PEB TXHUA TUS PUAV LEEJ MUAJ YUS DAS NYOB HAUV PEB

“Peb txhua tus puav leej muaj Yus Das nyob hauv peb,
yog yuav kom peb xaiv kev ncaj ncees thiab xaiv kev saib tus kheej muaj nqis dua.”
-Vaj Qhia Fas Ntshis Kus-

Vaj Qhia hais tias : peb txhua tus neeg yeej muaj Yus Das nyob hauv peb, vim tias kom peb xaiv kev ncaj ncees thiab xaiv kev saib peb tus kheej muaj nqis dua, mas Yus Das yog qhov peb yuav ntxeev siab muag yam peb nyiam, kom peb tau yam uas peb tus kheej ntshaw. Tus me nyuam uas nws xav txog nws txoj kev tau zoo, mas nws yuav coj niam coj txiv mus nyob hauv cov tsev laus thiab tsis quav ntsej mus saib mus xyuas li. Tus me nyuam ua li no, mas nws muaj Yus Das nyob hauv nws siab.
Puas muaj ib tug neeg twg uas nws ib txhij tsob hwb Tswv Ntuj thiab tsob hwb nyiaj txiag ua ke ?
Cov neeg ua li no, mas yog nws saib nws tus kheej muaj nqis dua, nws xav tau ntsej muag yam zais ntshis. Tus neeg ntawd, nws yog ib tug neeg muaj qhov dub nyob ntawm pab pawg neeg. Nws tab tom xyuam plhu nyob ntawm tej pab pawg neeg kom nws tau ntsej muag. Tus neeg uas tsob hwb nyiaj txiag, nyiam nyiaj txiag ntau dua, mas nws yuav ntxeev siab rau lwm tus neeg kom nws muaj dua lwm tus. Qhov no yog qhov tseeb kawg. Ces thov kom sawv daws thov Ntuj pab hloov cov los pav thiab cov neeg nplua nuj lub siab uas nyiag noj saum cov neeg pluag nrob qaum. Vim lawv tsis xav txog cov neeg pluag txoj kev kub ntxhov, lawv tsuas xav txog lawv txoj kev nplua nuj tau zoo xwb. 
Hnub tim 8 lub 4 hlis no, Vaj Qhia Fas Ntshis Kus ua thaj txi Ntuj nyob hauv kem tsev so Xas Tas Mas Thas. Thaum ua thaj txi Ntuj, Vaj Qhia thov kom sawv daws thov Ntuj rau cov neeg ua luam xav noj nyiaj ntawm cov neeg pluag, rau cov neeg tau tshaj thawj los ntawm cov neeg txom nyem kub ntxhov. Cov neeg ua li no mas lawv zoo li ib co thawj neeg phem thiab cov los pav ntsej muag lo ntshav. Vim li ntawd, peb yuav thov Ntuj kom Tswv Ntuj pab hloov lawv tej siab ntsws. Nyob hauv Ntawv Moo Zoo hnub no, mas hais txog Yus Das mus ntsib cov Thawj Leej Choj kom tau muab Yes Xus muag 30 lub txiaj, yog Yus Das txoj kev ntxeev siab. 
Vaj Qhia hais ntxiv tias : hnub 4 hauv lub Lis Piam Ntshiab, mas peb hu ua hnub 4 ntawm kev ntxeev siab. Thaum Yus Das muag Yes Xus, mas ua rau peb nco txog kev muag neeg ua qhev ntawm As Fiv Kas teb mus rau As Mes Lis Kas teb. Niaj hnub no los kuj tseem muaj kev muag neeg rau ub rau no. Xyoo 2014, cov I.S ntes 400 tus poj niam yog haiv neeg tsawg nyob Is Lav qaum teb coj mus muag ua qhev rau cov tub rog Das Es.
Cov neeg muaj Yus Das nyob hauv nws siab, mas nws muag tau txhua yam thiab muag tau tus neeg nws nyiam tshaj. Qhov no ua rau Vaj Qhia nco txog cov neeg uas nws xav txog nws txoj kev tau zoo, ces nws muab niam thiab txiv xa mus nyob hauv cov tsev laus, nws tsis quav ntsej mus saib mus xyuas. Cov neeg ua li no, lawv xav tias lawv xa niam xa txiv mus nyob hauv tsev laus, ces lawv tau zoo lawm. Tab sis qhov tiag yog lawv muag niam lawv txiv ntag.
Tom qab ntawd Vaj Qhia hais txog kev tsob hwb Tswv Ntuj thiab nyiaj txiag. Huab Tias Yes Xus tau hais tias : “Nej yuav ib txhij tsob hwb Tswv Ntuj thiab nyiaj txiag tsis tau.”
Huab Tais Yes Xus xav kom peb xaiv seb peb yuav xaiv Tswv Ntuj los nyiaj txiag. Peb yuav nyob twj lij hauv Tswv Ntuj los peb yuav ua nyiaj txiag qhev. Muaj coob leej tseem ib txhij tsob hwb Tswv Ntuj thiab tsob hwb nyiaj txiag. Yog peb lam ua txuj tsob hwb Tswv Ntuj thiab tsob hwb nyiaj txiag, mas zoo li peb xav tau ntsej muag yam zais ntshis. Peb lam ua plhu nyob ntawm luag tej xub ntiag xwb, qhov tiag peb tab tom saib tsis taus luag tej. 
Vaj Qhia Fas Ntshis Kus hais txog Yus Das, nyob hauv Ntawv Ntshiab Yus Das mus ntsib cov Thawj Leej Choj thiab muag Yes Xus kom tau nyiaj, yav tag los peb tsis paub tias Yus Das yog ib tug neeg zoo li cas. Tab sis qhov tiag Yus Das yog ib tug xws li luag tej, tej zaum nws yog ib tug neeg xav ntau thiab ntxhov siab, tab sis Huab Tais Yes Xus kuj hu nws los ua Yes Xus Thwj Tim. Txawm li cas kuj xij, pom tau tias Yus Das tsis tau npaj nws lub siab ua Yes Xus Thwj Tim tiag.

Tab txawm kev ua Yes Xus Thwj Tim Yus Das tsis muaj zog thiab siab tsis npuab Yes Xus, tsis kav Huab Tais Yes Xus kuj nyiam thiab hlub Yus Das.

Nyob hauv Las Ntxas Los tsev, Mab Liab muab tshuaj tsw qab uas kim heev los ntxuav Yes Xus taw, mas yeej pom meej tias Yus Das yog ib tug neeg ntshaw nyiaj. Leej Ntshiab Zam tau hais tias : Yus Das khuv xim uas nws pom Mab Liab xuas ib co tshuaj tsw qab muaj nqis npaum ntawd mus siv rau tej yam tsis tsim nyog. Nws tu siab thiab khuv xim tsis yog vim nws hlub cov neeg pluag, yog vim Yus Das yog ib tug tub sab. Vim kev ntshaw nyiaj txiag ua kom Yus Das tsis hwm txhua txoj cai. Tus neeg ntshaw nyiaj ntau dhau, mas nws yuav ntxeev siab rau lwm tus kom nws muaj nyiaj ntau dua qub. Qhov no yog ib qho tseeb kawg. 
Qhov no yog ib qho Vaj Qhia txaus siab kawg, vim Huab Tais Yes Xus tsis tau hu Yus Das ua tus neeg ntxeev siab. Huab Tais Yes Xus yeej paub tias Yus Das yuav ntxeev siab, tab sis Huab Tais Yes Xus tsis tau ntiab Yus Das kom khiav mus. Huab Tais Yes Xus hu Yus Das ua kwv npawg. Huab Tais Yes Xus hais meej tias : “Neeg Leej Tub rov mus raws li Ntawv xub sau txog nws. Tab sis tus muab Neeg Leej Tub muag, nws raug txoj hmoov phem ! Txhiaj khoov tus ntawd tsis txhob yug los !” (MT 26 : 24)
Qhov kawg Yus Das puas poob dab phem teg ? Qhov ntawd tsis muaj leej twg paub txog. Tab sis Txiv xav kom peb nco ntsoov Huab Tais Yes Xus lo lus hu Yus Das ua kwv npawg kom ntau ntau. Zaj hais txog Yus Das yog qhia kom peb pom qhov tseeb tias : dab phem Xas Tas yog tus them nyiaj cuav thiab ntseeg tsis tau. Dab phem cog lus rau Yus Das txhua yam, tab sis qhov kawg nws cia Yus Das nyob ib leeg tag kev cia siab thiab Yus Das dai tuag. Kev ntxhov siab xav ub xav no, kev siab hlob ntshaw nyiaj txiag thiab tsis hwm Huab Tais Yes Xus, ua kom Yus Das mus ntsib cov Thawj Leej Choj. Thaum Yus Das ntsib cov Thawj Leej Choj lawm, lawv hais rau Yus Das tias : “Peb yuav ua li cas tau, nod yog koj li teeb meem.” Lo lus no yog dab phem hais rau peb ntag. Nws ntxias peb thiab tso peb nyob ib leeg tag kev cia siab xws li Yus Das. 
Tseem muaj ntau ntau lub Koom Haum nyob ntiaj teb no zoo li Yus Das uas nws caij tsuj lwm tus neeg. Thiab kuj muaj ib tug Yus Das me me nyob hauv peb txhua tus lub siab. Yog kom peb xaiv kev ncaj ncees thiab xaiv kev saib peb tus kheej muaj nqis, mas yeej muaj kev ntxeev siab, kev muag thiab xaiv txhua yam zoo rau yus tus kheej xwb. Yog peb tsis ceev faj, mas peb yuav poob rau txoj kev ntshaw nyiaj txiag, ntshaw ub ntshaw no thiab yam zoo rau lub neej tom ntej.
Muaj ib lo lus uas Vaj Qhia xav nug sawv daws tias : “Tus Yus Das me me uas nyob hauv peb, nws nyob qhov twg tiag ? Nod yog Vaj Qhia lo lus xaus. 

Vam txog : Pope Report
Tus txhais : Lis Maib, Zoo Tswv Zov Yaj