KEV NTSEEG YOG DAB TSI?

Kev ntseeg yog lub zog ntawm peb txoj kev lees txais Tswv Ntuj, ntseeg qhov tseeb ntawm Tswv Ntuj thiab cev peb tus kheej rau Tswv Ntuj.
Kev ntseeg yog txoj kev uas Tswv Ntuj pub rau peb, kom tau ua txoj kev coj peb mus cuag qhov tseeb thiab cuag Tswv Ntuj. Vim Huab Tais Yes Xus yog Txoj kev, yog qhov tseeb thiab yog txoj sia. Txoj kev ntseeg no tsis yog yuav ua kom peb muaj txoj kev xav thiab kev cia siab rau qee yam hauj lwm peb ua xwb. Tab sis txoj kev ntseeg no lub ntsiab lub Koom Txoos ua pov thawj nyob hauv zaj “Kuv ntseeg” lawm, thiab yog lub Koom Txoos li feem cuam yuav txuag txoj kev ntseeg kom nyob mu sib txhis. Tus twg xav ntseeg, nws yuav tsum lees txais txoj kev ntseeg thiab khaws nyob hauv nws siab mus li tsis hloov. Tab txawm tias nyob rau lub zwj ceeb uas muaj ntau txoj kev teev hawm sib txawv, tsis kav nws tus kheej yuav tsis muaj qhov hloov. Yam li tus ntseeg txog Tswv Ntuj lawm, nws yuav tso siab rau Tswv Ntuj tas siab tas ntsws, tas tswv yim tas zog. Kev ntseeg yuav tshwm sim tuaj nyob hauv peb, mas yog lub caij peb ua ib yam pab luag tej uas yog los ntawm txoj kev hlub. Tsis hais leej twg kuj xij, yog nws muaj kev ntseeg ruaj nreb thiab nyiam Tswv Ntuj, mas nws yuav ua tej yam hauj lwm tawm los zeem tseeb txog nws txoj kev ntseeg, tsis yog lees txais thiab ntseeg ntawm lo lus kom zoo mloog xwb. Tus muaj kev ntseeg, nws yuav ua cov hauj lwm hlub luag tej thiab khuv leej luag tej. Tus uas nws hais tias nws paub Tswv Ntuj zoo, tab sis nws tsis tau ua raws Tswv Ntuj Lo Lus qhia, mas yog nws hais lus dag thiab nyob hauv nws tsis muaj qhov tseeb. (1Z 2 : 4 ) 
"Leej twg lees rau sawv daws tias nws paub kuv, mas kuv kuj lees rau kuv Txiv nyob saum Ntuj tias kuv paub nws.” (MT 10 : 32)