus kheej tias : Yog Huab Tais Yes Xus ne, nws yuav xaiv yam twg, yuav ua li cas?”
Add new comment