NROG VAJ QHIA THAM TXOG COVID-19

Es Npos Lej thawj lo lus nug Vaj Qhia tias : “Lub sij hawm uas tus kab mob Covid-19 tab tom sib kis li no, Vaj Qhia saib lub ntiaj teb zoo li cas ?” Vaj Qhia teb tias : “Nod yog ib lo lus uas Txiv tsis tshua nyiam pes tsawg. Ntawm Txiv, mas Txiv saib lub ntiaj teb mus rau qhov zoo thiab pom tias zoo li neeg tab tom hais tej yam zoo nyob saum neeg daim tawv nqaij uas muaj teeb meem. Txiv muaj kev cia siab thiab cia siab rau tib neeg. Txiv muaj kev cia siab rau txhua tus neeg tsis hais poj niam los txiv neej. Txiv muaj kev cia siab rau ntiaj teb neeg uas tab tom kawm tej yam tshiab ntawm tus kab mob Covid-19 no. Vim nyias yuav rov xav txog nyias tus kheej, ces yeej yuav muaj qhov zoo xwb. Peb muaj qee leej tab tom muaj mob, nws yog ib yam hnyav siab kawg, tab sis Txiv ntseeg tias sawv daws yuav rov zoo tuaj.”
Es Npos Lej nug ntxiv tias : Vaj Qhia xav li cas thaum nws foom hmoov zoo nyob ntawm tshav puam lub tsev teev Ntuj hwm Leej Ntshiab Pob Zeb uas tsis muaj ib tug neeg li ? Vaj Qhia hais lus teb luag ntxhi tias : “Thaum ntawd Txiv saib lub tsev teev Ntuj hwm Leej Ntshiab Pob Zeb zoo li yog ib lub tiaj suab puam, Txiv nyob yam kaw tus kheej ib leeg, tab sis Txiv kuj saib tus kheej zoo. Txiv tsis tos txais neeg tuaj tsham ua tsheej pab, Txiv tsuas txais cov neeg tuaj tsham uas yog ib leeg xwb. Txiv tseem ua hauj lwm xwm yeem li qub, yog ib qho txaus luag kawg uas yus raug kaw li no. Xyoo no thaum hnub nquam Yes Xus kev txom nyem 14 daim duab uas yog hnub 6 Ntshiab, txhua xyoo yuav nquam nyob ntawm Colosseum, tab sis xyoo no vim tus kab mob Covid-19, ces Txiv thov kom cov neeg raug txim nyob hauv lub nroog Pas Dos Vas (Padua) pab sau cov zaj nco txog Yes Xus txoj kev raug txom nyem, lawv sau tau raug siab kawg. Txiv txaus siab thiab qhuas txog cov teeb meem uas lawv ntsib, nod yog qhia kom peb yuav tsum qhib qhov rais txhua lub sij hawm kom peb thiaj paub txog lwm tus li teeb meem.”
Tam sim no Is Tas Lias teb thiab Xyis Pas Yas teb muaj neeg tuag los ntawm tus kab mob Covid-19 coob tshaj Suav teb, Vaj Qhia xav hais dab tsi rau cov neeg uas lawv tau plam tus neeg uas lawv hlub mus lawm ?
Vaj Qhia teb tias : “Qhov Txiv yuav ua, mas yog xav hais ib lo lus rau lawv. Txiv xav kom lawv paub tias ; Txiv nyob ntawm lawv ib sab txhua lub sij hawm. Niaj hnub no qhov yus ua ib yam dab tsi tseem ceeb dua lo lus hais tias : ‘Yog’. Peb yuav tsum hais lo puav lus, tab sis kev nyob ua ke yog ib yam uas Txiv muab rau lawv.”
Es Pos Lej nug Vaj Qhia ntxiv tias : “Teeb meem tus kab mob Covid-19, tsis yog ua kom neeg tuag xwb, tab sis tseem ua kom neeg poob hauj lwm coob thiab, Vaj Qhia puas xav hais dab tsi rau cov tswv ntiav zog ?”
Vaj Qhia teb tias : “Kev rho cov tub zog tawm hauj lwm kom yus tus kheej dim, tsis yog kev daws teeb meem. Zim txwv no tsis tsim nyog lawv yuav rho cov tub zog tawm hauj lwm, tab sis yuav ua kom cov tub zog paub tias ; lawv lub Koom Haum yog qhov chaw tej pab neeg sib koom hauj lwm thiab sib koom ua ib lub siab, nod yog qhov tsim nyog ua nyob hauv lub sij hawm uas sawv daws raug kev kub ntxhov.
Txawm li cas kuj xij, Es Npos Lej kuj tseem nug Vaj Qhia ntxiv tias : “Vaj Qhia yog tus thawj coj ntawm txoj kev teev hawm, tsis yog ib tug thawj tswj ib lub Koom Haum loj, Vaj Qhia tsis muaj kev paub txog kev siv nyiaj txiag, Vaj Qhia tsis paub tias tam sim no lawv cov Koom Haum poob peev loj npaum li cas ?”
Vaj Qhia teb tias : “Yog ! Koj yog hais yog kawg ! Txiv tsis paub txog lawv kev lis hauj lwm thiab kev siv nyiaj txiag, tab sis Txiv paub txog kev nyuab siab ntawm cov tswv tsev Koom Haum thiab cov tswv ntiav zog uas lawv rho lawv cov tub zog tawm hauj lwm, Txiv paub tias lawv ntsib ntau yam nyuaj, txhua yam uas lawv ntsib mas zoo li tsis muaj ib qho zoo. Nod yog yam tshwm sim uas muaj tseeb thiab sawv daws raug taij thov kom saib xyuas txhua yam raws qhov tseeb.”
Es Npos Laj nug ntxiv tias : “Tub kab mob Covid-19, ua kom Vaj Qhia ntxhov siab txog dab tsi ntau tshaj ?”
Vaj Qhia hais tias : “Txiv ntxhov siab txog cov teeb meem neeg nyob ib leeg, vim feem ntau neeg nyiam nyob ua npoj thiab nyob coob coob ua ke nrog tsev neeg. Ntau zaus peb ntsia tsis pom txog qhov no. Muaj zaum puav yus nrog tsev neeg noj mov, mas niam thiab txiv saib TV, me nyuam kov xov tooj, tab sis kev ntsib cov teeb meem no ua kom cov niam cov txiv mloog tej me nyuam hais ntau dua qub, vim cov laus ces lawv laus lawm, lawv nyob hauv tsev ntau, lawv tsis tau tawm mus nraum zoov. Ua rau cov tsev neeg tau sib pom ntsej pom muag. Li ntawd, hnub no peb yuav tig rov los xav thiab nyob ua ke kom ntau ntau. Nod yog ib qho tseem ceeb uas peb tau txais los ntawm kev ntsib teeb meem zaum no.”
Es Npos Lej nug ntxiv tias : “Vaj Qhia xav hais dab tsi rau cov kws kho mob thiab cov neeg ua hauj lwm fab saib xyuas kev noj qab haus huv ?”
Vaj Qhia teb tias : “Txiv qhuas txog lawv kawg, Txiv thov ua tsaug thiab ua pov thawj txog lawv cov hauj lwm, Txiv pom tias cov kwv kho mob thiab cov tub ua hauj lwm saib xyuas kev noj qab haus huv, lawv khwv kawg, lawv pw nyob hauv tej lub hnab ntaub uas dai ntawm tej, vim cov txaj rau neeg mob pw tsis txaus. Txiv xav hais ib lo lus uas Txiv xav tias zoo rau Txiv tus kheej heev, yog lo lus tias : cov kws kho mob thiab cov tub ua hauj lwm saib xyuas kev noj qab haus huv, lawv yog zoo li ib co Leej Ntshiab nyob ntawm yus tog vaj tog tsev. Lawv coob leej tsis tau txais kev ntseeg thiab qee leej tsis coj kev teev hawm dab tsi li, tsis kav lawv tau ua tej yam zoo thiab yog qhov tseeb uas lawv ua. Txiv xav ua tsaug rau cov tub ceev xwm thiab cov tub ua hauj lwm hauv cov tuam khw loj loj, vim lawv yog cov neeg ua kom sawv daws nyob tau ntxiv mus, lawv yog cov neeg uas peb tsis muaj lawv tsis tau.”
Es Npos Lej nug Vaj Qhia ntxiv tias : Vaj Qhia puas tau muaj teeb meem hais txog txoj kev ntseeg ?”
Vaj Qhia teb tias : “Muaj kawg ! Txiv tau ntsib teem meem hais txog kev ntseeg ntawm Txiv tus kheej ntau zaus, tab sis Txiv vam txog Leej Ntuj Plig ntshiab pab, ces Txiv cov teeb meem kuj daws tas. Teeb meem ntawm kev ntseeg, mas zoo rau sawv daws thiab peb sawv daws puav leej ntsib, tsis muaj ib tug twg hla dhau.
Lo lus kawg Es Npos Laj nug Vaj Qhia tias : “Kev sib kis tus kab mob Covid-19, puas yog huab cua txhob txwm los yog ntuj ua pauj rov rau neeg ?”
Vaj Qhia teb tias : “Muaj ib lo lus hais tseg cia tias : Tswv Ntuj zam txim rau neeg tas mus li, tab sis neeg tsuas yog zam txim rau neeg zaum puav xwb. Huab cua thiab teeb meem lub ntuj ua tsis zam txim rau leej twg. Yam li peb pom hluav taws qus, dej nyab thiab av qeeg, yog zoo li huab cua thiab tej yam lub ntuj ua tab tom ncaws kom neeg rov das txog thiab pab txuag huab cua, xyoob ntoo hav zoov yam uas lub ntuj tsim tseg.
Vam txog : Popereport
Tus txhais : Lis Maib, Zoo Tswv Zov Yaj