ZAJ NYEEM HNUB TIM 5 LUB 4 HLIS 2020

Hnub Chiv Nqaum Nplooj.
Yes Xus nyob hauv Pis Las Tos lub tsev kab xwm. (MT 27 : 11-54)
Lawv coj Yes Xus mus cuag tus nom tswj teb chaws. Ces tus nom tswj teb chaws nug Yes Xus tias : “Koj puas yog cov Yus Das tus vaj ?”
Yes Xus teb tias : “Yog li koj hais ntawd.”
Cov thawj leej choj thiab cov txwj laus liam rau Yes Xus, Yes Xus tsis teb dab tsi li. Ces Pis Las Tos hais rau Yes Xus tias : “Koj tsis hnov lawv liam pes tsawg zaj rau koj lod ?”
Yes Xus tsis teb ib lo lus li, mas tus tswj teb chaws poob siab tas nrho. Niaj xyoo, thaum ua lub ntees Hla, tus nom tswj teb chaws tso ib tug neeg raug txim mus. Tsoom sid xav kom tso tus twg mas nws tso tus ntawd.
Muaj ib tug neeg raug txim nto moo, hu ua Npas Las Npas. Thaum lawv sib sau ua ke, Pis Las Tos hais rau lawv tias : "Nej xav kom kuv tso tus twg rau nej, tso Npas Las Npas, los tso tus Yes Xus uas luag hu nws ua Leej Pleev ?"
Pis Las Tos paub zoo tias tos lawv coj Yes Xus tuaj rau nws, yog vim lawv khib. Thaum Pis Las Tos zaum saum lub theej kiab txiav txim, nws poj niam fi xov tuaj hais rau nws tias : "Koj txhob raus tes ua dab tsi rau tus neeg ncaj ntawd. Hnub no, kuv ua npau suav txog nws, kuv ntxhov siab kawg."
Cov thawj leej choj thiab cov txwj laus cob tsoom pej xeem kom taij tso Npas Las Npas, hos muab Yes Xus tua. Tus nom tswj teb chaws hais rau lawv tias : "Ob tug neeg no, nej xav kom kuv tso tus twg rau nej ?"
Lawv teb tias : "Npas Las Npas."
Pis Las Tos hais rau lawv tias : "Kuv yuav ua dab tsi rau Yes Xus, tus uas luag hu nws ua Leej Pleev ?"
Lawv sawv daws hais tias : "Muab nws tua saum ntoo cuam !"
Pis Las Tos hais tias : "Nws tau ua dab tsi phem ?"
Lawv haj yam nthe nrov tias : "Muab nws tua saum ntoo cuam !"
Pis Las Tos pom tias nws ua tsis tau dab tsi, vim sawv daws pheej ua ntxhov hnyo, ces Pis Las Tos muab dej los ntxuav nws tes rau sawv daws ntsia, nws hais tias : "Kuv tsis ris cov ntshav ntawd, nej mam saib nej !"
Tas tsoom pej xeem teb tias : "Cia nws cov ntshav poob los saum peb thiab peb cov me nyuam !"
Pis Las Tos tso Npas Las Npas los rau lawv, nws muab Yes Xus rau cov tub rog nplawm tas, nws tso Yes Xus rau lawv cia lawv muab nws dai saum ntoo cuam.
Tus nom tswj teb chaws cov tub rog coj Yes Xus nrog lawv mus hauv lub tshav txiav txim. Lawv txhib tas npoj peeb zeej los hiam Yes Xus. Cov tub rog hle Yes Xus cov ris tsho, lawv muab ib lub tsho tshaj sab liab los rau nws hnav. Lawv muab ib co pos sib qhaib ua ib lub kauj tso saum nws taub hau. Lawv muab ib rab pas tauj rau nws sab tes xis tuav. Cov tub rog txhos caug ntawm Yes Xus xub ntiag, lawv thuam Yes Xus tias : "Nyob kaj lug, cov Yus Das tus vaj !"
Lawv nto aub ncaug rau Yes Xus, lawv muab rab pas tauj ntaus Yes Xus taub hau. Thaum lawv thuam Yes Xus tas, lawv muab lub tsho tshaj sab liab hle, lawv rov muab Yes Xus cov ris tsho rau Yes Xus hnav. Ces lawv coj Yes Xus mus dai saum ntoo cuam.
Thaum lawv tawm mus lawm sab nraud, lawv pom ib tug neeg tuaj Xis Les Nas tuaj. Nws hu ua Xis Moos. Lawv kom Xis Moos kwv Yes Xus tus ntoo cuam. Lawv mus txog ib thaj chaw hu ua Nkos Nkos Tas, txhais tias chaw Khauj Khaum Taub Hau, lawv muab ib co cawv xyaw tsib rau Yes Xus haus. Yes Xus saj me ntsis, nws tsis xav haus.
Thaum cov tub rog muab Yes Xus ntsia rau saum ntoo cuam tas, lawv ntaus kuam sib faib Yes Xus cov ris tsho. Ces cov tub rog zaum, lawv nyob zov Yes Xus. Lawv sau ntawv dai rau ntawm Yes Xus taub hau, piav txog Yes Xus lub txim tias : "Tus no yog Yes Xus, cov Yus Das tus vaj."
Lawv muab ob tug tub sab dai saum ntoo cuam zoo li Yes Xus thiab : ib tug nyob sab xis, ib tug nyob sab laug.
Cov neeg dua kev co taub hau thuam Yes Xus, lawv hais tias : "Koj yog tus yuav rhuav lub Tuam Tsev Ntshiab, rov txhim peb hnub tau li qub, koj rov cawm koj mas ! Saib koj yog Tswv Ntuj Leej Tub no, koj nqes saum ntoo cuam los !"
Cov thawj leej choj nrog cov Kws Ntawv Ntshiab thiab cov txwj laus hnyos Yes Xus tias : "Nws cawm tau luag tej, nws rov cawm tsis tau nws ! Saib nws yog His Xas Lais tus vaj no, kom nws nqes saum ntoo cuam los nyem no, peb thiaj yuav ntseeg txog nws ! Nws tso siab rau Tswv Ntuj ; nyem no cia Tswv Ntuj tuaj npo nws dim, saib Tswv Ntuj puas nyiam nws ! Nws yeej hais tias : "Kuv yog Tswv Ntuj Leej Tub !"
Tab yog ob tug tub sab uas dai saum ntoo cuam nrog Yes Xus, kuj thuam Yes Xus. 
Txij tav su mus txog peb teev, tas lub ntiaj teb tsaus ntuj nti. Ze ntawm peb teev, Yes Xus qw ib suab nrov nrov tias : "Es Lis, Es Lis, les mas xas npas thas nis ?", txhais tias "Kuv tus Tswv Ntuj, kuv tus Tswv Ntuj, ua cas koj tso kuv pov tseg ?"
Cov neeg nyob ntawd, muaj ib txhia hais tias : "Saib, nws hu txog Es Lias !"
Tam sis ntawd muaj ib tug khiav mus muab ib qho rwb coj mus tub dej qaub, nws muab chob rau ntawm ib tug ntsis pas tauj cev mus rau Yes Xus haus. Tab sis muaj ib co hais rau nws tias : "Tos me ntsis tso ! Cia saib peb puas pom Es Lias tuaj cawm nws !"
Yes Xus rov qw ib suab nrov nrov tas, ces nws txoj sia tu. Thaum ntawd, daim ntaub thaiv Kem Ntshiab ntuag rhe ua ob sab, txij yav saud thoob plaws rau hauv taw ; lub ntiaj teb qeeg, pob tsuas tawg, tej rooj ntxas qhib los, coob leej neeg ntshiab uas tau dua nra tas lawm, lawv lub cev sawv rov los.
Thaum Yes Xus sawv rov los, lawv tawm hauv ntxa, lawv chaws mus hauv lub Nroog Ntshiab, lawv tawm tuaj rau coob leej pom. Tus xab txheeb thiab cov tub rog uas nrog nws zov Yes Xus, pom ntiaj teb qeeg thiab pom tej xwm tshwm tuaj zoo li ntawd, lawv ntshai kawg, lawv hais tias : "Tus no yog Tswv Ntuj Leej Tub tiag !"