VAJ QHIA PAB NYIAJ RAU TSOOM PEJ XEEM LIS NPAAS.

Vaj Qhia Fas Ntshis Kus tau muab 250,000 Euro los yog 295,000 dos las mus pab tsoom pej xeem Lis Npaas. Cov nyiaj cov yog cov Leej Phauj nyob hauv lub nroog Npes Lus ua tus txais coj mus pab cov neeg ntseeg thiab tsoom pej xeem uas lawv tab tom raug kev kub ntxhov. 
Qhov no yog ib lub cim qhia tias Vaj Qhia txhawj thiab hlub tsoom pej xeem uas raug kev kub ntxhov, ib yam li Tswv Ntuj hlub cov neeg pluag txom nyem. Cov hauj lwm no yog cov hauj lwm pab neeg uas cov neeg ntseeg Kav Tos Liv, cov Caritas nyob Lis Npaas thiab cov Caritas nyob thoob ntiaj teb yuav muab siab rau ua. Vaj Qhia pob nyiaj, yuav coj mus pab cov neeg vaj tse kub hnyiab nyob hauv lub nroog Npes lus. 
Vim kev piam sij hnub tim 4 lub 8 hli no, ua rau tsoom pej xeem raug tuag thiab raug mob ntau txhiab leej. Cov pej xeem tsis muaj tsev nyob ces lawv mus nyob hauv tej tsev kawm ntawv thiab tej tsev teev Ntuj xwb. Ntawv xov xwm tshaj tias : cov neeg tuag nyob Npes Lus yog 154 leeg, cov raug mob muaj tshaj 5,000 leej thiab 60 leej ploj lawm tseem nrhiav tsis tau tau. Muaj li ntawm 120 leej yog cov raug mob hnyav, qhov ciaj thiab qhov tuag sib npaug. 
Cov tub tseem hwv thiab cov tub khaws neeg tuag niaj hnub tshawb nrhiav cov neeg tuag, vim lub zog ntawm cov pa tshuaj tawg ua rau tej vaj tse kub hnyiab pob tag sib tsub sib nias. Kev tshawb nrhiav cov neeg tuag thiab cov neeg ploj, mas tsis yooj yim. Tam sim no tsoom pej xeem Lis Npaas ib feem kuj tawm tsam ntiab cov tseem hwv hauv Npes Lus kom tawm mus thiab muab lub txim rau lawv ris, vim yog kev tsis xyuam xim ntawm cov tseem hwv, thiaj ua rau tsoom pej xeem raug kev puas tsuaj loj npaum no.