LUB HNAB NTAWV HAIS TXOG VAJ QHIA

Tom qab Vaj Qhia Fas Ntshis Kus tuaj tsham Thaib teb tag lawm, mas lub Koom Haum tsev xa ntawv nyob Thaib teb tau ua ib co Stamp lo lub hnab ntawv hais txog Vaj Qhia tuaj tsham Thaib teb rau sawv daws siv. Cov Stamp no yog lub Koom Haum tsev xa ntawv thiab lub rooj Tswv Qhia Kav Tos Liv nyob Thaib teb tawm lus pom zoo ua ke. Cov Stamp no yog ua los nco txog Vaj Qhia txoj kev tuaj tsham Thaib teb thiab yog ib tug thawj coj ntawm lub Koom Txoos Kav Tos Liv nyob Los Mas tuaj tsham Thaib teb nyob hauv 35 xyoos dhau los. Nyob hauv daim Stamp, mas muaj cov duab Vaj Qhia tuaj tsham Thaib teb thiab Vaj Qhia Fas Ntshis Kus tus duab. Tsis tas li ntawd, tseem muaj ib txoj kab nkag mus saib cov yeeb yaj duab hais txog tsoom tub ntxhais hluas Thaib koom hu nkauj “Cia kev hlub ua tus choj”, yog cov tub hu nkauj thiab ua yeeb yaj duab neeg Thaib uas lawv yog cov ntseeg Kav Tos Liv. Dhau ntawd lawm, lub Koom Haum tsev xa ntawv nyob Thaib teb kuj tseem ua ib co Stamp hais txog Vaj Qhia Fas Ntshis Kus mus tsham 50 lub teb chaws nyob hauv 7 xyoo dhau los rau sawv daws siv thiab. Yog ib co Stamp nco txog Vaj Qhia Fas Ntshis Kus txoj kev hlub thiab nws tsim kev thaj yeeb rau txhua lub teb chaws. Xyoo 2014, lub Koom Haum tsev xa ntawv nyob Thaib teb kuj tau ua ib co Stamp nco txog cov tseem hwv Thaib thiab Vas Tis Kas txoj kev sib haum xeeb, ua lub cim nco txog txoj kev ntseeg muaj nyob Thaib teb txwm 350 xyoo. Vaj Qhia txoj kev tuaj tsham Thaib teb zaum no, Vaj Qhia tau ua ntau yam hauj lwm nyob hauv txoj kev sib haum xeeb thiab nyob thaj yeeb, tsis hais nrog cov tseem hwv Thaib sib haum xeeb los yog nrog lwm cov kev teev hawm sib haum xeeb huv tib si. Vaj Qhia txoj kev tuaj tsham Thaib teb zaum no, yog ib lub cim kev sib haum xeeb ntawm tseem hwv Thaib thiab Vas Tis Kas zim txwv no thiab yav tom ntej. 

Tus txhais : Lis Maib, Zoo Tswv Zov Yaj