TSHEM TUS NTOO CUAM MUS RAU VAS TIS KAS

Hnub tim 26 lub 3 hlis tag los, cov neeg nyob Vas Tis Kas tau tshem tus ntoo cuam ntawm lub tsev teev Ntuj Xas Mas Xes Los (San Marcelo) mus rau Vas Tis Kas. Tus ntoo cuam ntawd cov neeg nyob Los Mas ntseeg tias tiam 16 tau pab tiv thaiv cov neeg nyob Los Mas kom dim ntawm tej kab mob phem lawm. Lawv tshem tus ntoo cuam ntawd mus rau lub tsev teev Ntuj hwm Leej Ntshiab Pob Zeb, nyob Vas Tis Kas. Kom Vaj Qhia tau thov Ntuj thiab zov lub Cim Yug ua ntej Vaj Qhia yuav foom hmoov zoo rau cov neeg nyob Los Mas thiab tas ntiaj teb neeg. Kab ke foom hmoov zoo rau cov neeg nyob Los Mas thiab tas ntiaj teb neeg, mas Vaj Qhia ua rau hnub tim 27 lub 3 hlis, uas yog hnub 6 hauv lub lis piam. 
Tig rov qab mus saib hnub tim 15 lub 3 hlis uas yog Hnub Chiv, mas yuav pom tias Vaj Qhia mus ko taw 20 feeb mus thov Ntuj ntawm tus ntoo cuam no. Ua ntej Vaj Qhia yuav mus thov Ntuj ntawm tus ntoo cuam no, mas Vaj Qhia xub mus thov Ntuj nyob ntawm Niam Mab Liab tus duab mlom xub ntiag, nyob hauv lub tsev teev Ntuj Xaas Tas Mab Liab tus tuaj saib peb. Vaj Qhia thov Ntuj kom Niam Mab Liab pab rhuav tshem tus kab mob thiab pab ntiaj teb neeg dim ntawm tus kab mob Covid-19 sai sai. 
Zaum kawg uas muab tus ntoo cuam tshem tawm ntawm lub tsev teev Ntuj Xas Mas Xes Los, mas yog xyoo 2000. Xyoo ntawd yog Vaj Qhia Zam Paj Lug Ob kom lawv muab tus ntoo cuam tshem los rau hauv lub tsev teev Ntuj hwm Leej Ntshiab Pob Zeb, kom tau ua cov kab ke txais tshauv nyob hauv lub Caij Plaub Caug. 
Yog leej twg tau saib qhov yeeb yaj duab nyob hauv zaj nkauj “Yes Xus, koj yog kuv txoj sia (Jesus Christ, You are my life)”, yog ib qho yeeb yam duab 10 xyoo tag los lawm uas muaj neeg tau muab tso nyob hauv Facebook, thaum lub caij facebook pib muaj tau tsis ntev. Nyob hauv cov yeeb yaj duab ntawd, mas yuav pom Vaj Qhia Zam Paj Lug Ob hnia tus ntoo cuam no. 

Tus txhais : Lis Maib, Zoo Tswv Zov Yaj