YES XUS QHIA PEB COJ LUB SIAB MOS NYOOS, UA TUS NEEG ME, PAUB HWM LWM TUS.

Nyob hauv hnub Chiv tim 12 lub 1 hlis tas los no, Vaj Qhia Fas Ntshis Kus muab lus rau tsoom sid sawv daws tias cov ntseeg yuav coj tus yam ntxwv ua neeg me.
Hnub Chiv tas los lub Koom Txoos ua Txoos teev Ntuj Huab Tais Yes Xus txais Cim Ntxuav ntawm tus dej Yos Las Das raws li Mas Tais Ntawv Moo Zoo sau tseg. Vaj Qhia Fas Ntshis Kus nthuav lub ntsiab hauv Huab Tais Yes Xus li lus nrog Zam Ntxuav Plig sib tham rau sawv daws tias Zam poob siab thaum hnov Yes Xus hais kom nws ua kab ke ntxuav rau Yes Xus, vim Zam paub tias Leej Pleev yuav tsis txais Cim Ntxuav; tus phim txais Cim Ntxuav mas yog Zam.
Vaj Qhia hais tias Huab Tais Ntuj yog tus Ntshiab Huv, Tswv Ntuj txoj kev tsis thooj li peb txoj thiab Huab Tais Yes Xus yog Tswv Ntuj txoj kev, yog txoj kev peb paub tsis thoob.
Kom sawv daws paub tias Leej Tub nqes los ua tus choj coj peb mus cuag Huab Tais Ntuj, mas Vaj Qhia thiaj hais tias “Yog Huab Tais Yes Xus nyob ntawm Tswv Ntuj ib sab, mas Huab Tais Yes Xus kuj nyob ntawm tib neeg ib sab thiab. Vim li no Yes Xus thiaj teb rau Zam tias : Nyem no rau kuv ua li ntawd, wb thiaj tau ua raws txoj kev ncaj.”
Qhov no yog Huab Tais Yes Xus ua raws Leej Txiv txoj kev npaj tseg, yog txoj kev coj lub siab mos nyoos thiab coj Tswv Ntuj txoj kev txheeb ze mus cuag tib neeg.
Vaj Qhia rov hais tias Huab Tais Yes Xus teej qav teej num tsis zoo li ntiaj teb li, Huab Tais Yes Xus coj tus yam ntxwv ua siab mos nyoos thiab ua tus qauv rau peb coj raws. Huab Tais Yes Xus coj tus yam ntxwv ua neeg me tsis muab hlob thiab hwm lwm tus; yog qhov tseem ceeb rau nws cov thwj tim hauv niaj hnub no.
“Txaus tub siab kawg thaum muaj ntau leej lawv qhuas tias lawv yog Huab Tais cov thwj tim tab sis lawv tsis yog tus thwj tim zoo.” Vaj Qhia hais rau sawv daws “Tus thwj tim zoo yog tus coj lub siab mos nyoos ua qhov zoo tsis pub lwm tus pom.”
“Cov ntseeg yog cov raug hu kom tawm mus ntsib lwm tus, lawv tsis muab hlob, lawv faib Ntuj txiaj ntsim rau lawm tus, lawv nthuav txoj sia tseeb rau lwm tus.” Vaj Qhia ntuas sawv daws.
Thaum Yes Xus txais Cim Ntxuav hauv tus dej Yos Las Das tas nrho, ces lub ntuj qhib plho thiab Leej Ntuj Plig Ntshiab nqes los nyob saum Yes Xus. Muaj ib lub suab nrov saum ntuj tuaj tias : Tus no yog kuv Leej Tub kuv nyiam kawg, kuv lub siab nrog nws nyob.
“Peb yug dua tshiab nyob hauv dej thiab Leej Ntuj Plig Ntshiab, peb paub tias peb zoo li me nyuam yaus, peb yog Leej Txiv qhov zoo siab, peb raug hu kom ua tim khawv thiab tshaj Leej Txiv txoj kev nyiam tsis muaj chaw xaus no rau lwm tus.”
Kawg no Vaj Qhia Fas Ntshis Kus xav kom peb rov mus txhawb nrhiav saib peb txais Cim Ntxuav hnub twg; thaum paub lawm ces peb yuav ua kev zoo siab rau hnub peb txais Cim Ntxuav txhua txhua xyoo; kom qhia rau lwm tus paub tias nov yog txoj kab xwm ua kev ncaj ncees rau Tswv Ntuj.

Thau los ntawm : www.vaticannews.va/en/
Tus txhais : Muas Lauj, Zoo Tswv Zov Yaj