IB TUG KWS THAU DUAB TAU NROG VAJ QHIA SIB THAM HAUV XOV TOOJ

Das Nias (Daniel Ibanez) yog ib tug kws thau duab nyob hauv Vas Tis Kas. Das Nias hais tias : tsaib no thaum lub 12 hlis uas yog lub Caij Yes Xus Yug Los, nws tau txais xov tooj tuaj ntawm Vaj Qhia tuaj. Ua ntej ntawd thaum lub 10 hli ntuj Das Nias tau xub sau ib tsab ntawv mus rau Vaj Qhia piav txog nws tus kheej. Das Nias hais tias nws tuaj ntawm Xyis Pas Yas (Spaine) teb tuaj, nws tuaj Is Tas Lias teb yog xav tuaj kawm txuj. Tab sis qhov kawg, mas nws tau ua txoj hauj lwm no los 6 xyoo, Das Nias piav tias nws xav mus ntsib Vaj Qhia ib zaug ntawm nws tus kheej, tab sis nws tsis muaj caij tau ntsib Vaj Qhia ib zaug li. Thaum lub sij hawm nkawd tham xov tooj, mas Vaj Qhia tau caw Das Nias mus ntsib Vaj Qhia thiab koom thaj txi Ntuj nyob hauv Vaj Qhia lub tsev nyob Los Mas. Thiab Vaj Qhia thov txim uas teb Das Nias tsab ntawv qeeb lawm. Li ntawd, hnub tim 20 lub 12 hlis tsaib no Das Nias thiaj tau mus ntsib Vaj Qhia thiab koom ua thaj txi Ntuj. Das Nias nco ntsoov Vaj Qhia cov lus nthuav ntawv Moo Zoo hais tias : peb tus Tswv Ntuj yog tus ua kom peb lub siab xav tej yam txawv thiab ua kom peb lub siab dhia pig poog tas li. Qhov uas Das Nias zoo siab tshaj, mas yog qhov nws tau khawm puag Vaj Qhia. Das Nias hais tias : nws txaus siab thiab qhuas tias Vaj Qhia tsis muab hlob thiab Vaj Qhia yog ib tug neeg muab siab rau txog sawv daws, Vaj Qhia ua neeg me thiab nrog sawv daws sib luag zos. Qhov no tsis yog peb hnov Das Nias hais xwb, peb yeej pom lawm tias : lub sij hawm Vaj Qhia mus tsham txawv teb chaws thiab tuaj tsham Thaib teb, mas Vaj Qhia nrog sawv daws sib fim, Vaj Qhia tsis tau xaiv tias yuav nrog cov nom tswv sib fim xwb.

Tus txhais : Lis Maib, Zoo Tswv Zov Yaj