TUS KAB MOB COVID-19 TSIS YOG TSWV NTUJ RAU TXIM RAU TIB NEEG

Vaj Qhia hais tias : tus kab mob Covid-19 tsis yog Tswv Ntuj rau txim rau ntiaj teg neeg, tab sis yog lub sij hawm qhia kom ntiaj teb neeg txawj cais tej yam tseem ceeb thiab tsis tseem ceeb tawm hauv lub neej mus. Tus kab mob Covid-19 qhia peb tias zoo li peb sawv daws tab tom caij ib lub nkoj, vim li ntawd peb sawv daws yuav sib koom tes thiab sib pab lub caij uas muaj khaub lig cua nplawm.
Muaj ib lo lus uas ua rau cov neeg nyob hauv yus tsev me siab tshaj, mas yog lo lus tias : “Tsis txawj xeeb li puas yog ?” Lo lus no Yes Xus cov Thwj Tim kuj tau hais rau Yes Xus thaum lawv lub nkoj yuav tog hauv dej. 
Hnub tim 27 lub 3 hlis dhau los, Vaj Qhia tau thov Ntuj thiab foom hmoov zoo rau cov ntseeg nyob Los Mas thiab tas ntiaj teb neeg. Vaj Qhia thov kom Tswv Ntuj rhuav tshem tus kab mob Covid-19 nyob ntawm lub tshav puam tsev teev Ntuj hwm Leej Ntshiab Pob Zeb, nyob Vas Tis Kas. Nyob ntawm lub tshav puam, mas yog ib lub tshav puam du lug tsis muaj neeg thiab ntuj los nag xuj xuav. Vaj Qhia nyeem ntawv Moo Zoo hais txog Huab Tais Yes Xus cheem cua daj cua dub kom lub hiav txwv nyob tus. Tom qab ntawd Vaj Qhia nthuav ntawv Moo Zoo tias : tam sim no tas ntiaj teb raug tus kab mob Covid-19, ces yog zoo li sawv daws tab tom caij ib lub nkoj. Yog sawv daws tsis sib pab hwj, mas lub nkoj yuav tog rau hauv qab tiv txwv. Lub ntsiab lus ntawm Vaj Qhia cov lus hais, yog qhov tsaus ntuj dub nciab tab tom los npog lub tuam tsev teev Ntuj hwm Leej Ntshiab Pob Zeb, npog txhua txoj kev thiab sawv daws tej vaj tse. Qhov tsaus ntuj ntawd nkag los hauv peb tsev, ua rau txhua lub tsev ntsiag to yam tsis muaj neeg nyob.
Peb ntshai kev piam sij zoo li Huab Tais Yes Xus cov Thwj Tim txoj kev ntshai thaum lawv lub nkoj raug cua plhawm thiab yuav tog. Tus kab mob Covid-19 yog ib yam uas peb tsis muaj leej twg yuav ras txog tias yuav tshwm sim. Nws zoo li ib nthwv cua nplawm muaj zog heev, ces kom peb sawv daws xav tias peb tab tom nyob hauv ib lub nkoj, peb qaug zog thiab tsis pom qab yuav ua cas, tab sis kuj yog lub sij hawm uas peb yuav sib pab nquam lub nkoj kom txhob tog thiab mus ua ke. Peb txhua leej txhua tus yuav tau sib pab. Thaum Huab Tais Yes Xus thiab nws cov Thwj Tim lawv lub nkoj raug cua nplawm, mas cov Thwj Tim ntshai thiab tag kev cia siab. Huab Tais Yes Xus nyob nram tw nkoj thiab nws tsaug zog, vim nws tso siab rau Leej Txiv uas yog Tswv Ntuj. Nod yog thawj zaug thiab ib zaug xwb, uas nyob hauv Ntawv Ntshiab peb pom tias Huab Tais Yes Xus tsaug zog. Thaum Huab Tais Yes Xus sawv thiab nws cheem cua nyob tus lawm, Huab Tais Yes Xus nug cov Thwj Tim tias : “Vim li cas nej ntshai, nej tsis muaj kev ntseeg lod ?”
Ces peb yuav xav tias : Yes Xus cov Thwj Tim lawv txoj kev ntseeg ploj dua twg lawm, thiab lawv txoj kev cia siab rau Huab Tais Yes Xus thiab Tswv Ntuj yog zoo li cas. Tab sis qhov tiag cov Thwj Tim lawv ntseeg Yes Xus, lawv hu Huab Tais Yes Xus tias : “Huab Tais, koj tsis paub tias peb tab tom yuav tuag lod !”
Cov Thawj Tim xav tias Yes Xus tsis quav ntsej lawv thiab tsis txhawj txog lawv. Nyob hauv peb cov yim neeg, peb kuj kheev kheev hnov lo lus no, ces ua rau peb me siab. Lo lus no kuj raug Huab Tais Yes Xus tib yam nkaus, vim Huab Tais Yes Xus txhawj xeeb txog peb txhua tus. Lo lus tias : “Ua cas nej ntshai, ntej tsis muaj kev ntseeg lod ?”
Huab Tais Yes Xus lo lus no raug ib tsoom neeg nyob ntiaj teb siab kawg. Huab Tais Yes Xus hais li no, vim nws hlub tas ib zeej tsoom neeg. Huab Tais Yes Xus tab tom hu peb thaum peb raug kev txom nyem, tsis yog ntuj txiav txim rau peb, tab sis yog lub caij peb yuav tsum xaiv yam tseem ceeb thiab tsis tseem ceeb nyob hauv peb lub neej. 
Vaj Qhia hais ntxiv tias : peb yuav ntsia pom txog cov neeg uas lawv tab tom muab lawv txoj sia mus pab lwm tus. Tsis hais cov kws kho mob, cov neeg ua hauj lwm nyob hauv tej tuam khw, cov neeg cheb vaj cheb tsev, cov Txiv Plig, cov tub ceev xwm thiab cov neeg ua txhua yam hauj lwm pab neeg. Tas txhua cov neeg uas hais no lawv tab tom ua hauj lwm yam muaj peev xwm kom tau pab luag tej. 
Tom qab kawg, Vaj Qhia thov kom sawv daws tso siab rau Tswv Ntuj, sawv daws yuav muab siab rau thov Niam Mab Liab pab kom peb txoj kev ntseeg ruaj kho nyob rau lub caij kub ntxhov tam sim no. Thaum Vaj Qhia nthuav Ntawv Ntshiab tas lawm, nws thov Ntuj thiab zov lub Cim Yug. Qhov kawg uas sawv daws tau pom, mas yog qhov Vaj Qhia foom hmoov zoo rau cov ntseeg nyob Los Mas thiab tas ntiaj teb neeg. Vaj Qhia yuav foom hmoov zoo li no 1 xyoos 2 zaug, yam li nyob hauv lub Caij Hla thiab lub caij Yes Xus yug los. Tab sis zaum no, yog ib zaug tshwj xeeb uas Vaj Qhia foom hmoov zoo rau cov neeg ntseeg nyob Los Mas thiab tas ntiaj teb neeg. 

Vam txog : Pope report
Tus txhais : Lis Maib, Zoo Tswv Zov Yaj